အီတလီနိုင်ငံက မာဖီးယားလူမိုက်ဂိုဏ်းအပေါ် အကြီးဆုံး တရားစွဲဆိုမှုတခုမှာ တရားသူကြီးက တရားစွဲခံရသူ အယောက် ၇၀ ကို ပထမဆုံး ပြစ်ဒဏ် စီရင်လိုက်ပါတယ်။
သံသယရှိသူတွေဟာ မူးယစ်မှောင်ခိုမှု၊ ခိုးမှုနဲ့ ငွေညှစ်မှုတွေအတွက် စွဲချက်တွေကို ရင်ဆိုင်ခဲ့ရပါတယ်။
အမြန်စစ်ဆေးတဲ့ တရားခွင်အတွင်း ခုခံလျှောက်လဲသူ ၉၁ ယောက် ပါဝင်ပြီး သူတို့ရဲ့ ပြစ်ဒဏ် စီရင်ချက်ကို သုံးပုံတပုံထိ လျှော့ချဖို့ တရားရုံးက ခွင့်ပြုခဲ့ပါတယ်။
အဓိကဂိုဏ်းဝင်တွေလို့ အစိုးရရှေ့နေတွေက ပြောတဲ့ သံသယရှိသူတချို့ကိုတော့ ထောင်ဒဏ် နှစ် ၂၀ ထိ ချမှတ်ခဲ့တာပါ။
ပထမစီရင်ချက်ဟာ ဇန်နဝါရီလက ကာလာဘရီယန်မြို့မှာ စတင်ခဲ့တဲ့ သံသယရှိသူ လူ ၃၀၀ ပါဝင်ပတ်သက်နေတဲ့ ပိုကြီးတဲ့ စီရင်ချက်အတွက် အခြေခံလို့ အစိုးရရှေ့နေချုပ် နီကိုလာ ဂရက်တေရီက ပြောပါတယ်။
“ဒီလိုအရေးကြီးတဲ့ တရားခွင်အတွက် လိုအပ်တဲ့ တည်ငြိမ်ခိုင်မာတဲ့အလုပ်တွေကို ကျနော်တို့ ဆက်လုပ်သွားမယ်။ တရားသေလွှတ်တာ ခံရသူတချို့ဟာ မဖြစ်စလောက် သံသယရှိသူတွေပါ”လို့ သူက ဆက်ပြောပါတယ်။
နိုင်ငံတောင်စွန်းပိုင်း ကာလာဘရီယာဒေသမှာ အခြေစိုက်တဲ့ အန်ဒရန်ဂေတာဂိုဏ်းဟာ အီတလီမှာ အင်အားအကြီးဆုံး မာဖီးယားဂိုဏ်းအုပ်စုလို့ အစိုးရ ရှေ့နေတွေက သတ်မှတ်ထားတာပါ။
၁၉၈၆ ခုနှစ်မှာ စစ္စလီကျွန်းက နာမည်ကျော်ကြားတဲ့ ကိုဆာနော့စ်ထရာ မာဖီးယားဂိုဏ်းဝင်တွေ ရာချီကို အီတလီအစိုးရက နောက်ဆုံး ဖြိုခွင်းခဲ့ပြီး အဲဒီအုပ်စုရဲ့ ဩဇာဟာ သိသိသာသာ စတင် ကျဆုံးခဲ့တာ ဖြစ်ပါတယ်။
