မန္တလေးတိုင်းဝန်ကြီးချုပ် ဒေါက်တာဇော်မြင့်မောင်အပေါ်  စစ်ကောင်စီက စွဲဆိုထားတဲ့ အဂတိအမှု ၅ မှုစလုံးအတွက် ဇွန် ၁၇ ရက်မှာ အပြီးသတ်အမိန့်ချဖို့  အိုးဘိုထောင်တွင်း တရားရုံးက ဇွန် ၁၄ ရက်မှာ ဆုံးဖြတ်လိုက်ပါတယ်။

ဒီကနေ့ မန္တလေးအိုးဘိုထောင်တွင်းတရားရုံးမှာ  အမှုနံပတ် ၆၊ ၇၊ ၈ တို့အတွက် နောက်ဆုံးအပြီးသတ်လျှောက်လဲချက်တင်ခဲ့တယ်လို့ တရားရုံးနဲ့နီးစပ်သူတစ်ယောက်က ပြောပါတယ်။

"ဒီနေ့ကအဂတိအမှုနံပတ် ၆၊ ၇၊ ၈ သုံးမှုအတွက် နောက်ဆုံးအပြီးသတ်လျှောက်လဲချက်တင်တယ်။  သောကြာနေ့မှာ အဂတိအမှု ၅ မှုစလုံးအတွက် အမိန့်ချမယ်။ မောင်ဝိတ်လှူတယ်ဆိုတဲ့ အမှုတွေပါတယ်။ သူ့အမှုက ၇ နဲ့ ၈ ။ ၇ က ဒေါ်လာတစ်သိန်းလှူတယ်ဆိုတဲ့အမှုပေါ့။ ၈ က ခရီးစရိတ်ငွေကျပ် ၆၅၀ လှူတဲ့အမှု။ အကုန်လုံးပြီးသွားပြီ။ အပြီးသတ်လျှောက်လဲချက်အ ဆင့်ကိုရောက်နေတာအခုက။ အပြစ်ရှိတယ်မရှိဘူးဆိုတာ ကိုယ်ကပြောရတာပေါ့။ ဒါကြောင့် အပြစ်မပေးသင့်ဘူးပေါ့။ လိုရင်းက ဒါပါပဲ။ အမှု ၆ က ဖွံ့ဖြိုးသစ်ကုမ္ပဏီအမှုဆောင်  အရာရှိချုပ်ဦးရဲမြင့်ရဲ့ တပည့်ကနေ ဘတ်ငွေ ၃ သိန်းပေးတယ်ဆိုပြီးတော့ အဂတိလိုက်စား တယ်ဆိုပြီးစွဲတာ။" 

ဒေါက်တာဇော်မြင့်မောင်ကို မတ် ၈ ရက်က အိုးဘိုထောင်တွင်းတရားရုံးမှာ အဂတိအမှု ၅ မှုအတွက် မန္တလေးတိုင်းဒေသကြီး အဂတိလိုက်စားမှုတိုက်ဖျက်ရေးကော်မရှင် စစ်ဆေးရေးမှူး ဦးစိန်တင်က တရားလိုအဖြစ် စစ်ကောင်စီကိုယ်စား တရားစွဲဆိုခဲ့တာဖြစ်ပါတယ်။

အဓိကတရားလိုပြသက်သေ ဦးမောင်ဝိတ်က ဒေါက်တာဇော်မြင့်မောင် ကျန်းမာရေးမကောင်း တာကြောင့် ငွေကြေးလှူဒါန်းတာသာဖြစ်တဲ့အပြင် သူ့အဖေနဲ့ အဖိုးတို့ဟာ ကင်ဆာကြောင့်ကွယ်လွန်ခဲ့ရတာမို့ လှူတာဖြစ်တယ်လို့ တရားရုံးမှာထွက်ဆိုခဲ့ပြီး ရုံးချိန်းအပြီးမှာ ဒေါက်တာဇော်မြင့်မောင်ကို ဦးမောင်ဝိတ်က ကန်တော့ခဲ့ပါတယ်။ 

ဒေါက်တာဇော်မြင့်မောင်ဟာ နိုင်ငံရေးရာထူးရယူထားချိန်မှာ လာဘ်စားခဲ့တယ်ဆိုပြီး အဂတိလိုက်စားမှုတိုက်ဖျက်ရေးဥပဒေပုဒ်မတွေနဲ့ စစ်ကောင်စီက စွဲချက်တွေတင်ခဲ့တာပါ။

ဒေါက်တာဇော်မြင့်မောင်ကတော့ ဘယ်သူ့ဆီကမှ ဘာမှမယူခဲ့သလို အပြစ်မရှိဘူး ရုံးချိန်းတွေမှာ ထွက်ဆိုခဲ့ပါတယ်။ ဦးမောင်ဝိတ်က အလှူငွေတွေကို ဒီအတိုင်းထားခဲ့တာသာဖြစ်ပြီး သူသွားတဲ့အချိန်တိုင်းမှာဒေါက်တာဇော်မြင့်မောင်ဟာ ကင်ဆာဝေဒနာကြောင့် အိပ်နေတယ်လို့ ထွက်ဆိုထားပါတယ်။

ဒေါက်တာဇော်မြင့်မောင်ဟာ ကင်ဆာဝေဒနာအပြင်းအထန်ခံစားနေရချိန်မှာ မန္တလေးတိုင်း ဝန်ကြီးချုပ်တာဝန်အပြင် ပါတီတာဝန်တွေကို တခြားသူတွေကို ခေတ္တလွှဲအပ်ထားခဲ့ရပါတယ်။ ဒေါက်တာဇော်မြင့်မောင်ကို စစ်ကောင်စီက အမှု ၉ မှုနဲ့ တရားစွဲခဲ့တာဖြစ်ပြီး အဲဒီထဲက သဘာ၀ဘေးပုဒ်မအမှု ၂ ခုအတွက် ၂၀၂၁ ဒီဇင်ဘာ ၈ ရက်က ထောင်ဒဏ် ၄ နှစ် ချမှတ်ခဲ့ပါတယ်။

မန္တလေးတိုင်းဝန်ကြီးချုပ်ဒေါက်တာဇော်မြင့်မောင်ရဲ့ သွေးကင်ဆာရောဂါကို ကုသဖို့ ငွေလှူဒါန်းခဲ့တယ်လို့ ဖေဖော်ဝါရီ ၁၈ ရက် ရုံးချိန်းမှာ ထွက်ဆိုခဲ့တယ်လို့ တရားရုံးနဲ့ နီးစပ်သူတွေက ပြောပါတယ်။

စစ်ကောင်စီက ဒေါက်တာဇော်မြင့်မောင်ကို အဂတိလိုက်စားတယ်ဆိုပြီး စွပ်စွဲထားတဲ့အမှုအတွက် မနေ့က မန္တလေးအိုးဘိုထောင်တွင်းအထူးတရားရုံး ရုံးထုတ်စစ်ဆေးရာမှာ ဦးမောင်ဝိတ်က တရားလိုပြသက်သေအဖြစ် ထွက်ဆိုခဲ့တာ ဖြစ်ပါတယ်။

ဦးမောင်ဝိတ်က ၂၀၁၉ ခုနှစ်မှာ ငွေကျပ် သိန်း ၃၅၀၊ ငွေကျပ်သိန်း ၃၀၀  ထိုင်းနိုင်ငံ၊ ဘန်ရွမ်ဂရက်(စ်)ဆေးရုံမှာ ဒေါက်တာဇော်မြင့်မောင် ဆေးကုသမှု ခံယူတုန်းက အမေရိကန်ဒေါ်လာ တစ်သိန်း၊ စုစုပေါင်း သုံးကြိမ်ခွဲလှူခဲ့‌တယ်လို့ ထွက်ဆိုခဲ့ပါတယ်။

“ဒေါက်တာဇော်မြင့်မောင် ထိုင်းမှာ ဆေးကုနေတုန်းက သူ ၃ ခါ သွားတယ်။ ဒါပေမဲ့ ဒေါက်တာဇော်မြင့်မောင်က အိပ်နေလို ခုံပေါ်မှာ တင်ခဲ့တယ်။ မန္တလေးမှာလည်း အဲဒီလိုပဲ သွားခဲ့တယ်။ အိပ်နေလို့ ဆိုပြီး ထားခဲ့တယ်လို့ ပြောတယ်။ သူလှူတဲ့ငွေကို ခုံပေါ်ဒီအတိုင်းပဲ ထားခဲ့တယ်တဲ့။ စကားပြောခွင့်မရခဲ့ဘူး။ သိတောင်မသိခဲ့ဘူးလို့ မောင်ဝိတ်က ထွက်ဆိုသွားတာပါ။ မြန်မာနောင်းမှာ ပါသလိုမျိုး ငွေပေးခဲ့တယ်လို့ မပြောခဲ့ဘူး။ ပေးတာမဟုတ်ဘူး။ လှူတာလို့ ပြောတာကြောင့် စကားလုံးကိုတောင် စာရိုက်တဲ့အခါ ပြန်ပြင်ရတယ်။ တရားသူကြီးကလည်း ပြင်ပေးတယ်။ အသုံးအနှုန်းကိုလေ။ ငွေလှူတယ်လို့ပေါ့။ ကန်တော့တာ ဟုတ်တယ်။ ကန်တော့တာကြောင့် ဆုပေးတာတောင် ကျနော်တို့ ကြားပါတယ်။ ကန်တော့တာကို လက်မခံဘူးဆိုတာ မဟုတ်ဘူး။ စစ်ဆေးဖို့ တရားရုံးထဲ မဝင်ခင်က ဒေါက်ဇော်နဲ့ မောင်ဝိတ် ဆုံတဲ့အခါ လှမ်းပြီးတော့ ဆရာ နေကောင်းရဲ့လား မေးတယ်။ သတင်းမေးတာပေါ့။ ပြီးတော့မှ အမှန်အတိုင်း ပြောပါ ရတယ်လို့ ပြောတယ်။ မောင်ဝိတ်က မုတ်ဆိတ်တွေနဲ့။ ဝတ်တာကတော့ ယောဂီရောင် ဝတ်ထားတယ်”လို့ တရားရုံးနဲ့ နီးစပ်သူတစ်ယောက်က ပြောပါတယ်။

စီးပွားရေးလုပ်ငန်းရှင် ဦးမောင်ဝိတ်ကို စစ်ကောင်စီက အာဏာစသိမ်းတဲ့ ဖေဖော်ဝါရီလကတည်းက ဖမ်းဆီးထိန်းသိမ်းထားတာပါ။ 

မန္တလေးတိုင်းဝန်ကြီးချုပ် ဒေါက်တာဇော်မြင့်မောင်ကို စစ်ကောင်စီကအမှု ၉ မှုနဲ့ တရားစွဲခဲ့တာဖြစ်ပြီး အဲဒီထဲက သဘာ၀ဘေးပုဒ်မအမှု ၂ ခုအတွက် ၂၀၂၁ ဒီဇင်ဘာ ၈ ရက်က ထောင်ဒဏ် ၄ နှစ် ချမှတ်ခဲ့ပါတယ်။

အဂတိလိုက်စားတယ်ဆိုပြီး စစ်ကောင်စီက စွဲဆိုထားတဲ့အမှုတွေကိုတော့ သောကြာနေ့တိုင်းပုံမှန်စစ်ဆေးခဲ့ပြီး နောက်ထပ်ရက်သတ္တပတ်တွေမှာတော့ အင်္ဂါနေ့တွေမှာပါ ထပ်တိုးစစ်ဆေးသွားဖို့ရှိနေပါတယ်။