ရန်ကုန်၊ မင်္ဂလာဒုံမြို့နယ်၊ ဇေကမ္ဘာအိမ်ရာဝန်း၊ ဇေကမ္ဘာ ၅ လမ်းမှာ ဧပြီ ၆ ရက် ညနေမှာ တက္ကစီကို လူ ၄ ဦးက အုပ်စုဖွဲ့လုယက်ပြီး ယာဉ်မောင်းအား အုတ်ခဲနဲ့ ထုသွားတယ်လို့ မြို့ခံတွေက ပြောပါတယ်။
ဧပြီ ၆ ရက် ညနေ ၄ နာရီလောက်က ဇေကမ္ဘာ ၅ လမ်းထဲမှာ အသက် ၆၅ နှစ်အရွယ် အမျိုးသားတဦး လဲကျနေတာကြောင့် လူမှုကယ်ဆယ်ရေးအသင်းတွေကို အကြောင်းကြားခဲ့ရာက လူနာကို မြောက်ဥက္ကလာပ မေဓာဝီဆေးရုံ ပို့ဆောင်ပေးခဲ့တယ်လို့ ဆိုပါတယ်။
အဆိုပါ အမျိုးသားရဲ့ မျက်နှာ၊ နဖူးမှာ သွေးထွက်ဖူးရောင်ဒဏ်ရာ၊ ပွန်းပဲ့ဒဏ်ရာတွေ ရရှိနေပြီး နစ်ဆန်အေဒီဗန် ခဲရောင်တက္ကစီကားကို လုယက်သူတွေက ယူဆောင်သွားတယ်လို့ သိရပါတယ်။
“အရှေ့က ယာဉ်မောင်းကို ကြိုးနဲ့သိုင်းပြီး အုတ်နီခဲနဲ့ထုပြီးတော့ ကားကိုလုသွားတာ။ မျက်နှာတခုလုံး ဖူးရောင်သွားတယ်၊ မျက်ခုံးကွဲသွားတယ်၊ မေဓာဝီဆေးရုံပို့ထားပါတယ်” လို့ ရန်ကုန်မြို့အခြေစိုက် ကယ်ဆယ်ရေးအသင်းတခုက ပြောပါတယ်။
လုယက်သူတွေထဲမှာ ကုလားဆင်တဦး၊ ဗလတောင့်သူ ၂ ဦးနဲ့ ပိန်ပိန်ပါးပါးတဦး ပါဝင်တယ်လို့ သိရပြီး မတ်လထဲမှာ တက္ကစီလုယက်သူတွေနဲ့ ပုံသဏ္ဌာန်အတူတူပဲလို့ သိရပါတယ်။
လုသွားတဲ့ကားနံပါတ်နဲ့ လိုက်ရှာကြရာ လှိုင်သာယာမှာ ပြန်တွေ့တာကြောင့် လိုက်သွားခဲ့ပေမဲ့ လုယက်သူတွေက မောင်းပြေးသွားတယ်လို့ သိရပါတယ်။
ပြီးခဲ့တဲ့ မတ် ၁၂ ရက်၊ ၂၂ ရက်၊ ၂၈ ရက်တွေကလည်း မင်္ဂလာဒုံ၊ ပုလဲမြို့သစ်မှာပဲ တက္ကစီလုယက်ပြီး ယာဉ်မောင်းကို ဓားမွှမ်း၊ ထိုးကြိတ်လုယက်သွားမှု ၃ ကြိမ်ရှိခဲ့ကာ ဗဟန်းမြို့နယ်မှာ မတ် ၂၃ ရက်က ယာဉ်မောင်းကို ဓားနဲ့ထိုးပြီး ကားလုသွားတာကြောင့် ယာဉ်မောင်းသေဆုံးခဲ့ပါတယ်။
ရန်ကုန်မှာ မတ်လအတွင်း တက္ကစီလုယက်မှု ၄ ကြိမ်နဲ့ ဧပြီ ၆ ရက်မှာ ၁ ကြိမ် စုစုပေါင်း ၅ ကြိမ် ရှိနေပေမဲ့ စစ်ကောင်စီရဲတပ်ဖွဲ့က ဖမ်းဆီးအရေးယူနိုင်ခြင်း မရှိသေးပါဘူး။
ရန်ကုန်တိုင်း၊ မင်္ဂလာဒုံမြို့နယ်၊ ဘိုခြံမှတ်တိုင်အနီးမှာ စစ်ကောင်စီ အိမ်စီးကား Honda Fit အမျိုးအစားနဲ့ လာရောက်ဂိတ်ချနေပြီး ပြည်သူတွေထံက အဓမ္မငွေတောင်းခံနေတဲ့ စစ်ကောင်စီတပ်နဲ့ ရဲ၊ ယာဉ်ထိန်းရဲ ပူးပေါင်းဂိတ်ကို God's Hand Force တပ်ဖွဲ့က ဧပြီ ၆ ရက် မှာ ဖောက်ခွဲတိုက်ခိုက်ခဲ့ပါတယ်။
ဒီနေ့မနက် ၉ နာရီ ၂၅ မိနစ်လောက်မှာ မင်္ဂလာဒုံ ဘိုခြံမှတ်တိုင်အနီး လူနေအိမ်ခြေ ကျဲပါးတဲ့နေရာမှာ လမ်းသွားလမ်းလာ လုံခြုံရေးလို့ အကြောင်းပြပြီး ဓားပြဆန်ဆန် တောင်းခံနေတဲ့ စစ်ကောင်စီနဲ့ ပူးပေါင်းတပ်ဖွဲ့တွေကို ဖောက်ခွဲတိုက်ခိုက်ခဲ့တာဖြစ်ပြီး စစ်သားတယောက် မှောက်ရက်လဲကျခဲ့တယ်လို့ GHF တာဝန်ခံ ဆရာကျောင်းက ဒီဗွီဘီကို ပြောပါတယ်။
“အဲ့နေရာက လူနေအိမ်ခြေ နည်းတာကြောင့် ပြည်သူတွေကို မထိခိုက်ဖို့ ထွေထွေထူးထူး မပြင်ဆင်လိုက်ရဘူး။ ဒီကောင်တွေ ဓားပြလိုမျိုး ပိုက်ဆံတောင်းပြီး ရစ်နေတဲ့ဂိတ်ပါ။ အိမ်စီးကားနဲ့ မနက်လာတယ်၊ ညနေပြန်တယ်၊ အဲ့ပုံစံမျိုး။ စစ်သားတယောက်ကတော့ နေရာမှာ မှောက်ရက်ပဲ၊ နောက်ဆက်တွဲ မသိရသေးဘူး။”
တိုက်ခိုက်မှုအပြီးမှာ God's Hand Force တပ်ဖွဲ့ဝင်တွေ အောင်မြင်စွာဆုတ်ခွာနိုင်ခဲ့ကာ အခုစစ်ဆင်ရေးက Yangon UG Association (YUA) ရဲ့ အသက်လျော်ကြေး စစ်ဆင်ရေးရဲ့ တစိတ်တဒေသဖြစ်တယ်လို့ ဆိုပါတယ်။
စစ်ကောင်စီကျင်းပတဲ့ ပွဲတွေ၊ အခမ်းအနားတွေမှာ မပါဝင်ကြဖို့နဲ့ စစ်ကောင်စီနဲ့ ပတ်သက်ရာ ဌာနတွေနဲ့ ဝေးဝေးနေကြဖို့ မေတ္တာရပ်ခံထားကာ ပြီးခဲ့တဲ့ ဧပြီ ၁ ရက်ကလည်း မင်္ဂလာဒုံကားဝင်းနားက စစ်ကောင်စီနဲ့ ရဲတပ်ဖွဲ့ ပူးပေါင်းဂိတ်ကို ဗုံးခွဲတိုက်ခိုက်ခဲ့ကာ ရဲနှစ်ဦး ပြင်းထန်ဒဏ်ရာ ရရှိခဲ့ပါတယ်။
