စစ်ကိုင်းတိုင်း၊ ဘုတလင်မြို့နယ်၊ ရွှေစာရေးကျေးရွာက ရွာသားလူငယ်နှစ်ဦးကို စက်တင်ဘာ ၁၃ ရက်နေ့ နေ့လယ် ၁ နာရီလောက်မှာ စစ်ကောင်စီတပ်က လက်ပြန်ကြိုးတုပ် ရိုက်နှက်ဖမ်းဆီး ခေါ်ဆောင်သွားတယ်လို့ ရွှေစာရေးကျေးရွာသားတွေဆီက သိရပါတယ်။
ရွှေစာရေးဒေသခံတစ်တစ်ဦးက “ကျနော်တို့ ချင်းတွင်းမြစ်ကနေ အထက်ကိုဆန်တက်လာတဲ့ စစ်သင်္ဘော ၅ စီးက ကျနော်တို့ရွာရဲ့ အောက်ဘက် ဝန်ဘိုကျေးရွာအနီး ဆိပ်ကမ်းမှာကပ်ပြီး စစ်သား ၃၀ လောက်နဲ့ ကုန်းကြောင်းလျှောက်လာကြတယ်ဗျ။ အချိန်က ၁၂ ခွဲကျော်လောက် ထင်တယ်ဗျ။ သူတို့တွေ လာကြတော့ ရွာသားတွေ ကြောက်ပြီး ထွက်ပြေးကြတာ။ ဘယ်သူမှ PDF မဟုတ်သလို၊ ဘယ် PDF အဖွဲ့မှ မရှိဘူးဗျ။ အဲဒီလို ထွက်ပြေးကြတာ သူတိုအဖွဲ့နဲ့ တန်းတိုးပြီး အဖမ်းခံလိုက်ရတာ။ ပထမတော့ ၅ ဦး အတူတူပြေးကြတာ။ သူတို့လည်း မြင်ရော အဲဒီကလေး ၅ ဦးထဲက ၃ ဦးက လွတ်အောင်ပြေးနိုင်တယ်ပေါ့ဗျ။ ၂ ဦးက မလွတ်ဘူး၊ ဖမ်းခံလိုက်ရတယ်” လို့ ပြောပါတယ်။
ရိုက်နှက်ဖမ်းဆီးခေါ်ဆောင်ခံရတဲ့ လူငယ် ၂ ဦးထဲမှာ ၁ ဦးက မသန်စွမ်းသူဖြစ်တယ်လို့ ရွာသားက ပြောပါတယ်။
“ကလေးတစ်ဦးက မသန်စွမ်းတစ်ဦးဗျ။ ဖမ်းပြီး ရိုက်ထားတာ၊ ကလေးတွေ သွေးတွေနဲ့ဗျာ။ အဲဒီလို ဖမ်းပြီး သူတို့စစ်သင်္ဘောပေါ် တင်ခေါ်သွားတယ်။ ဘာကြောင့်ဖမ်းတာလဲဆိုတော့ဗျာ သူတို့ ခိုင်းချင်တာ ခိုင်းရအောင်လို့ အလုပ်သမားအဖြစ် ဖမ်းတာလို့ ပြောရမှာပဲဗျ။ အခုလို အပြစ်မဲ့ ကလေးတွေ ဖမ်းသွားတော့ မိသားစုဝင်တွေကတော့ စိတ်ပူနေကြရတာပေါ့။ မသန်စွမ်းတဲ့ ကလေးအမေဆို နှလုံးရောဂါသည်ဆိုတော့ ပိုဆိုးတယ်ဗျ။ အဖမ်းခံလိုက်ရတဲ့ ကလေးအမည်တွေက မောင်ရဲကိုကိုဦး အသက်က ၂၇ လောက်နဲ့ နောက်တစ်ယောက်က မောင်ဖိုးသား အသက်က ၃၀ ဖြစ်တယ်ဗျ။”
ဘုတလင်မြို့နယ်၊ ရွှေစာရေးကျေးရွာဟာ အိမ်ခြေ ၂၇၀ ခန့်ရှိပြီး ချင်းတွင်းမြစ်ကြောင်းရဲ့ ပထမမြစ်ကျဉ်းလို့ အများသိတဲ့ မြစ်ကမ်းအရှေ့ဘက်မှာ တည်ရှိတဲ့ရွာလည်း ဖြစ်ပါတယ်။
အဲဒီရွှေစာရေးမြစ်ကျဉ်းမှာ ပြီးခဲ့တဲ့ ဧပြီလကုန်ပိုင်းက စစ်ကောင်စီတပ်တွေနဲ့ ကနီ ပြည်သူ့ကာကွယ်ရေးတပ် တိုက်ပွဲဖြစ်ပွားခဲ့တဲ့နေရာနဲ့ အနီးဆုံးကျေးရွာတရွာလည်း ဖြစ်ပါတယ်။
မန္တလေးမြို့ တံခွန်တိုင်အဝိုင်းမှာ ဖေဖော်ဝါရီ ၁၅ ရက်နေ့က စစ်အာဏာသိမ်းတာကို ကန့်ကွက်ဆန္ဒထုတ်ဖော်ခဲ့တဲ့ ဖြစ်စဉ်အတွင်း မသန်စွမ်းလူငယ်အား အကြမ်းဖက် ရိုက်နှက်ခဲ့တဲ့ ရဲတပ်ဖွဲ့တာဝန်ရှိသူတွေကို အရေးယူပေးဖို့ မြန်မာနိုင်ငံ မသန်စွမ်းအသင်းချုပ်နဲ့ မသန်စွမ်းအသင်းတွေ အပါအဝင် အရပ်ဘက်အဖွဲ့အစည်းတွေက တောင်းဆိုလိုက်ပါတယ်။
မသန်စွမ်း မောင်ဟန်သက်ဇော်ဟာ ဆန္ဒထုတ်ဖော်တဲ့အနားမှာ ရှိနေစဉ် ရဲတပ်ဖွဲ့က ရိုက်နှက်မှုကြောင့် ဦးခေါင်းကိုထိပြီး လဲကြသွားတဲ့ ဗွီဒီယိုမှတ်တမ်းဟာ လူမူကွန်ရက်မှာ ပျံ့နှံ့ခဲ့တာပါ။
မောင်ဟန်သက်ဇော်ဟာ ကိုယ်အင်္ဂါမသန်စွမ်းသလို ဉာဏ်ရည်မသန်စွမ်းသူလည်းဖြစ်ပြီး မိဘတွေမရှိတဲ့အတွက် ဦးလေးဖြစ်သူနဲ့ နေထိုင်နေသူပါ။
ရဲတပ်ဖွဲ့က ရိုက်နှက်နေစဉ် မပြေးနိုင်တဲ့အတွက် ၁၀ ချက်ထက်မနည်း အရိုက်ခံခဲ့ရတာပါ။
ဒါအပြင် ကိုယ်အင်္ဂါမသန်စွမ်းဖြစ်တဲ့ ဧရာဝတီတိုင်းဒေသကြီး အိမ်မဲမြု့နယ်မဲဆန္ဒနယ် တိုင်းဒေသကြီး လွှတ်တော်ကိုယ်စားလှယ်ကိုလည်း ပြန်လွှတ်ပေးဖို့ တောင်းဆိုခဲ့ကြပါတယ်။
မသန်စွမ်းတွေကို အကြမ်းဖက်ရိုက်နှက်တာဟာ ကုလသမဂ္ဂ မသန်စွမ်းသူများ အခွင့်အရေးဆိုင်ရာ သဘောတူစာချုပ်နဲ့ မြန်မာနိုင်ငံမသန်စွမ်းသူများအခွင့်အရေးဥပဒေကို ချိုးဖောက်ရာရောက်တယ်လို့ မသန်စွမ်းအဖွဲ့အစည်းတွေက ပြောပါတယ်။
ဒီလို အကြမ်းဖက်မှုတွေနဲ့ပတ်သက်ပြီး အရပ်ဘက်အဖွဲ့အစည်းတွေ၊ မသန်စွမ်းအဖွဲ့တွေက လူပုဂ္ဂိုလ် ၂၇၀ ကျော် ဒီနေ့ လက်မှတ်ရေးထိုးပြီး ကန့်ကွက်ရှုတ်ချထားပါတယ်။
စစ်အာဏာသိမ်းမှုကို ဆန္ဒထုတ်ဖော်ခဲ့တာကြောင့် မြန်မာနိုင်ငံမြို့အများအပြား အကြမ်းဖြိုခွင်းတာတွေ ရှိခဲ့ပြီး သေဆုံးသူ ဒဏ်ရာရရှိသူတွေနဲ့ အဖမ်းခံရသူ အများအပြားရှိနေတဲ့အထိမှာ မသန်စွမ်းသူတွေလည်း ပါဝင်နေပါတယ်။
