ရန်ကုန်တိုင်း၊ မင်္ဂလာ‌တောင်ညွန့်မြို့နယ်၊ ကျီတော်ရပ်ကွက်၊ မဟာဘောဂလမ်းက တိုက်ခန်းတခုမှာ ဧပြီ ၂၈ ရက် နေ့လယ် ၂ နာရီလောက်က လျှပ်စစ်မီးပြတ်ပြီး ရာသီဥတု ပူပြင်းတဲ့အတွက် မိသားစုဝင် ၄ ဦး ချွေးထွက်လွန်ပြီး သတိလစ် မူးလဲခဲ့တယ်လို့ ရပ်ကွက်နေ ပြည်သူတွေဆီက သိရပါတယ်။

တိုက်ခန်းအနီး နေထိုင်သူတဦးက “ကူညီကြပါဦးဆိုပြီး တိုက်ခန်းအဝကနေ အမျိုးသမီးတယောက် အော်သံကြားလို့ ထွက်ကြည့်တာ အခန်းထဲကလူတွေ အကုန် ချွေးတွေထွက်ပြီး သတိလစ်နေကြတယ်။ အော်တဲ့အမျိုးသမီးလည်း ခဏနေတော့ မူးလဲသွားတာ” လို့ ပြောပါတယ်။

တိုက်ခန်းအတွင်း သတိလစ်မူးလဲခဲ့တဲ့ အသက် ၆၅ နှစ်အရွယ် အမျိုးသား ၁ ဦး၊ အသက် ၄၀ အရွယ် အမျိုးသမီးကြီး ၁ ဦး၊ အသက် ၃၁ နှစ်အရွယ် အမျိုးသမီး ၁ ဦးနဲ့ ၇ နှစ်သမီးအရွယ် ကလေး ၁ ဦးတို့ကို ရန်ကုန်ဆေးရုံကြီး အရေးပေါ်ဌာနကို ပို့ဆောင်ပေးခဲ့ပြီး စိုးရိမ်စရာမရှိတော့ဘူးလို့ လောကဟိတဝဟ (ကျီတော်) လူမှုကူညီရေးအသင်းက ပြောပါတယ်။

မြန်မာနိုင်ငံအတွင်း အပူချိန်မြင့်တက်နေမှုနဲ့အတူ လျှပ်စစ်မီး အချိန်ကြာမြင့်စွာ ပြတ်တောက်တာတွေကြောင့် သတိလစ် မူးလဲပြီး အသက်သေဆုံးတာတွေ ဖြစ်ပေါ်နေကာ ဧပြီ ၂၈ ရက်က ရန်ကုန်မြို့ရဲ့ အပူချိန်ဟာ ၃၉ ဒီဂရီစင်တီဂရိတ် ရှိတယ်လို့ မိုးလေဝသနဲ့ ဇလ‌ေဗဒ ညွှန်ကြားမှုဦးစီးဌာနက ထုတ်ပြန်ထားပါတယ်။

ရန်ကုန်တိုင်း၊ မင်္ဂလာတောင်ညွန့်မြို့နယ်၊ စက်ရုံလမ်း၊ တော်ဝင်ပလာဇာအနီး၊ ပုဇွန်တောင် ခုံးကျော်တံတားအဆင်းမှာ မတ်လ ၁၅ ရက် ည ၁၀ နာရီခွဲလောက်က ခရီးသည်ပါ ဆိုက်ကားနဲ့ ကားတစီး တိုက်မိခဲ့တာကြောင့် လူသေဆုံးမှုဖြစ်ခဲ့ပြီး ကားကို မောင်းပြေးသွားတယ်လို့ မြို့ခံတွေဆီက သိရပါတယ်။

ယာဉ်တိုက်မှုကြောင့် ဆိုက်ကားနင်းသူ အသက် ၄၀ အရွယ် မသန်စွမ်းအမျိုးသား ၁ ဦး သေဆုံးခဲ့ပြီး ဆိုက်ကားပေါ်ပါ ခရီးသည် ကျား ၁ ဦး ဒူးကွဲ၊ မ ၁ ဦး ခေါင်းပေါက် ထိခိုက်ဒဏ်ရာ ရရှိခဲ့ပါတယ်။

သေဆုံးသွားသူ ဆိုက်ကားဆရာဟာ မွေးရာပါ ခြေထောက်တဖက် ချို့တဲ့နေလို့ ခြေတုတပ်ထားရသူဖြစ်ပြီး ဆိုက်ကားမှာ ဘက်ထရီ ၆ လုံး၊ မော်တာတပ်ဆင်‌ မောင်းနှင်‌နေတာပါ။

ဆိုက်ကားဆရာ ဦးခေါင်းပြင်းထန်ဒဏ်ရာ ရရှိနေတာကြောင့် လူနာတင်ယာဉ်နဲ့ အနီရောင်အဆင့်သတ်မှတ် ပို့‌ဆောင်ခဲ့ပေမဲ့ ဆေးရုံအရောက်မှာ သေဆုံးသွားတယ်လို့ သိရပြီး အမျိုးသမီးနဲ့ ကလေးငယ်တဦး ကျန်ရစ်ခဲ့တယ်လို့ သိရပါတယ်။

မင်္ဂလာတောင်ညွန့်အခြေစိုက် လူမှုကူညီရေးအသင်းတခုက “ဆိုက်ကားသမားကို တိုက်မိတယ်၊ လဲနေတယ်လို့ ရပ်ကွက်ကပြောလို့ သွားကယ်ဆယ်ခဲ့ပါတယ်။ သူက ခေါင်းနဲ့ ပလက်ဖောင်းနဲ့ ဆောင့်ထားတော့ သွားကတည်းက အနီရောင်အဆင့်ပေါ့။ ဆေးရုံရောက်‌တော့ ကွယ်လွန်သွားပါပြီ။ မွေးရာပါ ခြေမသန်ဘူး၊ ခြေတဖက် အတိုပေါ့။ ခြေထောက်အတုနဲ့ ဘက်ထရီနဲ့သွားတဲ့ ဆိုက်ကားပါ။ ကျန် ၂ ဦးက ပါဆင်ဂျာတွေ၊ သူ့ဆိုက်ကား စီးနေကျတွေ။ ဒူးကွဲ ခေါင်းပေါက်လောက်ပါပဲ။ ဆိုက်ကားက ဘက်ထရီတုံး ၆ တုံးကို ‌ဖြုတ်ပြီးတော့ သူ့ရဲ့အမျိုးသမီးကို ပေးခဲ့ပါတယ်။ အမျိုးသမီးနဲ့ ကလေးတယောက် ကျန်ခဲ့တယ်” လို့ ‌ပြောပါတယ်။

အဲ့ဒီည ၁၀ နာရီကျော်က ခရီးသည်ပို့ဆောင်ပေးနေရင်း ကားကဝင်တိုက်ခဲ့တာလို့ သိရပြီး ကားက မောင်းပြေးသွားတာကြောင့် မင်္ဂလာတောင်ညွန့်မြို့မရဲစခန်းက စုံစမ်းစစ်ဆေးနေတယ်လို့ သိရပါတယ်။