ဩဂုတ် ၈ ရက် ညပိုင်းက မန္တလေး အိုးဘိုအကျဉ်းထောင်အတွင်း စစ်အာဏာရှင် ဆန့်ကျင်ရေး ကြွေးကြော်သံများထွက်ပေါ်လာပြီး ထောင်အာဏာပိုင်တွေက သေနတ်ပစ်ဖောက် ဖြိုခွဲတာနဲ့ အကျဉ်းထောင်အတွင်း စစ်ကားများဝင်ရောက်သွားတာတွေကြောင့် ဆန္ဒပြခဲ့တဲ့ နိုင်ငံရေး အကျဉ်းသားတွေရဲ့ လုံခြုံရေးကို အထူးစိုးရိမ်ကြောင်း မန္တလေးတက္ကသိုလ် ကျောင်းသားများသမဂ္ဂ ကြေညာ ပါတယ်။
မတရားဖမ်းဆီးခံရတဲ့ နိုင်ငံရေးအကျဉ်းသားတွေကို ချွင်းချက်မရှိလွှတ်ပေးဖို့နဲ့ အကြမ်းဖက် ဖိနှိပ်မှုတွေ ရပ်တန့်ဖို့လည်း မန္တလေးတက္ကသိုလ် ကျောင်းသားများသမဂ္ဂက ဩဂုတ်လ ၉ ရက်မှာ ကြေညာချက်ထုတ်ပြန်တောင်းဆိုလိုက်ပါတယ်။
ဒါ့အပြင် နိုင်ငံရေးအကျဉ်းသားတွေ ကိုဗစ်-၁၉ ရောဂါကူးစက် သေဆုံးတာတွေ ရှိနေတာကြောင့် နိုင်ငံရေးအကျဉ်းသားတွေအတွက် ကိုဗစ်-၁၉ ရောဂါ ကာကွယ်ရေး၊ ကုသရေး အပါအဝင် ဆေးကုသခွင့်ရရှိရေး ဆောင်ရွက်ပေးဖို့ကိုလည်း မန္တလေး တက္ကသိုလ် ကျောင်းသားများ သမဂ္ဂအနေနဲ့ တောင်းဆိုလိုက်ပါတယ်။
မန္တလေး အိုးဘိုအကျဉ်းထောင်အတွင်းကနေ ဩဂုတ်လ ၈ ရက် ည ၉ နာရီလောက်က စစ်အာဏာရှင်ဆန့်ကျင်ရေး ကြွေးကြော်သံတွေ ထွက်ပေါ်လာပြီး မကြာခင်မှာ ထောင်အတွင်းက တရားသံအကျယ်ကြီးဖွင့်တဲ့အသံနဲ့ သေနတ်သံ နှစ်ချက် ထွက်ပေါ်လာတယ်လို့ ထောင်အနီး ပတ်ဝန်းကျင်နေထိုင်သူတွေဆီက သိရပါတယ်။
မန္တလေးမြို့မှာ တကသများသပိတ်စစ်ကြောင်းက မေ ၂၁ ရက် ညနေပိုင်းမှာ ‘ဟွန်း သပိတ်’ ကို ပြန်လည်စတင်ခဲ့ကြပြီး ညနေတိုင်း ဟွန်းပြန်တီးကြဖို့ တိုက်တွန်းခဲ့ပါတယ်။
‘ဟွန်းတီးလို့ တော်လှန် မန္တလေးသားတွေရဲ့ အသံ’၊ ‘ဟွန်းတီးလို့ ပြန်ကြွ မန္တလေးသားတွေရဲ့ဇ’ စတဲ့ ကြွေးကြော်သံတွေနဲ့ ဆိုင်ကယ်/ကား ဟွန်းသပိတ်ကို ပြန်လည်စတင်ခဲ့ကြတာပါ။
မန္တလေး တကသများသပိတ်စစ်ကြောင်းမှ ကျောင်းသားတစ်ဦးက “အာဏာသိမ်းပြီး နွေဦးတော်လှန်ရေးစကတည်းက ဟွန်းသံတညံညံနဲ့ စစ်အာဏာဖီဆန်တဲ့ ကျုပ်တို့မြို့။ ဟွန်းသံနဲ့ ဆိုင်ကယ်အုပ်စုကြီးတွေ အခုထိမေ့ရသေးဘူး။ မန္တလေးနဲ့ ဆိုင်ကယ်၊ ဆိုင်ကယ်နဲ့ မန္တလေး ဆိုတာ ခွဲလို့မရပါဘူး။ လိုင်းပေါ်မှာ ဘာညာပုံတင်တဲ့ စထရိုက်ထက်စာရင် ဇရှိတဲ့ မန္တလေးသားတွေပီပီ ဟွန်းတီးသပိတ် ပြန်လည်ဆင်နွှဲကြမယ်ဗျာ။ ကျုပ်တို့ မန်းသားတွေ ညနေဆည်းဆာချိန် ရုံးပြန်ချိန်တိုင်းမှာ အသံကို နားစွင့်ပါ။ ရဲဘော်တစ်ယောက်က စလိုက်ရင် ကျုပ်တို့ အားလုံးညီကြမယ်ဗျာ။ ညနေဆည်းဆာချိန်တိုင်းမှာ အားလုံးဟွန်းအတူတူတီးလို့ စင်အာဏာကိုဖီဆန်ကြပါစို့” လို့ ပြောပါတယ်။
မန္တလေးမြို့လယ်ကောင် ၇၃ လမ်းပေါ်နဲ့ ၃၅ လမ်းပေါ်မှာ ဆိုင်ကယ်ဟွန်းတီးပြီး လှည့်လည်ဆန္ဒထုတ်ဖော်ခဲ့ကြပါတယ်။
