မလှိုင်မြို့နယ်ကျောင်းသားများသမဂ္ဂရဲ့ ဥက္ကဋ္ဌဟောင်းရဲဘော်ကို မလှိုင်မြို့နဲ့ မိတ္တီလာမြို့ကြားမှာ ၂၀၂၂ ခုနှစ် မတ်လ ၇ ရက်က စစ်ကောင်စီတပ် မတရားဖမ်းဆီး ချုပ်နှောင်ခဲ့ပြီး တနှစ်ကျော်ကြာတဲ့အထိ အဆက်အသွယ် ပြတ်တောက်နေတယ်လို့ မလှိုင်မြို့နယ် ကျောင်းသားများသမဂ္ဂက ထုတ်ပြန်ပါတယ်။
ဖမ်းဆီးခံရပြီး မိတ္တီလာ ခြေမြန်တပ်မ ၉၉ ထဲကို ခေါ်ဆောင်သွားပြီး ရက်ပေါင်း ၂၀ ကျော်ကြာ မိသားစုနဲ့ အဆက်သွယ်ရရှိခဲ့ပေမဲ့ ၂၀၂၂ ခုနှစ် ဧပြီ ၂ ရက်ကစပြီး တပ်ထဲကနေ ထောင်ကို လွှဲပြောင်းလိုက်ပြီဆိုတဲ့ သတင်းကလွဲပြီး အခုအချိန်ထိ ဘာသတင်းအစအနမှ မရရှိတော့ကြောင်း သိရပါတယ်။
“ကျနော်တို့ရဲဘော်ရဲ့ အခြေအနေကို အမြန်ဆုံးသိချင်တယ်။ ဒါမှလည်း ကျနော်တို့ရဲဘော်ရဲ့ ကျန်းမာရေးအခြေအနေ သိရမှာ။ နောက်ပြီး ထောင်ဝင်စာပို့ပေးနိုင်မှာပါ။ အဖွဲ့ချုပ်အနေနဲ့ အဖွဲ့ချုပ်ရဲဘော်တယောက်ကို ဖမ်းသွားတယ်၊ သတင်းအစအနဖျောက်တယ်၊ အကြမ်းဖက် စစ်အုပ်စုကို တော်လှန်ရင် ဒီလိုလုပ်မယ်ဆိုပြီး ခြိမ်းခြောက်တဲ့သဘောပဲလို့ ယူဆပါတယ်။ ဗကသများအဖွဲ့ချုပ်ရဲ့ ဆောင်ပုဒ်တခုဖြစ်တဲ့ ‘အတက်ရိုက်ချိုး၊ အတောင်ကျိုးသော်၊ အရိုးထတွန်ပါလိမ့်မည်’ ဆိုတဲ့အတိုင်း တယောက်အဖမ်းခံရရင် နောက်ထပ်နှစ်ယောက် ဆက်ပေါ်လာပြီး ဆက်ပြီးတော်လှန်နေဦးမှာပါပဲ” လို့ မလှိုင်မြို့နယ် ကျောင်းသားများသမဂ္ဂက ဒီဗွီဘီကို ပြောပါတယ်။
မလှိုင်မြို့နယ်ကျောင်းသားများသမဂ္ဂအနေနဲ့ ဥက္ကဋ္ဌဟောင်းရဲဘော်ရဲ့ နိုင်ငံရေးအကျဥ်းသား အခွင့်အရေး၊ ကျန်းမာရေး စတဲ့ကိစ္စတွေအတွက် အလွန်စိုးရိမ်ကာ သူရောက်ရှိနေတဲ့နေရာကို အမြန်ဆုံးသိရှိလိုပြီး ဖမ်းဆီးခံရချိန်အတွင်း ဖြစ်ပျက်သမျှကို စစ်အုပ်စုဘက်က တာဝန်ယူရလိမ့်မယ်လို့ ထုတ်ပြန်ထားပါတယ်။
မန္တလေးတိုင်း၊ မိတ္ထီလာမြို့မှာ ဖေဖော်ဝါရီ ၇ ရက်ကစပြီး သုံးရက်အတွင်း အမျိုးသားသုံးယောက် ဆွဲကြိုးချသေဆုံးမှု ဖြစ်ပွားခဲ့တယ်လို့ လူမှုကယ်ဆယ်ရေးအသင်းတွေက ပြောပါတယ်။
မိတ္ထီလာမြို့နယ်ထဲက မုန်တိုင်းကျေးရွာ၊ ထမုန်ကန်ကျေးရွာနဲ့ ဝန်ဇင်းရပ်ကွက်က အမျိုးသားတွေ အခုလို ဆွဲကြိုးချ သေဆုံးခဲ့တာဖြစ်ပြီး အခုလိုမျိုး သုံးရက်ဆက်တိုက် ဆွဲကြိုးချ သေဆုံးမှုမျိုး တခါမှ မတွေ့ဖူးဘူးလို့ လူမှုကူညီရေးအသင်း တာဝန်ခံက ဒီဗွီဘီကို ပြောပါတယ်။
ဘာကြောင့်အခုလို ဆွဲကြိုးချသတ်သေရတယ်ဆိုတဲ့ အကြောင်းရင်းကိုတော့ မသိရသေးပါဘူး။ အဲဒီ သေဆုံးသွားတဲ့ ရုပ်အလောင်းတွေကို မိတ္ထီလာဆေးရုံကြီး ရင်ခွဲရုံကနေတဆင့် သက်ဆိုင်ရာနေရာတွေကို ပြန်လည်ပို့ဆောင်ပြီး ရွာဓလေ့ထုံးစံတွေနဲ့အညီ သင်္ဂြိုဟ်ပေးခဲ့တယ်လို့ ဆိုပါတယ်။
သေဆုံးခဲ့သူတွေဟာ အသက် ၃၀ ဝန်းကျင်အရွယ် အမျိုးသားတွေဖြစ်ကြပြီး စစ်တပ်အာဏာသိမ်းပြီးနောက် နိုင်ငံရေးအကျပ်အတည်းနဲ့ အလုပ်အကိုင်ရှားပါးတာ၊ ကုန်ဈေးနှုန်း အဆမတန် ကြီးမြင့်တာတွေကြောင့် အခုလို သေကြောင်းကြံစည်မှုတွေ နိုင်ငံအနှံ့ တွေ့နေရတာလည်း ဖြစ်ပါတယ်။
