အာဂျင်တီးနား ဘောလုံးအကျော်အမော် ဒီယေဂိုမာရာဒိုနာကို ပြုစုစောင့်ရှောက်ပေးခဲ့တဲ့ ဆရာဝန်တွေနဲ့ သူနာပြုတွေ အပါအဝင် လူ ၈ ဦးကို လူသတ်မှုနဲ့ အာဂျင်တီးနားတရားရုံးတွေမှာ တရားစွဲမယ်လို့ ဇွန် ၂၂ ရက်က အမိန့်စီရင်ချက် ထုတ်ပြန်ခဲ့ပါတယ်။

မာရာဒိုနာဟာ သူမသေဆုံးခင် ရက်သတ္တပတ် အနည်းငယ်အလိုက နှလုံးခွဲစိတ်မှု ပြုလုပ်ခဲ့တာဖြစ်ပြီး ၂၀၂၀ ခုနှစ် နိုဝင်ဘာလမှာ နှလုံး ရုတ်တရက် ရပ်သွားတာကြောင့် သေဆုံးခဲ့တာပါ။

မာရာဒိုနာ သေဆုံးမှုကို စုံစမ်းစစ်ဆေးဖို့ ခန့်အပ်ထားတဲ့ ဆေးဘက်ဆိုင်ရာ ဘုတ်အဖွဲ့ကတော့ ပြုစုစောင့်ရှောက်သူတွေရဲ့ မသင့်လျော်တဲ့ အဆင်အခြင်မဲ့ အပြုအမူတွေကြောင့် ဖြစ်တယ်လို့  ကောက်ချက်ချခဲ့ပါတယ်။

အစိုးရရှေ့နေတွေကတော့ မာရာဒိုနာကို ပြုစုစောင့်ရှောက်ပေးသူတွေရဲ့ ပေါ့လျော့ပျက်ကွက်မှုတွေကြောင့် သေဆုံးရတာဖြစ်ပြီး သူ့ရဲ့ဆရာဝန်တွေ၊ သူနာပြုတွေနဲ့ စိတ်ပညာရှင် အပါအဝင် လူရှစ်ဦးကို ‘ရိုးရှင်းတဲ့လူသတ်မှု’ နဲ့ ပြင်းပြင်းထန်ထန် စွဲချက်တင်ထားတယ်လို့ စီရင်ချက်မှာ ဖော်ပြပါတယ်။ ဒီစွဲချက်အရ ထောင်ဒဏ် ၈ နှစ်ကနေ ၂၅ နှစ်အထိ ချမှတ်နိုင်ပါတယ်။

မာရာဒိုနာရဲ့ အာရုံကြောခွဲစိတ် ဆရာဝန်နဲ့ ကိုယ်ရေးကိုယ်တာဆရာဝန် Leopoldo Luque၊ စိတ်ရောဂါအထူးကု Agustina Cosachov၊ စိတ်ပညာရှင် Carlos Diaz၊ သူနာပြု Gisella Madrid နဲ့ Ricardo Almiron၊ သူတို့ရဲ့အကြီးအကဲ Mariano Perroni နဲ့ ဆရာဝန် Pedro Di Spagna နဲ့ Nancy Forlini တို့ကို စီရင်ချက်ထဲမှာ နာမည်ဖော်ပြထားပါတယ်။

တရားခံတွေကတော့ မာရာဒိုနာ သေဆုံးမှုအတွက် သူတို့မှာ တာဝန်မရှိကြောင်း ငြင်းဆိုထားပြီး အယူခံဝင်ဖို့လည်း ပြင်ဆင်နေကြပါတယ်။

မာရာဒိုနာရဲ့သားဖြစ်သူဘက်က ရှေ့နေကတော့ မာရာဒိုနာဟာ ကွယ်လွန်ချိန်က ကူကယ်ရာမဲ့ အခြေအနေမှာ ရှိနေခဲ့တယ်လို့ ဆိုပါတယ်။

၁၉၈၆ ကမ္ဘာ့ဖလားချန်ပီယံ အာဂျင်တီးနားအသင်း ခေါင်းဆောင်အဖြစ် တာဝန်ယူခဲ့တဲ့ ဘောလုံးကြယ်ပွင့် မာရာဒိုနာဟာ ၂၀၂၀ ခုနှစ် နိုဝင်ဘာ ၂၅ ရက်က အသက် ၆၀ အရွယ်မှာ ကွယ်လွန်ခဲ့တာပါ။

ရိုက်တာသတင်းဌာနကတော့ တရားခံတွေ သို့မဟုတ် သူတို့ရဲ့ရှေ့နေတွေဆီကို မှတ်ချက်တောင်းခံဖို့ ချက်ချင်းဆက်သွယ်နိုင်လို့ မရသေးဘူးလို့ ဆိုပါတယ်။

၁၉၈၆ ခုနှစ် ကမ္ဘာ့ဖလားဗိုလ်လုပွဲမှာ အာဂျင်တီးနားတိုက်စစ်မှူး မာရာဒိုနာ ဝတ်ဆင်ခဲ့တဲ့ ဂျာစီကို လေလံတင်ရောင်းချခဲ့ရာမှာ ပေါင် ၇ ဒသမ ၁ သန်းအထိ စံချိန်တင်ရရှိခဲ့ပါတယ်။

မာရာဒိုနာဟာ အဆိုပါဂျာစီကို အင်္ဂလန်အသင်းကို ၂ ဂိုး ၁ ဂိုးနဲ့ အနိုင်ရခဲ့တဲ့ ကွာတားဖိုင်နယ်ပွဲစဉ်မှာ ဝတ်ဆင်ခဲ့တာပါ။

မာရာဒိုနာဟာ အင်္ဂလန်အသင်းဘက်ကို ၂ ဂိုးသွင်းယူခဲ့ပြီး ပထမသွင်းဂိုးကို လက်နဲ့ သွင်းယူခဲ့တာကြောင့် ဘုရားပေးသောလက်ဆိုပြီး နာမည်ကြီးခဲ့ပါတယ်။ ဒုတိယသွင်းဂိုးကိုတော့ ရာစုနှစ်ရဲ့ အကောင်းဆုံးဂိုးအဖြစ် သတ်မှတ်ခြင်း ခံခဲ့ရပါတယ်။

ပွဲအပြီးမှာတော့ မာရာဒိုနာရဲ့ဂျာစီကို အင်္ဂလန်ကွင်းလယ်လူ စတိဗ်ဟော့ဂ်က လဲလှယ်ရယူခဲ့ပြီး လွန်ခဲ့တဲ့ နှစ် ၂ဝ ကာလအတွင်း မန်ချက်စတာမှာရှိတဲ့ အမျိုးသားဘောလုံးပြတိုက်မှာ ထားရှိခဲ့တာပါ။

ပြီးခဲ့တဲ့ ဧပြီလထဲမှာတော့ Sotheby ပွဲမှာ လေလံတင်ရောင်းချခဲ့ရာမှာ ကနဦး ပေါင် ၄ သန်းအထိ ကမ်းလှမ်းခံခဲ့ရပြီး နောက်ဆုံးမှာတော့ ပေါင် ၇ ဒသမ ၁ သန်းနဲ့ စံချိန်တင် ရောင်းချနိုင်ခဲ့ပြီး ဘောလုံးနဲ့သက်ဆိုင်တဲ့ ပစ္စည်းတွေထဲမှာ အမြင့်မားဆုံးရရှိခဲ့ပါတယ်။

ဝယ်ယူသူကို မဖော်ပြပေမဲ့ မန်စီးတီးအသင်းနဲ့ နီးစပ်မှုရှိတဲ့ အရှေ့အလယ်ပိုင်းနိုင်ငံက လူတဦးက ဝယ်ယူသွားတာလို့ ဖော်ပြပါတယ်။

စတိဗ်ဟော့ဂ်ကတော့ ဒီဘောလုံးဂျာစီမှာ ဘောလုံးလောက၊ အာဂျင်တီးနားပြည်သူတွေနဲ့ အင်္ဂလန်ပြည်သူတွေအတွက် နက်ရှိုင်းတဲ့ ယဉ်ကျေးမှုဆိုင်ရာ အဓိပ္ပာယ်တွေ ရှိနေတယ်လို့ ရည်ညွှန်းခဲ့ပြီး “အချိန်တိုင်းရဲ့ အခမ်းနားဆုံးနဲ့ အခမ်းနားဆုံး ဘောလုံးကစားသမားတွေထဲက တဦးနဲ့ ကစားခွင့်ရတာက လုံးဝအခွင့်ထူးပါပဲ” လို့ ပြောပါတယ်။

အာဂျင်တီးနား ဘောလုံးတာဝန်ရှိသူတွေဟာ လာမယ့် အောက်တိုဘာလမှာ ကျရောက်မယ့် မာရာဒိုနာရဲ့ ၆၂ နှစ်မြောက် မွေးနေ့အတွက် အဆိုပါဂျာစီကို ခေတ္တငှားရမ်းပြီး ပြသဖို့အတွက် လေလံအောင်သွားတဲ့ ပိုင်ရှင်နဲ့ ဆွေးနွေးသွားမယ်လို့ သိရပါတယ်။