ရုရှားနိုင်ငံဟာ အနောက်နိုင်ငံတွေရဲ့ ပိတ်ဆို့အရေးယူမှုတွေကိုတုံ့ပြန်ဖို့ အရှေ့ခြမ်းနိုင်ငံတွေ အထူးသဖြင့် တရုတ်နိုင်ငံကို သဘာဝဓာတ်ငွေ့တင်ပို့မှု သိသိသာသာတိုးမြင့်မှု အပါအဝင် မိတ်ဘက်သစ်တွေနဲ့ ကုန်သွယ်ရေး ပူးပေါင်းဆောင်ရွက်မှုကို ချဲ့ထွင်မှာဖြစ်ကြောင်း သမ္မတ ဗလာဒီမာပူတင်က ဒီဇင်ဘာ ၁၅ ရက်မှာ ပြောပါတယ်။
တူရကီမှာ ဓာတ်ငွေ့ဗဟိုဌာနအသစ် တည်ဆောက်မယ့် အစီအစဉ်ရှိကြောင်းနဲ့ အီလက်ထရွန်နစ် ပလက်ဖောင်းကို အသုံးပြုပြီး ဥရောပကိုရောင်းချမယ့် စျေးနှုန်းကို သတ်မှတ်မယ်လို့လည်း အဓိက ရုပ်မြင်သံကြားမိန့်ခွန်းမှာ ရုရှားပြည်သူတွေကို ပြောသွားပါတယ်။
ပူတင်က သူအဆိုပြုထားတဲ့ ပလက်ဖောင်းရဲ့ အသေးစိတ် အချက်အလက်တွေကိုတော့ မပြောခဲ့ပါဘူး။
အနောက်တိုင်းက ရုရှားကို စီးပွားရေးအရ သီးခြားဖယ်ထုတ်ဖို့ ကြိုးပမ်းမှုတွေကို တားဆီးဖို့အတွက် အာရှ၊ အာဖရိကနဲ့ လက်တင်အမေရိကရှိ မိတ်ဘက်တွေနဲ့ သူ့ရဲ့စီးပွားရေး ဆက်ဆံရေးကို မြှင့်တင်သွားမယ်လို့ဆိုပါတယ်။
ယူကရိန်းပဋိပက္ခကြောင့် အနောက်နိုင်ငံတွေနဲ့ ကုန်သွယ်မှုမှာ ဆိုးရွားလာပြီး ဥရောပသမဂ္ဂကို ရုရှားရဲ့ စွမ်းအင်ရောင်းချမှု သိသိသာသာ ကျဆင်းသွားတာပါ။
ဘောလ်တစ်ပင်လယ်အောက်ရှိ ရုရှားရဲ့ Nord Stream ဓာတ်ငွေ့ပိုက်လိုင်းတွေ ပျက်စီးသွားတဲ့ ပေါက်ကွဲမှုတွေလည်း ဖြစ်ပွားခဲ့တာကြောင့် ပူတင်က တူရကီမှာ ဓာတ်ငွေ့ဗဟိုဌာနကို ထူထောင်ဖို့ စိတ်ကူးပေါ်သွားတာဖြစ်ပေမဲ့ အခြေခံအဆောက်အအုံ တည်ဆောက်ဖို့ နှစ်နဲ့ချီ ကြာမြင့်နိုင်ပါတယ်။
ယူကရိန်းမှာ ရုရှားရဲ့ ပဋိပက္ခကို အဆုံးသတ်မယ့်ပုံမရှိဘဲ မော်စကိုဟာ လာမယ့်နှစ် ဘတ်ဂျက်ရဲ့ ၃ ပုံ ၁ ပုံလောက်ကို ကာကွယ်ရေးနဲ့ ပြည်တွင်းလုံခြုံရေးအတွက် သုံးစွဲမယ့် အစီအစဉ်တွေကို ဖော်ပြခဲ့ပြီး ကျောင်း၊ ဆေးရုံနဲ့ လမ်းတွေအတွက် ရန်ပုံငွေ ဖြတ်တောက်ခဲ့ပါတယ်။
လာမယ့်နှစ်မှာ လစာငွေကြေးတွေကို ထင်သာမြင်သာ တိုးမြှင့်ပေးသွားဖို့က အစိုးရရဲ့ ဦးစားပေးကိစ္စဖြစ်ပြီး အနိမ့်ဆုံးလုပ်ခကို ငွေကြေးဖောင်းပွမှုထက် မြန်မြန်တိုးပေးမယ်လို့ ပူတင်က ပြောပါတယ်။
