ကျန်းမာရေးဝန်ထမ်းတွေ လုံ​လောက်မှု မရှိတာကြောင့် မိမိတတ်နိုင်တဲ့ဘက်ကနေ တော်လှန်ရေးမှာ ပါဝင်ဆင်နွှဲလိုတဲ့  ကျန်းမာရေးဝန်ထမ်းတွေကို မတူပီ CDF က ဖိတ်ခေါ်နေပါ တယ်။

လတ်တလောမှာတော့ စစ်ကောင်စီက ပြည်သူ့အာဏာမတရား သိမ်းပိုက်ပြီးနောက် လက်နက်ကိုင် တော်လှန်ရေး တိုက်ပွဲဝင်နေကြတဲ့ မတူပီ CDF မှာ ကျန်းမာရေး ဝန်ထမ်းတွေ လုံ​လောက်မှု မရှိတာကြောင့် တိုင်းပြည်နဲ့ လူမျိုးအတွက် တိုက်ပွဲဝင် ရဲဘော်တွေရဲ့ ကျန်းမာရေးဆိုင်ရာ စောင့်ရှောက်မှု အကူအညီတွေ အထူးလိုအပ်နေတယ်လို့ ဆိုပါတယ်။

တာဝန်ထမ်းဆောင်လိုတဲ့ ကျန်းမာရေးဝန်ထမ်းတွေအနေနဲ့ မတူပီ CDF ဌာနချုပ် (Camp Zion) မှာ အချိန်ပြည့် တာဝန်ထမ်းဆောင်နိုင်သူ ဖြစ်ရမှာဖြစ်ပြီး မိသားစုရှိပါက စားဝတ်နေရေး တာဝန်ယူစီစဉ်ပေးမှာဖြစ်ကာ ပြည်တွင်း/ပြည်ပကနေ ရောက်လာပါကလည်း ခရီးစရိတ် တာဝန်ယူဆောင်ရွက်ပေးမယ်လို့ ထုတ်ပြန်ချက်မှာ ဖော်ပြပါတယ်။

ချင်းပြည်နယ်ကတော့ မြန်မာ့နွေဦးတော်လှန်ရေးမှာ တူမီးသေနတ်တွေ စွဲကိုင်ပြီးတော့ ရှေ့တန်းကနေ စစ်အာဏာရှင်ကို တစိုက်မတ်မတ် ဆန့်ကျင်တိုက်ခိုက်ခဲ့တဲ့ ပြည်နယ်ဖြစ်ပြီး လက်ရှိအချိန်တိုင်အောင် နယ်မြေစိုးမိုးအုပ်ချုပ်ခွင့်ကို ရယူထားနိုင်တဲ့ ဒေသတခုဖြစ်ပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပါတယ်။

စစ်တပ်အာဏာသိမ်းပြီးနောက် နိုင်ငံရေးမတည်ငြိမ်မှုတွေနဲ့အတူ စီးပွားရေး၊ လူမှုရေး၊ ကျန်းမာရေး၊ ပညာရေးကဏ္ဍတွေ အသီးသီးမှာ အဘက်ဘက်က ကျဆင်းနေခဲ့တာ ဖြစ်ပါတယ်။

ဒါ့အပြင် နွေဦးတော်လှန်ရေးမှာ ရှေ့တန်းကပါဝင်နေတဲ့ ဆေးလောကသားတွေကို မတရား ဖမ်းဆီးနှိပ်စက် သတ်ဖြတ်တာတွေကိုလည်း စစ်ကောင်စီက ကျူးလွန်နေပြီး စစ်အာဏာစသိမ်းတဲ့ အချိန်ကစပြီး ကျန်းမာရေးလုပ်သား အယောက် ၃၀ ကျော် သတ်ဖြတ်ခံခဲ့ရကာ ၆၀၀ ကျော်ကတော့ ဖမ်းဝရမ်းထုတ်ခံရလို့ တိမ်းရှောင်နေကြရတယ်လို့ မြန်မာနိုင်ငံလူ့အခွင့်အရေး မှတ်တမ်းကွန်ရက် က ထုတ်ပြန်ထားပါတယ်။

လတ်တလော မတူပီ CDF မှာ တာဝန်ထမ်းဆောင်လိုကြတဲ့ ကျန်းမာရေးဝန်ထမ်းတွေအနေနဲ့ Chinland Defense Force-Matupi ဖေ့စ်ဘွတ်ခ်စာမျက်နှာကတဆင့် တိုက်ရိုက် ဆက်သွယ်မေးမြန်းနိုင်သလို ဖုန်းနံပါတ် +919362298491 ကိုလည်း ဆက်သွယ်နိုင်မှာ ဖြစ်ပါတယ်။

ချင်းပြည်နယ် မတူပီမြို့နယ်မှာ ဖေဖော်ဝါရီ ၁၁ ရက်နေ့ မနက်ပိုင်းက စစ်ကောင်စီတပ်နဲ့ မတူပီ CDF တို့ တိုက်ပွဲဖြစ်ပွားပြီး စစ်ကောင်စီဘက်က ၄ ယောက် သေဆုံးကာ အများအပြားဒဏ်ရာရရှိသွားတယ်လို့ မတူပီ CDF က ပြောပါတယ်။

မတူပီ-ပလက်ဝလမ်းပေါ် ထယ်ဘွေးကျေးရွာမှာ အခြေစိုက်ထားတဲ့ စစ်ကောင်စီတပ်စခန်းကို ဖေဖော်ဝါရီမနက် ၁၁ နာရီကျော်လောက်မှာ မတူပီ CDF က ထိုးစစ်ဆင်တိုက်ခိုက်ရာ စစ်ကောင်စီတပ်သား ၄ ယောက်သေဆုံးပြီး အများအပြားဒဏ်ရာရရှိသွားတယ်လို့ မတူပီ CDF ရဲ့ ပြန်ကြားရေးတာဝန်ခံက ပြောပါတယ်။

နှစ်ဘက် တိုက်ပွဲအတွင်းမှာ စစ်ကောင်စီဘက်က လက်နက်ကြီး လက်နက်ငယ်တွေနဲ့ ရမ်းသမ်းပြီးပြန်လည်ပစ်ခတ်ပေမယ့် မတူပီ CDFက ရဲဘော်တွေ အထိခိုက်အကျဆုံးမရှိဘဲ အောင်အောင်မြင်မြင်ဆုတ်ခွာနိုင်ခဲ့တယ်လို့ ဆိုပါတယ်။

မတူပီ-မင်းတပ်လမ်းပေါ်မှာ ဖေဖော်ဝါရီ ၁၁ ရက် မွန်းလွဲ ၁ နာရီကျော်လောက်က နွားနောက်သွားရှာဖွေတဲ့ ခြန်းပြန်းရွာ ဦးလောင်နိုးဟာ စစ်ကောင်စီတပ်တွေ ထောင်ထားတဲ့ မိုင်းနင်းမိပြီး သေဆုံးခဲ့တယ်လို့ ပြောပါတယ်။

ချင်းပြည်နယ် ဖလမ်းမြို့နယ်မှာ ဖေဖော်ဝါရီ ၉ ရက်နေ့ကဖြစ်ပွားခဲ့တဲ့ တိုက်ပွဲမှာ စစ်ကောင်စီဘက်က ၅ ယောက်သေဆုံးပြီး အများအပြားဒဏ်ရာရရှိသွားတယ်လို့ CNO/CNDFက ဖေဖော်ဝါရီ ၁၁ ရက် ရက်စွဲနဲ့ ထုတ်ပြန်ပါတယ်။

ဖလမ်းမြို့နယ်ဘက်ကို ရိက္ခာပို့ဖို့ တက်လာတဲ့ စစ်ကောင်စီယာဥ်တန်း ၂၂ အနက် ရှေ့ပြေးကားတွေကို ပါရ်သဲကျေးရွာနားမှာ CNDF တပ်ဖွဲ့က လက်ဦးမှုရယူပြီး တိုက်ခိုက်ခဲ့တာလို့ CNDF ရဲ့ ပြန်ကြားရေးတာဝန်ခံက ပြောပါတယ်။

နှစ်ဘက် တိုက်ပွဲအတွင်းမှာ စစ်ကောင်စီဘက်က လက်နက်ကြီး လက်နက်ငယ်တွေနဲ့ ရမ်းသမ်းပြီး ပြန်လည်ပစ်ခတ်ပေမယ့် CNDF ရဲဘော်တွေ အထိအခိုက်အကျဆုံးမရှိဘဲ အောင်အောင်မြင်မြင်ဆုတ်ခွာနိုင်ခဲ့တယ်လို့ ဆိုပါတယ်။

CNDF တပ်ဖွဲ့အနေနဲ့ ဖလမ်းမြို့နယ်ထဲမှာ ဇန်နဝါရီလအတွင်း တိုက်ပွဲ ၁၂ ကြိမ်ဖြစ်ပွားခဲ့ပြီး စစ်ကောင်စီတပ်သား ၈၁ ယောက်သေဆုံးကာ ၆၀ ကျော်သေဆုံးပြီး CNDF တပ်ဖွဲ့ဘက်က ရဲဘော်တစ်ယောက်ကျဆုံးကာ ၈ ယောက်ဒဏ်ရာရရှိခဲ့တယ်လို့ သိရပါတယ်။

နှစ်ဘက်တိုက်ပွဲတွေနဲ့ ပတ်သက်လို့တော့ ထိခိုက်သေဆုံးတဲ့ အခြေအနေကိုတော့ စစ်ကောင်စီဘက်က သတင်းထုတ်ပြန်ထားတာ မတွေ့ရသေးပါဘူး။

စစ်ကောင်စီတပ်တွေက ချင်းပြည်နယ်ထဲကို ကုန်တင်ကားတွေ ဝင်ခွင့်မပြုဘဲ ပိတ်ဆို့ထားတာကြောင့် ဆန်၊ ဆီ၊ ဆား၊ ငရုပ်၊ ကြက်သွန် အစရှိတဲ့ စားနပ်ရိက္ခာတွေ ပြတ်တောက်နေသလို ဆေးဝါးတွေလည်း ပြတ်တောက်ကာ ကျန်းမာရေးစောင့်ရှောက်မှု အကူညီလိုအပ်နေတယ်လို့ ဆိုပါတယ်။

ပြည်တွင်း ပြည်ပ အလှူရှင်တွေအနေနဲ့ သက်ဆိုင်ရာ ပရဟိတအဖွဲ့တွေ တော်လှန်ရေးအင်အားစုတွေနဲ့ ချိတ်ဆက်ပြီးတော့ တတ်နိုင်သလောက် လှူဒါန်းပေးကြဖို့ အကူညီတောင်းခံထားပါတယ်။