မန္တလေးတိုင်း၊ မိတ္ထီလာမြို့မှာ မေလ၂၇ ရက် ညပိုင်းက မိတ္ထီလာဆေးရုံရှေ့မှာ ပစ်ခတ်မှုဖြစ်ပွားပြီး လုံခြုံရေးယူထားတဲ့ ရဲတပ်ဖွဲ့ဝင်တစ်ဦး သေဆုံးသွားတယ်လို့ မြို့ခံတစ်ဦးကပြောပါတယ်။
"ဆေးရုံရှေ့မှာ ည ၉ နာရီလောက်က ပစ်ခတ်မှု ဖြစ်တယ်။ အိမ်စီးကားပေါ်က ပစ်သွားတာလို့ သိရတယ်။ ရဲတစ်ဦး ဒဏ်ရာရသွားတယ်။ ဆေးရုံပို့မလို့ လုပ်နေတုန်း သေဆုံးသွားတယ်။ မြို့ထဲနေရာ ၂ နေရာလောက်က သေနတ်သံတွေ ကြားနေရတယ်။ လေယာဉ်သံလည်း ကြားနေတယ်၊ ပစ်ခတ်ပြီး ထွက်ပြေးသွားသူကို အသည်းအသန်ရှာနေတာ ထင်တယ်"လို့ ပြောပါတယ်။
မိတ္ထီလာဆေးရုံကို မတ်လထဲက ရဲနဲ့စစ်တပ်က လုံခြုံရေးယူပြီး တပ်စွဲထားခဲ့ပါတယ်။
မန္တလေးတိုင်း၊ မိတ္ထီလာအကျဉ်းထောင်ကနေ မိတ္ထီလာဆေးရုံကို ဇွန် ၁၇ ရက် မနက်ပိုင်းက နှလုံးရောဂါကြောင့် ပို့ဆောင်ကုသခဲ့တဲ့ အကျဉ်းသား ၁ ဦးဟာ မွန်းလွဲ ၂ နာရီမှာ သေဆုံးသွားတယ်လို့ မိတ္ထီလာအကျဉ်းဦးစီးဌာနဦးစီးမှူးက ပြောပါတယ်။
မိတ္ထီလာအကျဉ်းဦးစီးဌာနလက်ထောက်ညွှန်မှူးဦးခင်ရွှေက “အသက်ရှူကြပ်လို့ ထောင်ဆေးရုံကနေ မိတ္ထီလာဆေးရုံကို ပို့ပေးခဲ့တယ်။ ဆေးရုံကြီးမှာ ဆေးကုသမှုခံယူရင်း သေဆုံးသွားတယ်။ သူ့မိသားစုဆီ လုပ်ထုံးလုပ်နည်းနဲ့အညီ လွှဲပြောင်းပေးလိုက်ပါတယ်။ နာရေးအတွက်လည်း ကူညီမှုတွေ ပေးခဲ့တယ်” လို့ ပြောပါတယ်။ မိတ္ထီလာမြို့ ရန်မျိုးအောင်ရပ်ကွက်နေ သန်းစိုး(ခ)စိုးကြီး(၂၄နှစ်)ဟာ မူးယစ်ဆေးဝါးနဲ့ စိတ်ကိုပြောင်းလဲစေတဲ့ ဥပဒေပုဒ်မ ၁၉(က) နဲ့ ပြီးခဲ့တဲ့ ၂၀၁၉ ဒီဇင်ဘာလက ထောင် ၁၀ နှစ် ပြစ်ဒဏ် ကျခံခဲ့ရသူဖြစ်ပါတယ်။ မိတ္ထီလာမြို့မရဲစခန်းက သန်းစိုး(ခ)စိုးကြီး သေဆုံးတာ ဓမ္မတာအတိုင်း ဟုတ်၊ မဟုတ် သေမှုသေခင်း အမှတ်စဉ် ၁၆/၂၀၂၀ နဲ့ စုံစမ်းစစ်ဆေးဖို့ အမှုဖွင့်ထားပါတယ်။ သတင်း-မောင်မောင်လင်း
