မကွေးတိုင်း၊ သရက်ခရိုင်၊ မင်းတုန်းမြို့နယ်ထဲက လက်ပွကျေးရွာကို စစ်ကောင်စီတပ်ဖွဲ့တွေ စစ်ကြောင်းထိုး ဝင်ရောက်တပ်စွဲခဲ့ပြီး အပြစ်မဲ့ရွာသား ၁ဝ ယောက်ကို ဖမ်းဆီးသွားကာ ဖမ်းဆီးခံရတဲ့သူတွေရဲ့ သတင်းအစအန လုံးဝလိုက်လို့မရတော့ဘဲ ပျောက်ဆုံးနေတယ်လို့ ဒေသခံတွေဆီက သိရပါတယ်။
ဧပြီ ၂၈ ရက်က စတင်ပြီး လက်ပွကျေးရွာကို စစ်ကောင်စီတပ် အင်အား ၁၅ဝ ခန့်ပါ စစ်ကြောင်းနဲ့ ဝင်ရောက်တပ်စွဲခဲ့တာဖြစ်ပြီး စစ်ကြောင်းဝင်တဲ့အချိန်ကနေ စတင်ကာ ကျေးရွာကို အဝင်အထွက် လုံးဝခွင့်မပြုတော့ဘဲ လက်ပွကျေးရွာဒေသခံ အမျိုးသမီးတွေ အပါအဝင် ၁ဝ ဦးကို ဖမ်းဆီးသွားခဲ့တာပါ။
ဒေသခံတဦးက “သူတို့ လာတပ်စွဲတဲ့ အချိန်ကတည်းက လက်ပွရွာက ဘယ်သူ့ကိုမှ ဆက်သွယ်မရတော့တာ။ ရွာနားတဝိုက်လည်း သူတို့စစ်သားတွေချည်းပဲ။ အနီးအနားက ရွာတွေကလည်း ဆွေမျိုးသားချင်းတွေပဲဆိုတော့ ဘယ်လိုများ နှိပ်စက်နေကြလဲဆိုပြီး စိတ်မကောင်း ဖြစ်ရတာပေါ့” လို့ ပြောပါတယ်။
ဖမ်းဆီးခံရသူ လက်ပွကျေးရွာသားတွေကတော့ မခင်စု၊ မအေးလှိုင်၊ မကြည်မြိုင်၊ မမိညို၊ မသန်းသန်းစိုး၊ ကိုဇင်ကိုဦး၊ ကိုဝင်းဘို၊ ကိုသောကြာတို့ အပါအဝင် ၁ဝ ဦးဖြစ်ပြီး စစ်တပ်က ဘယ်နေရာကို ခေါ်သွားလဲဆိုတာကို ဒေသခံတွေလည်း မသိရသေးဘူးလို့ ဆိုပါတယ်။
လက်ရှိမှာတော့ စစ်ကောင်စီတပ်ဖွဲ့တွေက လက်ပွကျေးရွာကို စတင်ဝင်ရောက်စဥ်ကတည်းက တခြားကျေးရွာ၊ ဒေသတွေနဲ့ ဆက်သွယ်လို့မရအောင် ဖုန်းလိုင်း၊ အင်တာနက်လိုင်းတွေကို ဖြတ်တောက်ထားခဲ့ပြီး အခုဖမ်းခံရပြီး သတင်းပျောက်နေသူတွေအပြင် တခြား ဖမ်းဆီးခံရသူတွေလည်း ရှိနိုင်ပြီး ကျေးရွာတွင်းကိုလည်း PDF နဲ့ပတ်သက်ပြီး သတင်းပေးဖို့နဲ့ ပျက်ကွက်ပါက တရွာလုံး အရေးယူခံရမယ်ဆိုတဲ့ ခံဝန်လက်မှတ်တွေကို အိမ်တိုင်းစေ့ ထိုးခိုင်းနေတယ်လို့ သိရပါတယ်။
အဖမ်းခံရတဲ့ရွာသားတွေကိစ္စစုံစမ်းနေသူတဦးက “အသက်ရှင်လျက် ပြန်အဆက်သွယ်ရဖို့ကိုပဲ မျှော်လင့်နေတာ။ နောက်ပြီး အဲ့ရွာရဲ့ အပြင်ဘက်တွေမှာက စိုက်ခင်းတွေရှိတယ်။ အဲ့ကိုလည်း ပေးမသွားဘူး။ PDF ထောက်ပံ့တယ်ဆိုပြီး လုပ်တာပါ။ ပြီးခဲ့တဲ့ ဝါဆိုလကလည်း တခါလာတယ်၊ ရိုက်နှက်နှိပ်စက်ပြီး ပြန်သွားတာ။ အဲ့တုန်းကလည်း လက်ပြန်ကြိုးတုပ်ပြီးတော့ကို ရိုက်တာ။ PDF ထောက်ပံ့ဦးမလား မေးမေးပြီးရိုက်တာ။ ကျနော်တို့က တရွာနဲ့တရွာ ညီနောင်သားချင်းတွေ ဖြစ်နေတော့ တခုခုလုပ်လိုက်မှာကို နာရီနဲ့အမျှ ဘုရားတနေရတယ်” လို့ ပြောပါတယ်။
လက်ပွကျေးရွာမှာ အိမ်ထောင်စု ၁၃၀ ကျော်ရှိပြီး တော်လှန်ရေးအင်အားစုတွေကို အကူအညီပေးတယ်ဆိုတဲ့ စွဲချက်တွေနဲ့ ၂၀၂၂ ခုနှစ် စက်တင်ဘာလတုန်းကလည်း ကျေးရွာအုပ်ချုပ်ရေးမှူး အပါအဝင် ရွာသား ၂၈ ဦးကို စစ်တပ်က ဖမ်းဆီးကာ ထောင်ဒဏ် ၁၅ နှစ်ကနေ ၂၆ နှစ်အထိ ချမှတ်ခဲ့ပါတယ်။
ချင်းပြည်နယ် ဖလမ်းမြို့နယ်မှာ ဧပြီလ ၁၀ ရက်နေ့ မနက်ပိုင်းမှာ စစ်ကောင်စီတပ်စခန်း ၁ခု သိမ်းပိုက်ခံရပြီးနောက် လေကြောင်းတိုက်ခိုက်မှုတွေပြုလုပ်ခဲ့တယ်လို့ တော်လှန်ရေးတပ်ဖွဲ့တွေဆီကနေ သိရပါတယ်။
ဖလမ်းမြို့နယ်က စစ်ကောင်စီရဲ့ ဗာရ်းစခန်းကို ဧပြီ ၁၀ ရက် မနက် ၅ နာရီလောက်ကနေ စတင်တိုက်ခိုက်ခဲ့ပြီး အချိန် ၁ နာရီခွဲလောက်အကြာမှာ စခန်းတခုလုံးကို သိမ်းပိုက်မီးရှို့ဖျက်ဆီးနိုင်ခဲ့တယ်လို့ ချင်းအမျိုးသားအဖွဲ့ချုပ် CNDF/CNO ရဲ့ ပြောရေးဆိုခွင့်ရှိသူ ကိုကျူံးငိုင်းက ဒီဗွီဘီကို ပြောပါတယ်။
အဲဒီတိုက်ခိုက်မှုအတွင်းမှာ စစ်ကောင်စီဘက်က ၁၆ ယောက်လောက်သေဆုံးပြီး ၁၁ ယောက်လောက်ကို အရှင်ဖမ်းမိထားကာ စခန်းမှာရှိတဲ့ လက်နက် ၁၉ လက်လောက်နဲ့ ခဲယမ်းတွေကို သိမ်းဆည်းနိုင်ခဲ့တယ်လို့ ဆိုပါတယ်။
“စခန်းသိမ်းပြီး နာရီဝက်လောက်အကြာမှာ ဂျက်ဖိုက်တာ ၁ စီးနဲ့ ၃ ကြိမ်လာတယ်။ ဗုံး ၆ ကြိမ်ချသွားတယ်။ ကျနော်တို့ဘက်က ရဲဘော်တယောက်ကတော့ လက်ပစ်ဗုံးဖြုတ်လိုက်တဲ့အချိန်မှာ ကိုယ့်ကိုယ်ကိုယ် မတော်တဆဖြစ်ပြီးတော့ ကျဆုံးခဲ့တယ်” လို့ ကိုကျူံးငိုင်းက ပြောပါတယ်။
ဒါ့အပြင် တိုက်ပွဲနဲ့ သက်ဆိုင်ခြင်းမရှိတဲ့ ဝေဘူလမြို့ကို မနက် ၁၁ နာရီလောက်က အကြောင်းမဲ့လေကြောင်းတိုက်ခိုက်ခဲ့တာကြောင့် ပြည်သူ ၉ ယောက်သေဆုံးကာ ၅ ယောက်လောက် ဒဏ်ရာရရှိခဲ့တယ်လို့ ဆိုပါတယ်။
မကွေးတိုင်း မင်းတုန်းမြို့နယ်မှာလည်း ဧပြီ ၁၀ ရက်နေ့ မနက်ပိုင်းက ကျောက်တိုင်ရဲစခန်း အနီးကပ်တိုက်ခိုက်ခံရပြီး ၂ ယောက်သေဆုံးကာ ၄ ယောက် အပြင်းထန် ဒဏ်ရာရရှိခဲ့တယ်လို့ Eagle Force ရဲ့ ပြန်ကြားရေးတာဝန်ခံ ကိုမြတ်က ပြောပါတယ်။
“ကျောက်တိုင်ရဲစခန်းမှာက စခ၊ ရခ ပူးပေါင်း ၁၅ ယောက်လောက်ရှိမယ်။ အဲဒါကို သရက်ခရိုင်တပ်ရင်း (၄) Eagle Force၊ ကျောင်းသားလက်ရုံးတပ်တော် SAF၊ လွတ်မြောက်ရေးတပ်တော် W.O.L.F တို့ ပူးပေါင်းပြီး အနီးကပ် ချည်းကပ်ပြီး ကျနော်တို့ဘက်က စတင် ပစ်ခတ်ခဲ့တာ။ သူတို့ဘက်ကလည်း ပြန်လည်ပစ်ခတ်တာတွေရှိပြီး လမ်းတဖက်ကနေ ပစ်ခတ်ရတာဆိုတော့ ခရီးသွားပြည်သူတွေရဲ့ ကားတချို့က တိုက်ပွဲ နားကပ်လာလို့ ပစ်ခတ်တဲ့ အရှိန်လျော့သွားပြီး သတ်မှတ်တဲ့အချိန်လွန်သွားပြီး ကျည်ဆန်လည်းမလုံလောက်တော့လို့ ပြန်လည်ဆုတ်ခွာခဲ့ကြတယ်။”
စခန်းကို ဝင်ရောက်သိမ်းပိုက်ဖို့ သွားရောက်တိုက်ခိုက်ခဲ့တာဖြစ်ပြီး မသိမ်းပိုက်နိုင်ခဲ့ဘဲ မင်းတုန်းဇာတိ ရဲတပ်သားဇင်ဘိုကို အပါဝင် ၂ ယောက်သေဆုံး၊ ၄ ယောက် ဒဏ်ရာရရှိကာ မကွေးဆေးရုံကို သယ်သွားတယ် သတင်းကြားတယ်လို့ ပြောပါတယ်။
မကွေးတိုင်း မြိုင်မြို့နယ်မှာ ဧပြီ ၈ ရက်နေ့ ညနေက စစ်ကောင်စီစစ်ကြောင်း ဒရုန်းနဲ့ဗုံးကြဲတိုက်ခိုက်ခံရပြီး ၆ ယောက်ထက်မနည်း အပြင်းထန် ဒဏ်ရာရရှိခဲ့တယ်လို့ မြိုင်မြို့နယ် ပကဖ ကနေ သိရပါတယ်။
မြိုင်မြို့နယ် ညောင်ရွာကျေးရွာမှာ စစ်ကောင်စီရဲ့ အင်အား ၈၀ လောက်ပါတဲ့ ဘီလူးစစ်ကြောင်းကို ဧပြီ ၈ ရက် ညနေ ၅ နာရီ ၅၃ မိနစ်မှာ ဒရုန်းနဲ့ အီနာဂါဗုံးသီး ၂၈ လုံး ဖြုတ်ချတိုက်ခိုက်ခဲ့တာလို့ မြိုင်ပကဖ တပ်ရင်း ၁ တပ်ရင်းမှူး ဗိုလ်လက်ယာက ဒီဗွီဘီကို ပြောပါတယ်။
စစ်ကြောင်းကတော့ ပုလဲမြို့နယ် ပန်းရွာကို Mi35 တိုက်ခိုက်ရေးရဟတ်ယာဥ်နဲ့ ပစ်ခတ်ပြီး ထောက်ပို့ ရဟတ်ယဥ် ၂ စီးနဲ့ လာချသွားတဲ့ စစ်ကြောင်းဖြစ်ပြီး ဘီးလူးစစ်ကြောင်းလို့ အမည်ပေးထားတယ်လို့ ဆိုပါတယ်။
အဲဒီတိုက်ခိုက်မှုကို မြိုင်ပကဖ တပ်ရင်း ၁၊ ၂၊ သူရိန်တပ်ဖွဲ့နဲ့ Black Cobra တပ်ဖွဲ့တို့ ပူးပေါင်းတိုက်ခိုက်ခဲ့တာဖြစ်ပြီး စစ်ကောင်စီဘက်က ၆ ယောက်အပြင်းထန် ဒဏ်ရာရရှိကာ ပြည်သူ့ကာကွယ်ရေးတပ်က ရဲဘော်တွေ ထိခိုက်မှုမရှိခဲ့ဘူးလို့ ဗိုလ်လက်ယာက ပြောပါတယ်။
အဲဒီစစ်ကြောင်းဟာ မြိုင်မြို့နယ် အိုင်းမကျေးရွာကိုလည်း ဧပြီ ၈ ရက် မနက်မှာ မီးရှို့ဖျက်ဆီးခဲ့တာကြောင့် နေအိမ် ၁၈ လုံး မီးလောင်ကျွမ်းခဲ့တယ်လို့ ဒေသခံတွေက ပြောပါတယ်။
တိုက်ခိုက်မှုအတွင်း စစ်ကောင်စီဘက်က ထိခိုက်သေဆုံးတဲ့အခြေနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။
ချင်းပြည်နယ်၊ မကွေးတိုင်းနဲ့ စစ်ကိုင်းတိုင်းတွေမှာ စစ်ကောင်စီရဲ့ မြေပြင်စစ်ကြောင်းတွေကို ပြည်သူ့ကာကွယ်ရေးတပ်ဖွဲ့တွေက တိုက်ခိုက်လို့ အထိနာနေတာကြောင့် စစ်ကောင်စီဘက်က လေကြောင်းတိုက်ခိုက်တာတွေ ဆက်တိုက်ပြုလုပ်လာနေတယ်လို့ တော်လှန်ရေးတပ်ဖွဲ့တွေဆီကနေ သိရပါတယ်။
