ဧရာဝတီတိုင်း၊ မအူပင်မြို့မှာ လုံခြုံရေးအတွက် စစ်ကောင်စီတပ်က စစ်မှုထမ်းဟောင်းတွေကို နေ့စားခ ကျပ် ၁၀၀၀၀ ပေးပြီး ကင်းစောင့်ခိုင်းနေတယ်လို့  ဒေသခံတွေဆီက သိရပါတယ်။

မြို့ပေါ်လုံခြုံရေးကင်းစောင့်ရတဲ့နေရာတွေနဲ့ ယာဉ်စစ်ဆေးတဲ့နေရာတွေမှာ စစ်ကောင်စီတပ်က သက်ပြည့် ပင်စင်ယူပြီထွက်လာတဲ့ စစ်မှုထမ်းဟောင်းတွေကို နေ့စားခပေးပြီး ပြန်ခေါ်အသုံးပြုနေတာလို့ ဒေသခံတွေက ပြောပါတယ်။

မအူပင်မြို့ခံတဦးက “ နေ့စားခ တသောင်းပေးတယ်လို့ ကြားတယ်၊ လမ်းထဲက အဖိုးကြီးပြောတာ၊ သူကတပ်က ထွက်လာတဲ့သူ အာဏာမသိမ်းခင်ကတည်းက တပ်ကထွက်လာတာ၊ အဲ့အဖိုးကြီးကို ခုယူနီဖောင်းပြန်ထုတ်ပေးပြီး နေ့စားခနဲ့ပေးခိုင်းထားတာ”လို့ ပြောပါတယ်။

စစ်မှုထမ်းဟောင်းဝန်ထမ်းတွေကို မနက် ၈ နာရီကနေ ည ၈ နာရီအထိ ခေါ်ယူအသုံးပြုလေ့ရှိပြီး တခါတလေ ညဘက် လှည့်ကင်းထွက်တာတွေနဲ့ ဧည့်စာရင်းစစ်တာတွေမှာပါ အသုံးပြုလေ့ရှိတယ်လို့ ဆိုပါတယ်။

မအူပင်မြို့မှာ စစ်ကောင်စီတပ်က စစ်မှုထမ်းဟောင်းဝန်ထမ်းတွေကို နေ့စားခပေးပြီး ကင်းစောင့်ခိုင်းတဲ့အပြင် အရန်မီးသတ်တွေနဲ့ သတင်းပေးတွေကိုလည်း လုံခြုံရေးစောင့်ဖို့နဲ့ စစ်ဆေးရေးဂိတ်တွေမှာ အသုံးပြုနေရပါတယ်။

ခုလိုမျိုး စစ်ကောင်စီတပ်က စစ်မှုထမ်းဟောင်းတွေ၊ အရန်မီးသတ်တွေနဲ့ သတင်းပေးတွေကို လုံခြုံရေးစောင့်တာနဲ့ ဧည့်စာရင်းစစ်တဲ့နေရာတွေမှာ အသုံးပြုလာတာဟာ စစ်ကောင်စီတပ်ရဲ့ အင်အား မြို့ပေါ်မှာ လျော့နည်းလာတာမျိုးဖြစ်တယ်လို့ ရဲတပ်ဖွဲ့ဝင်ဟောင်းတွေက သုံးသပ်ပြောဆိုပါတယ်။

ဧရာဝတီတိုင်း၊ မအူပင်မြို့နယ်က ဧရာဝတီတိုင်းမ်သတင်းထောက် ကိုအောင်မြသန်းရဲ့ နေအိမ်ကို ဇွန်လ ၁၅ ရက်နေ့မှာ စစ်ကောင်စီတပ်သားတွေက လာရောက်ချိပ်ပိတ်သွားပါတယ်။

အမှတ် ၁ ရပ်ကွက်၊ အောင်ဆုပန်လမ်းမှာရှိတဲ့ သတင်းထောက် ကိုအောင်မြသန်းရဲ့ နေအိမ်ကို ညနေ ၃ နာရီလောက်က အရပ်ဝတ်တွေနဲ့လာပြီး ချိပ်ပိတ်သွားတာလို့ သတင်းထောက် ကိုအောင်မြသန်းက ဒီဗွီဘီကိုပြောပါတယ်။

“အစထဲက ကြိုမျှော်လင့်ပြီးသားပါ။ ဒီနေ့တော့ တကယ်လာလုပ်သွားတာပေါ့။ အစောင့်ရတယ်လို့ပဲ သဘောထားပါတယ်။ အိမ်ကို စာကပ်ပြီးတော့ ဝရမ်းပါထုတ်ထားတယ်လို့ ပြောတယ်၊ ညနေပိုင်းကမှ သိရတာ။” 

နေအိမ်ကို ချိပ်ပိတ်ခဲ့သလို လူကိုလည်း ဧရာဝတီတိုင်းမ်သတင်းဌာနနဲ့ပတ်သက်ပြီး အမှုဖွင့် ဝရမ်းထုတ်ထားပြီး ဘာပုဒ်မတွေနဲ့ အမှုဖွင့်ထားတယ်ဆိုတာကိုတော့ သေချာမသိရသေးဘူးလို့ ဆိုပါတယ်။

နေအိမ်ချိပ်ပိတ်ခံရပြီး ဝရမ်းထုတ်ခံရတဲ့ သတင်းထောက် ကိုအောင်မြသန်းဟာ စစ်တပ်အာဏာသိမ်းပြီး ထောင် ၂ ကြိမ်ကျခဲ့ပြီးနောက် လွတ်မြောက်လာသူလည်း ဖြစ်ပါတယ်။

သတင်းထောက် ကိုအောင်မြသန်းဟာ ထောင်ကလွတ်ပြီးနောက်ပိုင်း စစ်ကောင်စီတပ်သားတွေရဲ့ ဖမ်းဆီးခံရမှာစိုးရိမ်လို့ မြို့ကထွက်လာပြီး လွတ်မြောက်တဲ့နေရာကို ရောက်နေပြီလို့ ပြောပါတယ်။