ဖမ်းဆီးတရာစွဲခံထားရတဲ့ မန္တလေးတိုင်းဒေသကြီးဝန်ကြီးချုပ် ဒေါက်တာဇော်မြင့်မောင်ကို စစ်ကောင်စီတရားရုံးက ဒီဇင်ဘာ ၈ ရက် ဒီကနေ့မှာ ထောင်ဒဏ် ၄ နှစ် အမိန့်ချမှတ်လိုက် ပါတယ်။
ဒေါက်တာဇော်မြင့်မောင်ကို ရာဇသတ်ကြီး ပုဒ်မ ၅၀၅ (ခ) အတွက် ထောင်ဒဏ် ၂ နှစ်နဲ့ သဘာဝဘေးစီမံခန့်ခွဲမှု ဥပဒေ ပုဒ်မ ၂၅ အတွက် ထောင်ဒဏ် ၂ နှစ် ၊ ပုဒ်မ ၃၀ (က) အတွက် ထောင်ဒဏ် ၁ နှစ် တပေါင်းတည်းကျခံဖို့ အမိန့်ချခဲ့တာပါ။
ဒေါက်တာ ဇော်မြင့်မောင်ရဲ့ ရှေ့နေအဖွဲ့ဝင်တယောက်က “ဒေါက်တာဇော်မြင့်မောင်ကို အမိန့်ချတယ်။ ပုဒ်မ ၅၀၅ (ခ) အတွက် ထောင်ဒဏ် ၂ နှစ် က အပြည့်ချတာ ချုပ်ရက် ထုတ်နုတ်ခံစားခွင့်မပြုဘူး။ သဘာဝဘေးအမှုက ပုဒ်မ နှစ်ခု အမိန့်ချတာ ပုဒ်မ ၂၅ အတွက် ထောင်ဒဏ် ၂ နှစ် နဲ့ ပုဒ်မ ၃၀ (က) အတွက် ထောင်ဒဏ် တနှစ် တပေါင်းတည်းဆိုတော့ နှစ်နှစ်ပဲ ကျတာ။ စုစုပေါင်း လေး နှစ်ကျခံရမှာ။” လို့ ပြောာပါတယ်။
အခုလို အမိန့်ချတာနဲ့ ပတ်သက်လို့ ဒေါက်တာဇော်မြင့်မောင်ကတော့ သမိုင်းဝင်နေ့ တနေ့ ဖြစ်တယ်လို့ တုံ့ပြန် ပြောဆိုခဲ့တယ်လို့ သိရပါတယ်။
သွေးကင်ဆာရောဂါ ဝေဒနာခံစားနေရတဲ့ ဝန်ကြီးချုပ် ဒေါက်တာဇော်မြင့်မောင်ကို စစ်ကောင်စီက ဖမ်းဆီးပြီး ရာဇသတ်ကြီးဥပဒေ ပုဒ်မ ၅၀၅ (ခ) ၊ သဘာဝဘေးစီမံခန့်ခွဲရေးဥပဒေ ပုဒ်မ ၂၅ / ၃၀ (က) ၊ အဂတိလိုက်စားမှုတိုက်ဖျက်ရေးဥပဒေ ပုဒ်မ ၅၅ ၊ ရာဇသတ်ကြီး ပုဒ်မ ၁၇၁-စ ၊ ရာဇသတ်ကြီးပုဒ်မ ၁၃၀ (က) တို့နဲ့ တရားစွဲဆိုထားတာ ဖြစ်ပါတယ်။
