မန်ယူနိုက်တက်ကစားသမားတွေဟာ ဘရိုက်တန်ကို ၂ ဂိုး ဂိုးမရှိနဲ့အနိုင်ရခဲ့တဲ့ပွဲစဉ်မှာ ဒိုင်လူကြီးကို ဝိုင်းဝန်းစောဒကတက်မှုလုပ်ခဲ့တာကြောင့် အက်ဖ်အေက အရေးယူသွားတော့မှာပါ။
အဲဒီပွဲစဉ် ပွဲချိန် ၅၃ မိနစ်မှာ လူငယ်ကစားသမား အီလန်ဂါကို လူးဝစ်ဒမ့်က ပြစ်ဒဏ်ကျူးလွန်ခဲ့ရာမှာ အဝါကတ်သာ ပြသခဲ့တာကြောင့် မန်ယူကစားသမားတွေက ဒိုင်လူကြီးကို ပြင်းပြင်းထန်ထန်စောဒကတက်ခဲ့ပါတယ်။
အဲဒီဖြစ်ရပ်မှာ ဖာနန်ဒက်စ်ကို အဝါကတ်ပြခဲ့ပြီး ဒိုင်လူကြီးက ကွင်းဘေး မော်နီတာဆီသွားပြီး ပြန်လည်စစ်ဆေးခဲ့ပါတယ်။ အဲဒီနောက် ဘရိုက်တန်နောက်ခံလူ လူးဝစ်ဒမ့်ကို အနီကတ် ပြောင်းလဲ ပြသပြီးထုတ်ပယ်ခဲ့ပါတယ်။
စီရော်နယ်ဒို၊ ဖာနန်ဒက်စ်၊ ဂျေဒန်ဆန်ချို၊ တွန်မီနေးနဲ့ အီလန်ဂါတို့ဟာ ကွင်းလယ်ဒိုင် ပီတာဘန် ကတ်စ်ကို ဝိုင်းဝန်းပြီး ကစားသမားမပီသတဲ့ အပြုအမှုလုပ်ခဲ့တယ်လို့ အက်ဖ်အေက သတင်းထုတ် ပြန်ပါတယ်။
အဲဒီလိုလုပ်ဆောင်မှုဟာ အက်ဖ်အေရဲ့စည်းမျဉ်း E 20 .1 ကို ချိုးဖောက်ခဲ့တာဖြစ်လို့ ကစားသမားတွေကို မထိန်းနိုင်ခဲ့တဲ့ မန်ယူနိုက်တက်အသင်းကို အရေးယူသွားမယ်လို့ သတင်းထုတ်ပြန်ပါတယ်။
မန်ယူအသင်းအနေနဲ့ အဲဒီဖြစ်ရပ်နဲ့ ပတ်သက်လို့ ဖေဖော်ဝါရီ ၂၁ ရက်မတိုင်ခင် ထုချေလွှာတင်ရမယ်လို့လည်း အက်ဖ်အေက အမိန့်ချခဲ့ပါတယ်။
