ရန်ကုန်၊ မင်္ဂလာဒုံမြို့နယ်ရှိ မင်္ဂလာဒုံလေတပ်စခန်းဌာနချုပ်ကို ဧပြီ ၆ ရက် ည ၉ နာရီကျော်က စတင်ကာ ရှော့ခ်တိုက်ဒုံးနဲ့ ပစ်ခံရလို့   ထိခိုက်ဒဏ်ရာရသူတွေရှိတယ်လို့ စစ်တပ်နဲ့ နီးစပ်သူတွေဆီက သိရပါတယ်။

မနေ့ည ကိုးနာရီကျော်က မင်္ဂလာဒုံလေတပ်စခန်းဌာနချုပ်ကို မြို့ပြပျောက်ကျားတပ်ဖွဲ့ဝင်တွေက ရှော့ခ်တိုက်ဒုံးနဲ့ဆက်တိုက် ငါးကြိမ်ပစ်ခဲ့ရာ စစ်ကောင်စီတပ်ဖွဲ့ဝင်တချို့ ထိခိုက်ဒဏ်ရာရရှိခဲ့တာလို့ စစ်တပ်နဲ့နီးစပ်သူတစ်ဦးက ဒီဗွီဘီကိုပြောပါတယ်။

“ဆက်တိုက်ဆိုပေမဲ့ တစ်လုံးနဲ့တစ်လုံး ဆယ်မိနစ် ဆယ်ငါးမိနစ်လောက်ကြာတယ်။ ရှော့ခ်တိုက်ဒုံးနဲ့ပစ်တဲ့အချိန် ပြေးထွက်လာတဲ့ ရဲဘော်တွေထိတာရှိတယ်။ ပထမ မေးတုန်းက လေဆိပ်ဆိုပြီးပြောတာ။ နောက်မှ လေတပ်အပစ်ခံရ ဒဏ်ရာရတဲ့သူတွေရှိလို့ အကုန်ပိတ်စစ်တာ။”

မင်္ဂလာဒုံလေတပ်စခန်းဌာနချုပ် ရှော့တိုက်ဒုံးနဲ့ပစ်ခတ်ခံရပြီးနောက် ခရေပင်လမ်းခွဲ၊ ထောက်ကြန့်လမ်းဆုံ၊ အမှတ် ၃ လမ်းဆုံနဲ့ ခြောက်ကွေ့စတဲ့နေရာတွေမှာ စစ်ဆေးမှုတွေ ပိုမိုလုပ်ဆောင်ခဲ့တယ်လို့ ကုန်ကားမောင်းသူတစ်ဦးက ဒီဗွီဘီကို ပြောပါတယ်။

“ခြောက်ကွေ့နားရောက်တော့ အုန်းခနဲ အသံစကြားတာ။ မိုးခြိမ်းတယ်ထင်တာ အဲဒီအချိန် မီးကလည်းပျက်နေတယ်။ နောက်ဆယ်မိနစ်လောက်နေတော့ ထပ်ကြားတယ်။ ဆက်တိုက် ဆိုသလိုပဲ ခရေပင်လမ်းခွဲရောက်တော့ ကားသမားတွေကို အကုန်စစ်တာ စစ်တပ်က”လို့ ပြောပါတယ်။

ရှောတိုက်ဒုံးနဲ့ ပစ်ခတ်မှုကြောင့် ဒုတပ်ကြပ်တစ်ယောက်နဲ့ တပ်သားတစ်ယောက် ထိခိုက်ဒဏ်ရာရပြီး မင်္ဂလာဒုံစစ်ဆေးရုံမှာ ဆေးကုသမှုခံယူနေတယ်လို့ လေတပ်နဲ့နီးစပ်သူတစ်ဦးက ဒီဗွီဘီ ကိုပြောပါတယ်။

“ရှက်ဖို့လည်းကောင်းတယ်။ လေတပ်စခန်းက PDF တွေရဲ့ ဒုံးလေကျင့်ရေးကွင်းလို ဖြစ်နေပြီ။ ခဏခဏဆိုတော့ ဂိတ်စောင့်တွေလည်း လန့်နေကြတယ်။ ညက နှစ်ဦးဒဏ်ရာရတယ်”လို့ ပြောပါတယ်။

ဒီနေ့ မနက်မှာတော့ လေတပ်အနီးပတ်ဝန်းကျင်၊ လေဆိပ်နဲ့ ခရေပင်လမ်းခွဲမှာ စစ်ကောင်စီတပ်နဲ့ ရဲတွေ လမ်းသွားလမ်းလာ၊ ကားနဲ့ ဆိုင်ကယ်တွေကို စစ်ဆေးနေတယ်လို့ မြို့ခံတွေဆီက သိရပါတယ်။

အဆိုပါ ပစ်ခတ်တိုက်ခိုက်မှုနဲ့ ပတ်သက်ပြီး စစ်ကောင်စီဘက်ကတော့ သတင်းထုတ်ပြန်တာ မရှိသေးပါဘူး။

ရန်ကုန်တိုင်း၊ မင်္ဂလာဒုံမြို့နယ်ရှိ စစ်ကောင်စီလေတပ်စခန်းကို ဧပြီ ၆ ရက်ညမှာ မြို့ပြပြောက်ကျားတပ်ဖွဲ့က လက်နက်ကြီးရှော့ခ်တိုက်ဒုံးတွေ၊ စက်သေနတ်တွေနဲ့ ပစ်ခတ်ခဲ့တယ်လို့ ဒေသခံပြည်သူတွေရဲ့ပြောကြားချက်အရ သိရပါတယ်။

ဧပြီ ၆ရက် ည ၉ နာရီ ၁၀ မိနစ်လောက်မှာ  ပေါက်ကွဲသံတွေစကြားရပြီးနောက် မိနစ်ပိုင်းခြားပြီး ပေါက်ကွဲသံတွေ ဆက်တိုက်ကြားခဲ့ရသလို  အပြန်လှန် သေနတ်ပစ်ခတ်သံတွေ ကြားရတယ်လို့ ဒေသခံတစ်ဦးက ပြောပါတယ်။

"လေဆိပ်နဲ့ ဂိတ်အဝင်ဝ ရှော့ခ်တိုက်ဒုံးနဲ့ကျတယ်လို့သိရတယ်။ ကျနော်တို့အိမ်ဆိုတုန်ပါတုန်တယ်။ အထိအခိုက်များမယ်၊ လေယာဥ်ပြေးလမ်းတလျှောက် မီးတွေချည်းပါပဲ။ ပေါက်ကွဲပြီးမကြာဘူး သေနတ်သံတွေကြားရတာပဲ။ အချက် ၅၀ ကျော်မယ်၊ ဒီမှာက မီးလည်း ပျက်နေတော့ထင်းနေရောလေ။ လူနာတင်ကားတွေအများကြီးလာတယ်။ တပ်တွင်းကိုအဝင်မခံဘူး ၊ သတင်းဖုံးဖို့လုပ်နေကြတယ်။ တပ်ထဲမှာလည်း ထွက်မကြည့်ဖို့ ဖိအားပေးနေကြတယ်လို့ သိရပါတယ်။”

အခင်းဖြစ်ပွားရာနေရာကို ​မှော်ဘီ၊ တိုက်ကြီးနဲ့ ထောက်ကြံ့ နှစ်ဖက်စလုံးကနေ စစ်ကောင်စီတပ်တွေ အင်အားအလုံးအရင်းနဲ့ တက်လာကြောင်းလည်း သိရပါတယ်။ 

အဆိုပါတိုက်ခိုက်မှုကို ဘယ်အဖွဲ့က လုပ်ဆောင်တယ်ဆိုတာတော့ လတ်တလော ထုတ်ပြန်ကြေညာတာ မရှိသေးပါဘူး။  စစ်ကောင်စီ လေတပ်ဝင်းထဲမှာတော့ လေယာဉ်ဆီသိုလောင်ကန်တချို့အပါအဝင် အထိအခိုက်အပျက်အစီးတွေများနေပြီး တပ်တွင်းနေမိသားစုတွေလည်း ကြောက်လန့်နေပေမဲ့ တပ်တွင်းအကြီးပိုင်းတွေက ဖိအားပေးနေတယ်လို့သိရပါတယ်။

လက်ရှိမှာတော့ စစ်ကောင်စီအနေနဲ့ လူနာတင်ယာဥ်တွေကို တပ်တွင်းအဝင်မခံဘဲ တပ်ရင်းဆေးခန်းမှာ ဒဏ်ရာရသူတွေကို ကုသပေးဖို့ ကြိုးစားနေတယ်လို့ ဒေသခံက ပြောပါတယ်။

စစ်ကောင်စီတပ်တွေက တိုင်းရင်းသားဒေသတွေအပါအဝင် မြန်မာပြည်အလယ်ပိုင်းဒေသတွေမှာ နေ့စဉ် လေကြောင်းကနေ ဗုံးကြဲတိုက်ခိုက်နေချိန်မှာ အခုလို စစ်ကောင်စီရဲဲ့လေတပ်စခန်းတခု တိုက်ခိုက်ခံရတာဖြစ်ပြီး ဒီတိုက်ခိုက်မှုနဲ့ ပတ်သက်လို့ စစ်ကောင်စီပြန်ကြားရေးဘက်ကတော့ သတင်းထုတ်ပြန်တာမတွေ့ရသေးပါဘူး။

ပြီးခဲ့တဲ့ ၂၀၂၁ ခုနှစ် နိုဝင်ဘာ ၂၁ ရက်ကလည်း အလားတူဖြစ်စဥ်မျိုး မင်္ဂလာဒုံလေတပ်စခန်း ဝန်ထမ်းအိမ်ရာမှာဖြစ်ပွားခဲ့ပြီး ဝန်ထမ်း ၇ ဦးသေဆုံးကာ ၇ ဦး ဒဏ်ရာရရှိခဲ့ပါသေးတယ်။

Photo Credit

ရန်ကုန်၊ မင်္ဂလာဒုံမြို့နယ်ရှိ မင်္ဂလာဒုံလေတပ်စခန်းဌာနချုပ်ကို ဒီဇင်ဘာ ၁၆ ရက် မနေ့ည ၉ နာရီလောက်က ရှော့တိုက်ဒုံးနဲ့ ပစ်ခတ်ခံရပြီးနောက် လုံခြုံရေးတင်းကျပ်ထားတယ်လို့ မြို့ခံတွေဆီက သိရပါတယ်။

မင်္ဂလာဒုံလေတပ်စခန်းဌာနချုပ်ကို မြို့ပြပြောက်ကျားတပ်ဖွဲ့တွေက ၁၀၇ မမ ရှော့တိုက်ဒုံးနဲ့ ပစ်ခတ်တိုက်ခိုက်ခဲ့တာဖြစ်ပြီး  ထိခိုက်ပျက်စီးမှုတချို့ရှိတယ်လို့ လေတပ်စခန်းနဲ့ နီးစပ်သူတဦးက ပြောပါတယ်။

"ဘယ်ကနေပစ်လဲတော့ မသိဘူး။ လေတပ်စခန်းထဲကျပြီး ထိခိုက်မှု တချို့တော့ရှိတယ်။ စစ်သားတွေထိတာလည်းရှိတယ်။ ဒါပေမဲ့ အပြင်ကို အဲ့သတင်းမရောက်အောင်ဖုံးထားတယ်။”

ရှော့တိုက်ဒုံးနဲ့ပစ်ခတ်လို့ လေတပ်စခန်းမှ စစ်ကောင်စီတပ်သားသုံးဦး ဒဏ်ရာရရှိခဲ့ပြီး မင်္ဂလာဒုံစစ်ဆေးရုံကို ပို့ဆောင်ကုသထားတယ်လို့ စစ်တပ်နဲ့နီးစပ်သူတွေဆီက သိရပေမဲ့ ဒီဗွီဘီအနေနဲ့ သီးခြားအတည်မပြုနိုင်သေးပါဘူး။

မင်္ဂလာဒုံလေတပ်စခန်းဌာနချုပ်ကို ဒီဇင်ဘာ ၁၆ ရက် ည ၈ နာရီ မိနစ် ၄၀ လောက်စပြီး ရှော့တိုက်ဒုံး ၅ လုံးနဲ့  ရန်ကုန်မြို့ပြ ပြောက်ကျား UG တပ်ဖွဲ့က တိုက်ခိုက်ခဲ့တာလို့ သိရပါတယ်။

မနေ့ညက ပစ်ခတ်တိုက်ခိုက်ခံရပြီးနောက် စစ်ကောင်စီတပ်တွေဟာ မင်္ဂလာဒုံ လမ်းမကြီးတလျှောက်နေရာအနှံ့ စစ်တပ်နဲ့ရဲတွေကို ဖြန့်ကြက်ထားပြီး စစ်ဆေးနေတယ်လို့ မြို့ခံတွေဆီက သိရပါတယ်။

ရန်ကုန်က မြို့နယ်အချို့မှာ ဒီဇင်ဘာ ၁ ရက်မှ ၁၆ ရက်အတွင်း ပစ်ခတ်မှုနံ့ ဗုံးပေါက်ကွဲမှု ၁၉ ကြိမ်ဖြစ်ခဲ့ပြီး သေဆုံးသူ ၁ ဦးနဲ့ ၁၆ ဦး ဒဏ်ရာရရှိခဲ့ပါတယ်။