မန္တလေးတိုင်း မိတ္ထီလာခရိုင်ထဲက မိတ္ထီလာ၊ ဝမ်းတွင်း၊ မလှိူင်၊ သာစည် ၄ မြို့နယ်က တရားရုံးတွေမှာ ရင်ဆိုင်ဆဲအမှုတွေနဲ့ မိတ္ထီလာအကျဉ်းထောင်မှာ အချုပ်ကျနေသူတရားခံ အယောက် ၇၀ အောက်တိုဘာ ၁ ရက်မှာ  လွတ်မြောက်လာတယ်လို့ ဒေသခံတစ်ဦးက ပြောပါတယ်။

      "ကိုဗစ်ရောဂါ တတိယလှိူင်းဖြစ်နေလို့ မြို့နယ် ၄ ခုက တရားရုံးတွေမှာ ရင်ဆိုင်နေဆဲအမှုတွေ နဲ့ ပတ်သက်နေတဲ့ တရားခံတွေကို ရုံးထုတ်ပြီး မစစ်ဆေးနိုင်ဘူး။ အဲဒီအမှုတွေကို ရုတ်သိမ်းပေးပြီး မိတ္ထီလာအကျဉ်းထောင်ထဲမှာ အချုပ်ကျနေတဲ့ တရားခံ အမျိုးသား ၆၆ ယောက် အမျိုးသမီး  ၄ ယောက်ကို ဒီနေ့ပဲ လွှတ်ပေးလိုက်တာပါ။"

     မိတ္ထီလာခရိုင်တရားရုံးက အမျိုးသား ၁၂ ဦး အမျိုးသမီး ၁ ဦး၊ မြို့နယ်တရားရုံးက အမျိုးသား ၁၅ ဦး အမျိုးသမီး ၂ ဦး၊ ဝမ်းတွင်းမြို့နယ်တရားရုံးက အမျိုးသား ၉ ဦး၊ မလှိုင်မြို့နယ်တရားရုံးက အမျိုးသား ၂၁ ဦး၊ သာစည်မြို့နယ်တရားရုံးက အမျိုးသား ၉ ဦး အမျိုးသမီး ၁ ဦး စုစုပေါင်း အမှု ၆၀ ရဲ့ စုစုပေါင်းအချုပ်တရားခံ ၇၀ လွတ်မြောက်ခဲ့တာဖြစ်ပြီး နိုင်ငံရေးအမှုတွေ မပါဘူးလို့ သိရပါတယ်။

စစ်တပ်အာဏာမသိမ်းခင်ကျူးလွန်ထားတဲ့ နိုင်ငံတော်ပုန်ကန်မှု၊ မတရားသင်းအမှုနဲ့ နိုင်ငံတော်အကြည်ညိုပျက်စေမှုအပါအဝင် အမှုအမျိုးအစား ၉ မျိုးကို အမှုပိတ်သိမ်းပြီး တရားခံတွေကို လွှတ်ပေးမယ်လို့ အာဏာသိမ်းစစ်ကောင်စီက ဩဂုတ် ၁၁  ရက်မှာ ကြေညာပါတယ်။

ပိတ်သိမ်းလိုက်တဲ့အမှုတွေအထဲမှာ အကြမ်းဖက်မှု၊ ငွေကြေးခဝါချမှု၊ လူကုန်ကူးမှု၊ မူးယစ်ဆေးဝါးမှု၊ မတရားအသင်းအမှု၊ နိုင်ငံတော်သစ္စာဖောက်ဖျက်ပုန်ကန်မှု (ပုဒ်မ ၁၂၂)၊ အကြည်ညိုပျက်အောင်ပြုလုပ်မှု (ပုဒ်မ ၁၂၄(က))၊  တရားခံပြေးအမှုနဲ့ တရားရုံးမှာ ဦးတိုက်လျှောက်ထားစွဲဆိုထားတဲ့အမှုတွေ ပါဝင်ပါတယ်။

ကိုဗစ်-၁၉ ရောဂါကူးစက်မှုကို ဆက်လက်ဟန့်တား၊ ထိန်းချုပ်၊ ကာကွယ်ကုသနိုင်ဖို့နဲ့ ကျန်ရှိနေတဲ့ ချုပ်ရက်ရှည်ကြာနေတဲ့ တရားခံတွေကို သတ်မှတ်ချက်တွေနဲ့အညီ သက်ညှာစွာနဲ့ အမှုပိတ်သိမ်းပေးနိုင်ဖို့ လုပ်ဆောင်တာလို့ ဆိုပါတယ်။

မိတ္ထီလာအကျဉ်းထောင် အချုပ်မှာထားရှိသည့် အချုပ်သား  ၃၆ ယောက်ကို  အမှုပိတ်သိမ်းပြီး ပြန်လွှတ်ပေးလိုက်တယ်လို့ အကျဉ်းထောင်နဲ့ နီးစပ်တဲ့မြို့ခံတစ်ဦးက ပြောပါတယ်။

ဇူလိုင် ၂၂ ရက်နေ့လယ်က မိတ္ထီလာ၊ မလှိုင်၊ ဝမ်းတွင်း၊ သာစည် ၄ မြို့နယ် တရားရုံးတွေမှာ အမှုစစ်ဆေးဆဲ အချုပ်သားတွေကို ပြန်လွှတ်ပေးလိုက်တာပါ။

မိတ္ထီလာက မူးယစ်မှုနဲ့ တရားစွဲဆိုစစ်ဆေးနေတဲ့ ၁၈ ဦး၊  ခိုးမှုနဲ့  တရားစွဲဆို စစ်ဆေးခံရသူ ၁၀ ဦး၊ ပေါင်း ၂၈ ဦးလွတ်မြောက်လာပြီး ဝမ်းတွင်းက လောင်းကစားနဲ့တရားစွဲဆို စစ်ဆေးနေသူ တစ်ဦး မူးယစ်မှု ၃ ဦး  ပေါင်း ၄ ဦး ပြန်လွတ်လာပါတယ်။

မလှိုင်မြို့နယ်က  မူးယစ်မှုတစ်ဦး၊ ခိုးမှု ၃ ဦး လွတ်မြောက်လာပြီး  သာစည်မြို့နယ်က ၁ ဦးကတော့ သစ်တောဥပဒေနဲ့ တရားစွဲထားလွတ်မြောက်ခဲ့ပေမဲ့ ပြည်သူပိုင်ပစ္စည်း ပျက်စီးစေမှုနဲ့ မလွတ်တော့ အချုပ်ထဲမှာ ပြန်နေရတယ်လို့ ဒေသခံက ပြောပါတယ်။

ဖေဖော်ဝါရီ ၁ ရက်နေ့ စစ်အာဏာမသိမ်းခင်ကျူးလွန်ခဲ့တဲ့ ခိုးမှု၊ မူးယစ်မှု၊ ပြည့်တန်ဆာမှု အပါအဝင် ပြစ်မှု‌ ၁၁ မျိုးကို ပိတ်သိမ်းပြီး တရားခံတွေကို လွှတ်ပေးဖို့  ဇူလိုင် ၂၀ ရက်နေ့ ရက်စွဲနဲ့ စစ်ကောင်စီက ထုတ်ပြန်ထားပါတယ်။