ချင်းပြည်နယ်၊ မတူပီမြို့အနီး မေလ ၁၂ ရက် မနက်က အင်အားရစ်ချ် တာစကေး ၄ ဒသမ ၆ ရှိ အင်အားအနည်းငယ်ရှိတဲ့ မြေငလျင်တခုလှုပ်ခတ်သွားတယ်လို့ မိုးဇလဌာနက ထုတ်ပြန်ပါတယ်။
မြန်မာစံတော်ချိန် ဒီနေ့မနက် ၃ နာရီ၊ ၁၄ မိနစ်၊ ၅၅ စက္ကန့် အချိန်က ဟားခါးမြေငလျင်စခန်းမှ အနောက်တောင်ဘက် ၇၃ မိုင်ခန့်အကွာ၊ မြန်မာနိုင်ငံ ပြည်တွင်း မတူပီမြို့ရဲ့ အနောက်-အနောက်မြောက်ဘက် ၂၁ မိုင်ခန့်အကွာ မြောက်လတ္တီတွဒ် ၂၁ ဒသမ ၆၇ ဒီဂရီ၊ အရှေ့လောင်ဂျီတွဒ် ၉၃ ဒသမ ၁၂ ဒီဂရီ၊ အနက် ၇၁ ကီလိုမီတာကို ဗဟိုပြုပြီး မြေငလျင် လှုပ်ရှား သွားတာလို့ ဆိုပါတယ်။
အဆိုပါ မြေငလျင်ကြောင့် ထိခိုက် ပျက်စီးမှု အခြေအနေ သတင်းတွေကတော့ မကြားသိရသေးပါဘူး။
ချင်းပြည်နယ်၊ မတူပီမြို့နယ်မှာ မတ် ၂၄ ရက်က ရိက္ခာလာပို့တဲ့ စစ်ကောင်စီစစ်ကြောင်း တိုက်ခိုက်ခံရပြီး ၁၃ ယောက် သေဆုံးကာ ၇ ယောက် ဒဏ်ရာရခဲ့ပြီး CDF ရဲဘော် ၁ ယောက် ဒဏ်ရာရခဲ့တယ်လို့ CDF-မတူပီကနေ သိရပါတယ်။
ထယ်ဘွေးစခန်းကို ရိက္ခာလာဖြည့်တဲ့ စစ်ကောင်စီစစ်ကြောင်းကို အဲဒီနေ့ မနက်ပိုင်းက မတူပီ-ပလက်ဝလမ်း မိုင်တိုင်အမှတ် ၁၄ နဲ့ ၁၅ ကြားမှာ CNAနဲ့ ပူးပေါင်းကာ မိုင်းဆွဲ တိုက်ခိုက်ခဲ့ လို့ ၇ ယောက် သေဆုံးခဲ့တယ်လို့ CDF-မတူပီရဲ့ ပြန်ကြားရေးတာဝန်ခံ ဆလိုင်းချင်းက ပြောပါတယ်။
ဒါ့အပြင် မတူပီ-ပလက်ဝ ကားလမ်းပေါ်မှာ တိုက်ပွဲ ၃ ကြိမ်ဖြစ်ပွားရာမှာ စစ်တပ်က ၆ ယောက် သေဆုံးကာ ၇ ယောက် ဒဏ်ရာ ရရှိပြီး CDF ရဲဘော် တယောက် ဒဏ်ရာ ရရှိခဲ့လို့ ပြန်လည် ဆုတ်ခွာခဲ့ကြတယ်လို့ ဆိုပါတယ်။
မတူပီ-ပလက်ဝလမ်း ဝါပုန်းလမ်းခွဲနားမှာ စစ်တပ်က နင်းမိုင်းတွေ ထောင်ထားတာကြောင့် ပြည်သူတွေအနေနဲ့ CDF-မတူပီက မိုင်းရှင်းပြီးမှသာ ဖြတ်သန်းသွားလာကြဖို့ သတိပေးထားပါတယ်။
မတူပီမြို့နယ်မှာ မတ် ၂၂ မနက်ပိုင်းမှာလည်း ရိက္ခာတွေလာပို့တဲ့ စစ်ကောင်စီစစ်ကြောင်း တိုက်ခိုက်ခံရပြီး ၆ ယောက်သေဆုံးကာ အများအပြား ဒဏ်ရာရရှိခဲ့တယ်လို့ CDF-မတူပီက သိရပါတယ်။
အဆိုပါတိုက်ပါတိုက်ပွဲတွေနဲ့ ပတ်သက်ပြီး စစ်ကောင်စီက သတင်းထုတ်ပြန်တာမရှိသေးသလို ထိခိုက်သေဆုံးမှုတွေနဲ့ ပတ်သက်ပြီး သီးခြားအတည်ပြုနိုင်ခြင်းတော့ မရှိပါဘူး။
