မင်းတပ်မြို့နယ်ကျေးရွာတွေအတွင်း ရည်ရွယ်ချက်ရှိရှိ လေကြောင်းတိုက်ခိုက်မှုတွေ ကျူးလွန်နေတဲ့ စစ်ကောင်စီ လေတပ်အရာရှိ ၃ ယောက်နဲ့ အပေါင်းပါတွေကို အပြစ်ပေးစီရင်နိုင်ပါက ငွေကျပ်သိန်း ၅၀၀ တန်မြေကွက် ချီးမြှင့်မယ်လို့ မင်းတပ် CDF က ကြေညာလိုက်တယ်။

ဧပြီ ၁၉ ရက်စွဲနဲ့ ထုတ်ပြန်ချက်မှာတော့ မင်းတပ် CDF ရဲ့ စုံစမ်းမှုအရ မင်းတပ်မြို့နယ် ပန်းပါကျေးရွာကို ဂျက်ဖိုက်တာ နှစ်စင်းနဲ့ တိုက်ခိုက်ခဲ့ကြတဲ့ Pilot (လေယာဉ်မောင်းသူ) နှစ်ယောက်ဟာ ဗိုလ်မှူးနေဝင်းကျော်နဲ့ ဗိုလ်မှူးသက်လင်းမောင်တို့ဖြစ်ပြီး စစ်ခေါင်းဆောင် မင်းအောင်လှိုင် အထူးအားကိုးတဲ့ Pilot (လေယာဉ်မောင်းသူ) တွေဖြစ်တယ်လို့ ဆိုပါတယ်။

အဆိုပါ လေယာဉ်မောင်းသူ နှစ်ယောက်ဟာ Yak အုပ် စစ်ဆင်ရေး တံတားဦး၊ နေပြည်တော်၊ မှော်ဘီ ၃ နေရာကို ဦးဆောင်နေတဲ့ ဒုဗိုလ်မှူးကြီးရဲဇော်နိုင် အုပ်ချုပ်မှုလက်အောက်နဲ့ ဒုဗိုလ်မှူးကြီး ရဲဇော်နိုင်ကတော့ အုပ်မှူးအနေနဲ့ တံတားဦး လေတပ်စခန်းမှာ  တာဝန်ယူနေတယ်လို့ မင်းတပ် CDF က ပြောပါတယ်။

ဒါကြောင့်မို့ မင်းတပ်မြို့နယ်ကျေးရွာတွေအတွင်း ရည်ရွယ်ချက်ရှိရှိ တိုက်ခိုက်နေတဲ့ ဒုဗိုလ်မှူးကြီးရဲဇော်နိုင်နဲ့ Pilot (လေယာဉ်မောင်းသူ) ၂ ယောက်၊ ဒါမှမဟုတ် သူတို့ ၂ ယောက်နဲ့ အလိုတူအလိုပါ ပူးပေါင်းသူတွေကို အပြစ်ပေး စီရင်ကာ သက်သေပြနိုင်တဲ့ ဘယ်အဖွဲ့အစည်းကိုမဆို ခုလို ချီးမြှင့်သွားမယ်လို့ အသိပေး ကြေညာလိုက်တာပါ။

ပြီးခဲ့တဲ့ ဇန်နဝါရီလ ပထမအပတ်က စတင်ကာ အကြမ်းဖက်စစ်ကောင်စီဟာ မင်းတပ်မြို့နယ် ကျေးရွာတွေအတွင်း ရည်ရွယ်ချက်ရှိရှိ အပြစ်မဲ့ ပြည်သူတွေကို ပစ်မှတ်ထားကာ လေကြောင်းတိုက်ခိုက်မှုတွေ ဆက်တိုက်ကျူးလွန်လာခဲ့ပြီး အဆိုပါ တိုက်ခိုက်မှုတွေထဲမှာ ပြည်သူအိုးအိမ်ပျက်စီးမှုများစွာနဲ့ အပြစ်မဲ့ ပြည်သူသေဆုံးမှုတွေ ရှိလာနေတာကြောင့် မင်းတပ် CDF က ခုလို စုံစမ်းဖော်ထုတ်ရတာဖြစ်တယ်လို့ ဆိုပါတယ်။

ပြီးခဲ့တဲ့ သင်္ကြန်အတက်နေ့ ဧပြီ ၁၆ ရက်တုန်းကလည်း ချင်းပြည်နယ်၊ မင်းတပ်မြို့ကို စစ်ကောင်စီက လေကြောင်းကနေ အကြမ်းဖက် တိုက်ခိုက်ခဲ့လို့ ကလေးငယ်တယောက်၊ သက်ကြီးရွယ်အို တယောက်နဲ့ မိန်းကလေးငယ်တယောက် သေဆုံးသွားခဲ့ပါတယ်။

စစ်ကောင်စီတပ်ရဲ့ ဂျက်တိုက်လေယာဉ်နဲ့ ညနေ ၄ နာရီလောက်မှာ မင်းတပ်မြို့နယ်၊ တိုက်နယ် ၁၊ ပန်းပါရွာကို ၆ ကြိမ် လာရောက်တိုက်ခိုက်ပြီး ဗုံး ၁၇ လုံးကြဲချတာလို့ CDF Mindat ရဲ့ သတင်းပြန်ကြားရေးနဲ့ မှတ်တမ်းဌာနက ထုတ်ပြန်ခဲ့တာပါ။

အကြမ်းဖက်စစ်တပ်ဟာ လေကြောင်းကနေ တိုက်ခိုက်တာကို ပိုအားထားသုံးလာပြီး ပြီးခဲ့တဲ့ ဇန်နဝါရီကနေ မတ်လအတွင်း နိုင်ငံတဝန်း လေကြောင်းကတိုက်ခိုက်တာ၊ ပစ်ကူတာ ၄၇ ကြိမ် လုပ်ခဲ့တယ်လို့ သိရပါတယ်။

ချင်းပြည်နယ်၊ မင်းတပ်မြို့နယ်ကိုလည်း ဇန်နဝါရီ ၇ ရက်ကနေ ၂၃ ရက်အထိ လေကြောင်းတိုက်ခိုက်မှု ၈ ကြိမ် ပြုလုပ်ခဲ့ပါတယ်။

ချင်းပြည်နယ်မှာ လက်နက်အပြည့်အစုံနဲ့ ပြည်သူ့ရင်ခွင်ခိုလှုံလာသူ စစ်ကောင်စီတပ်သားတဦးကို ချင်းကာကွယ်ရေးတပ်ဖွဲ့-မင်းတပ် CDF-Mindat က ဂုဏ်ပြုဆုငွေ ကျပ်သိန်း ၅၀ ချီးမြှင့်ခဲ့တယ်လို့ ထုတ်ပြန်ပါတယ်။

အဆိုပါ တပ်သားဟာ အမ်အေ-၁ တလက်၊ ကျည်အိမ် ၄ ခု၊ ၅.၅၆ ကျည် ၂၁၆ တောင့်တို့နဲ့အတူ CDM ပြုလုပ်ကာ ဝင်ရောက်လာခဲ့တာဖြစ်ပြီး CDF-Mindat တပ်မဟာမှူးက ချီးမြှင့်တဲ့ ဂုဏ်ပြုဆုငွေကျပ်သိန်း ၅၀ ထဲက ၁၅ သိန်းကို ပြည်သူ့တော်လှန်ရေးအတွက် ပြန်လည်လှူဒါန်းခဲ့တယ်လို့ ဆိုပါတယ်။

နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီတည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ်တိုက်ပွဲတွေ တိုင်းဒေသကြီးနဲ့ ပြည်နယ်တွေ အနှံ့အပြား ဖြစ်ပွားနေပါတယ်။

လက်ရှိမှာတော့ ပြည်သူလူထုကို အကြမ်းဖက်သတ်ဖြတ်နေတဲ့ စစ်ကောင်စီရဲ့ လုပ်ရပ်တွေကို မလိုလား မနှစ်မြို့ကြတဲ့ အရာရှိ၊ စစ်သည်တွေ၊ ရဲတပ်သားတွေဟာ  သူတို့ရဲ့ ဂုဏ်သိက္ခာ၊ မျိုးဆက်တွေရဲ့ ဂုဏ်သိက္ခာကို ပြန်လည်ရယူဖို့ စစ်အာဏာရှင်ရဲ့ လက်ကိုင်တုတ်အဖြစ်က ရုန်းထွက်ပြီး ပြည်သူ့ဘက် ကူးပြောင်းရပ်တည်လာတာ တဖြည်းဖြည်း များပြားလာနေပါတယ်။

တပ်မတော်ကို အလွဲသုံးစားပြုလုပ်နေတဲ့ လက်တဆုပ်စာ စစ်ဗိုလ်ချုပ်တစုရဲ့ လက်ကိုင်တုတ် ခါးပိုက်ဆောင်တပ်အဖြစ်မှ ရုန်းထွက်ပြီး ပြည်သူ့ရင်ခွင် အမြန်ဆုံးခိုဝင်ကြဖို့ တပ်မတော်သားတွေ၊ ရဲတပ်သားတွေကို အမျိုးသားညီညွတ်ရေးအစိုးရ (NUG) က  တိုက်တွန်းနှိုးဆော်ထားပါတယ်။

စစ်အာဏာသိမ်းကာလ ၁ နှစ်ကျော်အတွင်း CDM လှုပ်ရှားမှုမှာ ပါဝင်လာသူတွေနဲ့  ပြည်သူ့ ရင်ခွင်ခိုလှုံလာတဲ့ တပ်မတော်သားတွေလည်း ထောင်နဲ့ချီ ရှိလာနေပြီ ဖြစ်ပါတယ်။

ဒါ့အပြင် အင်အားကြီး တိုင်းရင်းသား လက်နက်ကိုင်အဖွဲ့တွေဖြစ်ကြတဲ့ ကချင်လွတ် မြောက်ရေးတပ်မတော် (ကေအိုင်အေ)နဲ့ ကရင်အမျိုးသားအစည်းအရုံး (ကေအန်ယူ) တို့လို အဖွဲ့အစည်းတွေကလည်း စစ်အာဏာရှင်ဆန့်ကျင်ကာ ပူးပေါင်းလိုတဲ့ ရှေ့တန်းရောက် မြန်မာ့တပ်မတော်သားတွေ၊ ရဲတပ်သားတွေကို လက်ကမ်းကြိုဆိုနေကြပါတယ်။