စစ်ကိုင်းတိုင်း မြောင်မြို့မှာ မေ ၂၂ ရက် မွန်းလွဲပိုင်းက အပြစ်မဲ့ လူငယ်တယောက်ကို PDF နဲ့ ဆက်စပ်တယ်စွပ်စွဲပြီး စစ်ကောင်စီတပ်ဖွဲ့တွေက မတရားဖမ်းဆီးသွားတယ်လို့ ဒေသခံတွေက ပြောပါတယ်။
မြောင်မြို့ မြောက်ရပ်ကွက်မှာ မေ ၂၂ ရက် မွန်းလွဲ ၁ နာရီခွဲလောက်မှာ စစ်ကောင်စီတပ်ဖွဲ့တွေဟာ ရွှေဘုံသာကျေးရွာက ကိုစိုင်းညီညီရဲ့ လက်ကိုင်ဖုန်းကို သိမ်းပြီး PDF နဲ့ဆက်စပ်တယ်စွပ်စွဲကာ မတရားဖမ်းဆီးသွားကြတာလို့ ရွှေဘုံသာကျေးရွာ ဒေသခံတယောက်က ပြောပါတယ်။
“သူက ရွာမှာပဲ ရိုးရိုးသားသားတောင်သူ လုပ်ငန်းလုပ်ကိုင်တဲ့ လူငယ်တယောက်ပါ။ ရွာဘက် တွေမှာလည်း စစ်ကောင်စီက စစ်ကြောင်းထိုးပြီး ရွာတွေကို မီးရှို့ဖျက်ဆီးနေကြတယ်။ စားနပ်ရိက္ခာတွေ ပြတ်လပ်လို့ မြို့ပေါ်ကို စျေးသွားဝယ်တဲ့အချိန်မှာ စစ်(...)တွေက မတရားဖမ်းဆီးသွားကြတာ။”
ကိုစိုင်းညီညီအား မြောင်မြို့မရဲစခန်းကို ဖမ်းဆီးခေါ်ဆောင်သွားကြပြီး မိသားစုဝင်တွေကိုလည်း လုံးဝတွေခွင့် မပြုသေးသလို အစားအသောက်၊ အဝတ်အထည်နဲ့စောင်တွေလည်း ပို့ခွင့်မ ရဘူးလို့ ဆိုပါတယ်။
မြောင်မြို့နယ်အတွင်းမှာ စစ်ကောင်စီတပ်သားတွေဟာ အပြစ်မဲ့ပြည်သူတွေကို PDF အဖွဲ့ဝင်၊ PDF နဲ့ ဆက်စပ်သူ၊ PDF တွေကို ထောက်ပံ့သူ၊ ဖေ့စ်ဘွတ်ခ်လူမှုကွန်ရက်မှာ မမှန်သတင်း ရေးသားဖြစ်ဝေသူလို့ နည်းအမျိုးမျိုး နဲ့ စွပ်စွဲပြီး မတရားဖမ်းဆီးတာတွေ ဆက်တိုက်လုပ်နေတယ်လို့ ဒေသခံတွေက ပြောပါတယ်။
ဧပြီလ ၂၆ ရက်နေ့ ခင်ဦးမြို့ အောင်မဂ်လာရပ်ကွက် အောင်ဘုံကျောင်းတိုက်ကို ရဲနဲ့စစ်သားတွေက. နေ့လယ် ၂နာရီဝန်းကျင်မှာ ဝင်စီးပြီး ဒုလဘ္ဘ ဝတ်နေတဲ့ ကိုယ်တော် ၁ ပါးကို မတရားဖမ်းဆီးသွားတယ်လို့ သိရပါတယ်။
ရဲတွေစစ်သားတွေလာနေပြီလို့ ကြားတာနဲ့ ဘုန်းကြီးကျောင်းထဲကသူတွေ လွတ်ရာပြေးကြရာ ကိုရင်အချို့မှာ ကျန်ခဲ့တာကြောင့် အဲ့ဒီ့ကိုရင်တွေကို တစ်နာရီကြာအောင် တစ်ယောက်ချင်းစစ်မေးခဲ့ကြတယ်လို့ သိရပါတယ်။
အဖမ်းခံလိုက်ရတဲ့ ဒုလဘ္ဘကိုယ်တော်ဟာ လူနာမည် ကိုဝေယံမင်းဖြစ်ပြီး အသက် နှစ်ဆယ်သာ ရှိပါသေးတယ်။
"သူဟာ ဆန္ဒပြ သပိတ်ထွက်ရာမှာလည်း လိုက်ဖူးသူမဟုတ်ပါဘူး။ ဘာအကြောင်းကြောင့် ဖမ်းသွားတယ်ဆိုတာ မသိရဘူး'' လို့ ဒေသခံ ၁ ဦးက ပြောပါတယ်။
ခင်ဦးမြို့ပေါ်မှာ မတ် ၂၅ ရက်နေ့ကနေ ဒီကနေ့အထိ ရွှေဘိုထောင်ထဲ ရောက်သွားပြီး ပြန်မလွတ်သေးတာ ၂၈ ယောက်အထိ ရှိသွားပြီလည်း ဖြစ်ပါတယ်။
