ဝက်စ်ဟမ်းကို အနိုင်ရတဲ့ပွဲမှာ မန်ချက်စတာယူနိုက်တက်အသင်းသားတွေရဲ့ စည်းလုံးညီညွတ်မှုကို နည်းပြတန်ဟတ်ဂ်က ချီးကျူးပြောကြားလိုက်ပါတယ်။
မန်ယူအသင်းဟာ ဝက်စ်ဟမ်းကို တိုက်စစ်မှူး ရက်ရှ်ဖို့ဒ်ရဲ့ ပရီးမီးယားလိဂ်ဂိုး ၁၀၀ မြောက် သွင်းဂိုးနဲ့ အနိုင်ရခဲ့ပေမဲ့ ပွဲပြီးဆုံးချိန်အထိ အကြိတ်အနယ် ယှဉ်ပြိုင်ခဲ့ရတာပါ။
ဂိုးသမား ဒေးဗစ်ဒီဂီယာရဲ့ လက်စွမ်းပြခဲ့တာကြောင့်လည်း သက်သာရာရခဲ့ပြီး အသင်းသားတွေရဲ့စည်းလုံး ညီညွတ်မှု ကောင်းမွန်မှုကြောင့်သာ အနိုင်ရလဒ်ကို ဆက်ထိန်းနိုင်ခဲ့တာပါ။
ကစားသမားတွေ တစ်ဦးချင်းစီက တစ်ဦးနဲ့တစ်ဦး ကူညီဖေးမပြီး ဖြည့်ကစားပေးခဲ့ကြကြောင်း၊ တိုက်စစ်ကစားပုံတိုးတက်မှုတွေရှိဖို့ လိုအပ်နေပေမယ့် လမ်းကြောင်းမှန်ပေါ် ရောက်ရှိနေပြီလို့ ယုံကြည်ကြောင်း နည်းပြတန်ဟတ်ဂ်က ပြောပါတယ်။
မန်ယူအသင်းဟာ နိုင်ပွဲပြန်ရခဲ့မှုနဲ့အတူ အမှတ်ပေးဇယားအဆင့် ၅ နေရာမှာ ရပ်တည်နေပြီး အဆင့်၂ နေရာက မန်စီးတီးနဲ့ ၆ မှတ်၊ အဆင့်၁ နေရာက အာဆင်နယ်နဲ့ ၈ မှတ်ပဲကွာဟတော့တာ ဖြစ်ပါတယ်။
ချဲလ်ဆီးအသင်းနဲ့ သရေကျသွားတဲ့ပွဲစဉ်မှာ မန်ယူအသင်းသားတွေရဲ့ အနိုင်မခံအရှုံးမပေးတဲ့စိတ်ဓာတ်ကို နည်းပြတန်ဟတ်ဂ်က ချီးကျူးလိုက်ပါတယ်။
မန်ယူအသင်းဟာ ပထမပိုင်းမှာ အိမ်ရှင်ချဲလ်ဆီးကိုအသာစီးနဲ့ကစားနိုင်ခဲ့ပေမဲ့ ဂိုးသွင်းခွင့်တွေကို အသုံးမချနိုင်ခဲ့ပါဘူး။
ဒုတိယပိုင်းပြီးခါနီးမှာ လူစားဝင်ကွင်းလယ်လူ တွန်မီနေးက ချဲလ်ဆီးတိုက်စစ်မှူးဘရိုဂျာကို ဆွဲလှဲခဲ့လို့ ပင်နယ်တီပေးခဲ့ရပြီးရှုံးပွဲတွေ့ဖို့ နီးစပ်ခဲ့တာပါ။
ဒါပေမဲ့ ပွဲချိန်ပြည့်လို့ နာကျင်အချိန်ပို ၄ မိနစ်အရောက်မှာ ကတ်စမီရိုက ခေါင်းတိုက်ပြီး ချေပဂိုးသွင်းယူနိုင်ခဲ့လို့ တစ်ဖက်တစ်ဂိုးစီနဲ့ ပွဲပြီးခဲ့တာပါ။
နည်းပြတန်ဟတ်ဂ်ကတော့ ၈ ရက်အတွင်းမှာ ၄ ပွဲဆက်တိုက်ကစားခဲ့ရလို့ ချဲလ်ဆီးလို အသင်းရဲ့ အိမ်ကွင်းမှာသွားကစားရတာဟာမလွယ်ကူကြောင်း၊ ကစားသမားတွေရဲ့ အနိုင်မခံ အရှုံးမပေးစိတ်ဓာတ်ကြောင့်သာ သရေရလဒ်ရခဲ့ကြောင်း ပြောပါတယ်။
ဒါ့အပြင် အပိုင်အခွင့်အရေး သုံးကြိမ်လောက်ရခဲ့တာကို အသုံးမချနိုင်ခဲ့တာက ပွဲကြီးတွေမှာ အဆုံးအဖြတ် ဖြစ်စေပေမယ့် အရှုံးရလဒ်မဟုတ်ဘဲ သရေရလဒ်ရခဲ့တဲ့အတွက် ကျေနပ်ရမှာဖြစ်ကြောင်း နည်းပြတန်ဟတ်ဂ်ကမှတ်ချက်ပေးခဲ့ပါတယ်။
