ရန်ကုန်၊ မရမ်းကုန်းမြို့နယ်၊ ၃ ရပ်ကွက်၊ မင်းဓမ္မလမ်း အမျိုးသားပြန်လည်သန်စွမ်းရေး ဆေးရုံအနီးမှာ ဧပြီ ၁၉ ရက် ဒီနေ့မနက် ၁၁ နာရီခွဲက အသက် ၇၀ အရွယ် အဘိုးအိုတဦး နေအပူရှိန်ကြောင့် လဲကျသေဆုံးသွားတယ်လို့ ရပ်ကွက်နေသူတွေဆီက သိရပါတယ်။
အပြင်ကနေ နေအိမ်ကိုပြန်လာတဲ့ အသက် ၇၀ အရွယ် အဘိုးအိုဟာ မင်းဓမ္မလမ်း အမျိုးသားပြန်လည်သန်စွမ်းရေးဆေးရုံအနီးမှာ လဲကျသေဆုံးသွားတာလို့ ရပ်ကွက်နေသူတဦးက ဒီဗွီဘီကို ပြောပါတယ်။
“သေတဲ့အဘကြီးက ၆ ရပ်ကွက်မှာနေတယ်လို့ ပြောတယ်။ သေချာတော့မသိဘူး။ ရပ်ကွက်ကလူကြီးတွေ ပရဟိတအဖွဲ့တွေ ဖုန်းဆက်တယ်။ သူတို့လာတော့ နေအပူရှိန်ကြောင့်သေတယ်လို့ ပြောတယ်။”
ရပ်မိရပ်ဖတွေရဲ့ ဖုန်းဆက်မှုကြောင့် လဲကျသေဆုံးတဲ့ အဘိုးအိုကို အဖြူရောင်အသင်း နာရေးကူညီမှုယာဥ်နဲ့ မြောက်ဥက္ကလာပဆေးရုံကြီးကို ပို့ဆောင်ပေးခဲ့တယ်လို့ အုပ်ချုပ်ရေးနဲ့ နီးစပ်သူတဦးက ဒီဗွီဘီကို ပြောပါတယ်။
“ပရဟိတအဖွဲ့ကို ဖုန်းဆက်ခေါ်တော့ မြန်မာ့ကြယ်ဖြူ လူမှုကူညီရေးအသင်းကလာတယ်။ သူတို့စစ်ဆေးကြည့်တော့ ဆုံးနေပြီ။ အသက်လည်းကြီးပြီး နေကလည်းပြင်းတော့ အပူရှိန်ကြောင့် ဆုံးတယ်ပြောတယ်။ သူတို့ကနေပြီး အဖြူရောင်အသင်း နာရေးယာဥ်နဲ့ ဆေးရုံကိုပို့ပေးတယ်။ သေတဲ့သူက ဒီနားရပ်ကွက်ကပဲ။”
ပြီးခဲ့တဲ့ ဧပြီ ၁၀ ရက် နေ့လယ် ၁ နာရီခွဲကလည်း ဗဟန်းမြို့နယ် ဦးစံဖေရပ်ကွက်မှာ စက်ဘီးစီးပြီးပြန်လာတဲ့ အမျိုးသားတဦး လဲကျသေဆုံးခဲ့တဲ့ ဖြစ်စဥ်လည်း ရှိပါတယ်။
ဒါ့အပြင် ဒဂုံဆိပ်ကမ်းမြို့နယ် ၉၄ ယုဇနဥယျာဥ်အိမ်ရာမှာ ဧပြီ ၁၀ ရက် မနက်ပိုင်းက နေအပူရှိန်ကြောင့် သားအမိနှစ်ဦး အသက်ရှူကျပ်ပြီး သေဆုံးခဲ့ပါတယ်။
ရန်ကုန်တိုင်း၊ မရမ်းကုန်းမြို့နယ်၊ အမှတ် ၈ ရပ်ကွက်၊ ဂန္ဓမာလမ်း၊ အမှတ် ၈၅၂ က လူနေ နှစ်ထပ်အဆောက်အဦတခုမှာ မတ်လ ၁၇ ရက် မနက် ၁၀ နာရီ ၄၉ မိနစ်လောက်က မီးလောင်မှုတခု ဖြစ်ပွားခဲ့တယ်လို့ မြန်မာမီးသတ်ဌာနချုပ်ဆီက သိရပါတယ်။
အဆိုပါနေအိမ်မှာ အမျိုးသမီးငယ်တဦးနဲ့ အသက် ၆၅ နှစ်အရွယ် အဘွားတဦး လက်ရှိနေထိုင်နေတယ်လို့ သိရပြီး အဘွားတဦးတည်း နေအိမ်ကျန်ခဲ့တဲ့အချိန်မှာ သစ်သားအဆောက်အဦဖြစ်တဲ့ နေအိမ်အပေါ်ထပ်ကနေ ဝါယာရှော့ဖြစ် မီးလောင်ခဲ့တာပါ။
မီးလောင်မှုကြောင့် နေအိမ်အပေါ်ထပ် တထပ်လုံးနဲ့ အောက်ထပ် မီးဖိုခန်း၊ အိမ်ဘေးကပ်ရပ် တိုက်ခန်းက အဲကွန်းစက်တလုံး မီးလောင်ကျွမ်းသွားတယ်လို့ သိရပြီး လူထိခိုက်မှု မရှိတဲ့အပြင် တခြားနေအိမ်တွေ မီးကူးစက်မှု မရှိဘူးလို့ သိရပါတယ်။
“မီးလောင်မှုကြောင့် လူထိခိုက်မှု မရှိပါဘူး။ နှစ်ထပ်ပျဉ်ထောင်အိမ်တလုံးမှာ အောက်ထပ်က နည်းနည်းပဲ လောင်သွားတယ်။ အပေါ်ထပ်က အကုန်လုံးလောင်ပါတယ်။ ဘေးအိမ် မီးမကူးဘူး၊ ဂန္ဓမာလမ်းမှာ လောင်တာပါ။ မိသားစုဝင်က ကောင်မလေးတယောက်နဲ့ အဘွားတယောက် နေတယ်လို့ ပြောတယ်။ ကောင်မလေးက နေအိမ်မှာ မရှိဘူး။ အဘွားက ဘေးကင်းပါတယ်” လို့ လူမှုကူညီရေးအသင်းတခုက ပြောပါတယ်။
အဲ့ဒီ မီးငြှိမ်းသတ်မှုကို မရမ်းကုန်းမြို့နယ် မီးသတ်ယာဉ် ၃ စီး၊ သမိုင်းမီးသတ်ယာဉ် ၂ စီး၊ မြန်မာမီးသတ်ဌာနချုက်က မီးသတ်ယာဉ်တွေ အပါအဝင် ရန်ကုန်အခြေစိုက် လူမှုကူညီရေးအသင်းတွေ ဝိုင်းဝန်းငြှိမ်းသတ်ခဲ့ကြလို့ မနက် ၁၁ နာရီ ၁ မိနစ်မှာ မီးငြိမ်းသွားတယ်လို့ သိရပါတယ်။
မီးလောင်မှုတန်ဖိုးကို စစ်ဆေးတွက်ချက်နေတယ်လို့ သိရပြီး ရန်ကုန်မှာ ၂၀၂၃ မတ်လ ၁၇ ရက်နေ့အထိ မီးလောင်မှု ၁၅ ကြိမ်အနက် ဝါယာရှော့ဖြစ်လို့ မီးလောင်ကျွမ်းမှု ၃ ကြိမ်ထက်မနည်း ရှိတယ်လို့ သိရပါတယ်။
