မကွေးတိုင်း၊ မင်းဘူးခရိုင်၊ မင်းဘူး (စကု)မြို့နယ်၊ ခင်ကုန်းကျေးရွာမှာ ဧပြီ ၂ ရက် မနက် ၁၁ နာရီခွဲလောက်က မီးလောင်မှုဖြစ်ပွားပြီး လူနေအိမ် ၃၂ လုံး ဆုံးရှုံးခဲ့တယ်လို့ ဒေသခံ‌တွေက ပြောပါတယ်။

အဲဒီရွာမှာနေတဲ့ ဦးဝေဖြိုးအောင်တို့ လင်မယားနှစ်ယောက် အချင်းချင်း စကားများ ရန်ဖြစ်ကြရင်းနဲ့ ယောက်ျားလုပ်သူက သူ့ကိုယ်သူ ဓာတ်ဆီလောင်း မီးရှို့သတ်သေဖို့လုပ်ရင်း ရုန်းရင်းဆန်ခတ်ဖြစ်ကာ သူတို့အိမ် မီးစလောင်မှုဖြစ်ပွားပြီး တခြားအိမ် ၃၁ လုံးထိ မီးကူးစက်လောင်ကျွမ်းခဲ့တာဖြစ်ပါတယ်။

မီးလောင်တဲ့နေရာကို မင်းဘူး၊ စကု၊ ထောက်ရှာပင်၊ ပွင့်ဖြူ၊ လယ်ကိုင်းနဲ့ ကျောင်းတော်ရာ နယ်မြေမီးသတ်စခန်းတွေက မီးသတ်ယာဉ် ၆ စီး၊ မီးသတ်ရေသယ်ယာဉ် ၆ စီးတို့နဲ့အတူ ကျေးရွာနေပြည်သူတွေ ဝိုင်းဝန်းငြှိမ်းသတ်ခဲ့လို့ မွန်းလွဲ ၁၂ နာရီ ၁၅ မိနစ်မှာ မီးငြှိမ်းသွားတယ်လို့ ဒေသခံ မီးသတ်ဦးစီးဌာနမှ သိရပါတယ်။

မီးလောင်မှုကြောင့် လူနေအိမ် ၃၂ လုံးနဲ့ နွားတင်းကုပ် ၁၁ လုံး၊ လက်တွန်းထွန်စက် ၁ စီး၊ ဆိုင်ကယ် ၁ စီးနဲ့ စပါးတင်း ၃၀၀ မီးကူးဆက်လောင်ကျွမ်းခဲ့ပြီး ကာလတန်ဖိုး ငွေကျပ် သိန်း ၆၈,၆၂၄,၀၀၀ မီးလောင်ပျက်စီးဆုံးရှုံးခဲ့ကာ မိမိကိုယ်ကို မီးရှို့ဖို့ ကြံစည်တဲ့ အမျိုးသားတဦး မီးလောင်ဒဏ်ရာရရှိပြီး ဆေးကုသမှုခံယူနေကာ အိမ်ထောင်စု ၃၄ စုက အိမ်ခြေ ၃၂ လုံး၊ လူဦးရေ ၁၄၈ ဦး မီးဘေးသင့်ခဲ့ရကြောင်း ခရိုင်မီးသတ်ဦးစီးမှူး ဦးထွန်းထွန်းက ပြောပါတယ်။

မီးလောင်မှုနဲ့ပတ်သက်ပြီး မိမိကိုယ်ကို သေကြောင်းကြံစည်ရင်း မီးလောင်မှုဖြစ်ပွားစေခဲ့တဲ့ ဦးဝေဖြိုးအောင်ကို စကုနယ်မြေရဲစခန်းမှာ (ပ)၂၂/၂၀၂၃ ရာဇသတ်ကြီးဥပဒေပုဒ်မ-၄၃၆/၃၀၉ နဲ့ အမှုဖွင့် အရေးယူထားပါတယ်။

မကွေးတိုင်း မင်းဘူး(စကု)မြို့နယ် အခြေခံပညာ ကျောင်းသားသမဂ္ဂ အလုပ်အမှုဆောင် အဖွဲ့ဝင် ၂ ယောက်ကို မနေ့က မေလ ၆ ရက်နေ့မှာ စစ်ကောင်စီက ထောင်ဒဏ် ၃ နှစ်ချမှတ်လိုက်တယ်လို့ မင်းဘူးမြို့နယ် ဗ.က.သ က ပြောပါတယ်။

မင်ဘူးမြို့နယ် ဗ.က.သ အလုပ်အမှုဆောင် အဖွဲ့ဝင်တွေဖြစ်တဲ့ ကိုပိုင်ခွန်းသာနဲ့ ကိုသူရသက်ဘုန်သျှံတို့ကို စစ်ကောင်စီရဲ့ မင်းဘူးမြို့နယ်တရားရုံးက မေလ ၆ ရက်နေ့မှာ ထောင်ဒဏ် ၃ နှစ်ချမှတ်ကာ မန္တလေးက လူငယ်အကျဥ်းထောင်ကို ပို့ဖို့ စီရင်ချက်ချမှတ်ခဲ့တာလို့ မင်းဘူးမြို့နယ် ဗ.က.သ ဥက္ကဋ္ဌ ကိုငြိမ်းမောင်က ဒီဗွီဘီကိုပြောပါတယ်။

“စစ်ကောင်စီက နိုင်ငံရေး အမြတ်ထုတ်တဲ့အနေနဲ့ စာသင်ကျောင်းတွေကို ဘယ်လိုပဲ စေတနာရှိပါတယ်ပြောပြော၊ လူငယ်တွေအနာဂတ်ကို ဘယ်လိုတန်ဖိုးထားတယ်ပဲ ပြောပြော ကျောင်းတွေကို ဟန်ပြဖွင့်နေသလို့ တဖက်မှာလည်း ကျောင်းသားတွေကို အခုလို မတရားဖမ်းဆီးထောင်ချနေတယ်ဆိုတာကို သိစေချင်တယ်။ အဲဒီလို ထောင်ချနေတဲ့အတွက်လည်း ကျနော်တို့ မင်းဘူး ဗ.က.သ က တုန်လှုပ်မှာမဟုတ်ဘဲ လက်ရှိတိမ်းရှောင်နေကြတဲ့ အလုပ်အမှုဆောင်အဖွဲ့တွေဟာ မြန်မာနိုင်ငံရဲ့ နယ်မြေအသီးသီးမှာ စည်းရုံးရေးတာဝန်နဲ့ လက်နက်ကိုင်တာဝန်တွေကို ကျရာနေရာက ထမ်းဆောင်နေကြတယ်ဆိုတာ လူထုကို သိစေချင်တယ်။” 

အဲဒီကျောင်းသား သမဂ္ဂ အဖွဲ့ဝင် ၂ ယောက်ကို ၂၀၂၁ ခုနှစ် ဒီဇင်ဘာလ ၁၆ ရက်နေ့မှာ စစ်အုပ်စုက မတရားဖမ်းဆီးပြီး ရာဇသတ်ကြီးပုဒ်မ ၅၀၅(က)နဲ့ ထောင် ၃နှစ်ချမှတ်လိုက်တာပါ။ 

အဲဒီလို မတရား ပြစ်ဒဏ်ချမှတ်တဲ့အပေါ်မှာ မင်းဘူး(စကု)မြို့နယ် ဗ.က.သ အနေနဲ့ အပြင်းအထန် ကန်ကွက် ရှုတ်ချပြီး ကျောင်းသားလူငယ်တွေကို ပညာသင်ခွင့်ဆုံးရှုံးအောင်၊ ကြောက်စိတ်ရိုက်သိမ်းပြီး အာဏာသိမ်း အကြမ်းဖက်မှုကို သက်ဆိုးရှည်အောင် မတရားဆောင်ရွက်တာလို့ မင်းဘူးမြို့နယ် ဗ.က.သ ဥက္ကဋ္ဌ က ပြောပါတယ်။

အာဏာသိမ်း စစ်ကောင်စီဟာ စာသင်ကျောင်းတွေ အတင်းအဓမ္မ ပြန်ဖွင့် ဖို့ကြိုးစားနေပေမယ့်လည်း တဖက်မှာ ကျောင်းသားလူငယ်တွေကို မတရား ဖမ်းဆီးထောင်ချတာတွေ ဆက်တိုက်ကျူးလွန်နေတာပါ။