မလေးရှားနိုင်ငံမှာ နိုဝင်ဘာ ၁၉ ရက်က ကျင်းပတဲ့ အထွေထွေရွေးကောက်ပွဲမှာ မလေးရှား ဝန်ကြီးချုပ်ဟောင်း မဟာသီယာ မိုဟာမက် အံ့အားသင့်စရာ ရှုံးနိမ့်ခဲ့ပါတယ်။

ဒါဟာ တိုင်းပြည်ရဲ့ စီးပွားရေးကို ပြုပြင်ပြောင်းလဲရာမှာ သူ့ရဲ့အမွေအနှစ်ကို လွှမ်းမိုးသွားနိုင်တဲ့ အန္တရာယ်ရှိတယ်လို့ လေ့လာသူတွေက ပြောပါတယ်။ 

စိုက်ပျိုးမွေးမြူရေးကို မှီခိုနေရာက မလေးရှားနိုင်ငံရဲ့ စီးပွားရေးကို စက်မှုထွန်းကားရေးနှင့် ကုန်ထုတ်လုပ်ငန်းဆိုင်ရာ နယ်ပယ်တွေမှာ ပိုတိုးတက် ကောင်းမွန်လာစေဖို့ အားထုတ်ခဲ့တဲ့ အသက် ၉၇ နှစ်အရွယ် မဟာသီယာကို ပညာရှင်တွေက အသိအမှတ်ပြုခဲ့ကြပါတယ်။

ဒါပေမယ့် ဒီနေ့မလေးရှားမှာ အကျင့်ပျက်ခြစားမှု အခြေအနေတွေ လှိုင်းထနေတဲ့  အာဏာရ ပါတီဟောင်းရဲ့ ခေါင်းဆောင်မှုမှာ စုစည်းထားတဲ့ အာဏာကို ကျင့်သုံးရင်း လူမျိုးရေးအခြေခံတဲ့ မူဝါဒတွေ ချမှတ်ရင်း သဘောထားကွဲလွဲနေတဲ့ ပုဂ္ဂိုလ်တဦးအဖြစ် မဟာသီယာကို ကျွမ်းကျင်သူ တွေက ထောက်ပြခဲ့ပါတယ်။

မလေးရှားနိုင်ငံရဲ့ ၁၅ ကြိမ်မြောက် အထွေထွေရွေးကောက်ပွဲမှာ (GTA) ညွန့်ပေါင်းအဖွဲ့ကို ဦးဆောင်ခဲ့တဲ့ ဒေါက်တာ မဟာသီယာဟာ သူ့ရဲ့ လန်ကာဝီ ထိုင်ခုံကို ကာကွယ်ဖို့ ပျက်ကွက်ခဲ့ပြီး သူ့ရဲ့ ၅၃ နှစ်အတွင်း ပထမဆုံးအနေနဲ့ ရွေးကောက်ပွဲမှာ ရှုံးနိမ့်ခဲ့ပါတယ်။ 

ပေရီကာတန် နာရှင်နယ် ပါတီက မိုဟာမဒ် အယ်လ်ဆူဟိုင်မီ အဗ္ဗဒူလာက မဲ အနိုင်ရခဲ့ပါတယ်။ 

မလေးရှားနိုင်ငံရဲ့ အထွေထွေရွေးကောက်ပွဲမှာ လက်ရှိအာဏာရ UMNO ပါတီအနိုင်ရခဲ့ပါက ထောင်ဒဏ်ကျခံနေရတဲ့ ဝန်ကြီးချုပ်ဟောင်း နာဂျစ်ရာဇတ် လွတ်ငြိမ်းချမ်းသာခွင့်နဲ့ ထောင်ကနေ ပြန်လွတ်လာမှာဖြစ်ကြောင်း ဝါရင့်နိုင်ငံရေးသမား အတိုက်အခံခေါင်းဆောင် မဟာသီယာမိုဟာမက်က အောက်တိုဘာ ၁၁ ရက်မှာ ခန့်မှန်း ပြောပါတယ်။

လက်ရှိ အာဏာရ UMNO ပါတီဟာ အကျင့်ပျက်ခြစားမှုတွေနဲ့ နာမည်ပျက်နေသလို ဝန်ကြီးချုပ်ဟောင်း နာဂျစ်ရာဇတ်ကလည်း နိုင်ငံပိုင်ရန်ပုံငွေ ဒေါ်လာဘီလီယံချီ အလွဲသုံးစားလုပ်ထားတဲ့ 1MDB အမှုနဲ့ ထောင်ဒဏ် ၁၂ နှစ် ကျခံနေရတာပါ။

ဒါ့အပြင် 1MDB နဲ့ မသက်ဆိုင်ဘဲ ညီညွတ်သော မလေးအမျိုးသားအဖွဲ့ (UMNO) ရဲ့ ဥက္ကဋ္ဌ အာမဒ် ဇာဟစ်ဒ်ဟာမိဒိ ရင်ဆိုင်နေရတဲ့ အကျင့်ပျက်ခြစားမှုစွဲချက် ၄၇ ခုကိုလည်း ရုပ်သိမ်းပေးလိမ့်မှာဖြစ်ပြီး နာဂျစ်အပေါ် အခုစွဲဆိုထားတဲ့ 1MDB နဲ့ တခြားစွဲချက်တွေကိုလည်း ပယ်ချသွားလိမ့်မယ်လို့ မဟာသီယာက သတင်းစာရှင်းလင်းပွဲမှာ ပြောကြားခဲ့ပါတယ်။

မလေးရှားဝန်ကြီးချုပ် အစ္စမေးလ် ဆာဘရီ ယာကော့ဘ်ဟာ အောက်တိုဘာ ၁၀ ရက်က ပါလီမန်ကိုဖျက်သိမ်းပြီး ရွေးကောက်ပွဲကို ခပ်စောစောကျင်းပဖို့ တောင်းဆိုခဲ့ပါတယ်။

နာဂျစ်ကို သစ္စာခံထားတဲ့ လက်ရှိ အာဏာရ UMNO ပါတီက အစုအဖွဲ့တွေနဲ့ အဂတိလိုက်စားမှုနဲ့ တရားစွဲခံထားရတဲ့ တခြားသူတွေရဲ့ ဖိအားပေးမှုတွေကို လွတ်အောင်ရှောင်ဖို့ လုပ်ဆောင်တာလို့ ရိုက်တာသတင်းဌာနက ဖော်ပြပါတယ်။ 

အသက် ၉၇ နှစ်အရွယ် မဟာသီယာဟာ ရွေးကောက်ပွဲမှာ လန်ကာဝီရဲ့ ကိုယ်စားလှယ်လောင်းအဖြစ် သူ့ရဲ့ ပါလီမန်အမတ်နေရာကို ခုခံကာကွယ်မှာဖြစ်ကြောင်း ပြောကြားခဲ့ပြီး ဒါဟာ အနာဂတ်ဝန်ကြီးချုပ်အဖြစ် မဟုတ်ဘဲ ဥပဒေပြု လွှတ်တော်ကိုယ်စားလှယ်အတွက် နေရာလို့ ပြောပါတယ်။

အာဏာရ UMNO ပါတီဟာ အစ္စမေးလ်ရဲ့ အုပ်ချုပ်မှုအောက်မှာ ညွန့်ပေါင်းမိတ်ဘက်တွေ မပါဘဲ သူတို့လူတွေနဲ့ချည်း အစိုးရဖွဲ့ဖို့ ရွေးကောက်ပွဲမှာ လုံလောက်တဲ့ လုပ်ပိုင်ခွင့် ကြီးကြီးမားမားရဖို့ မျှော်လင့်ထားတဲ့အတွက် UMNO ကို အနိုင်ယူဖို့ ဘယ်သူနဲ့မဆို ပူးပေါင်းဆောင်ရွက်လိုကြောင်း မဟာသီယာက ပြောကြားခဲ့ပါတယ်။