မွန်ပြည်နယ် သံဖြူဇရပ်မြို့နယ်  သင်္ကြန်မဏ္ဍပ်တွေအနီးမှာ ဧပြီ ၁၄ ရက်နေ့ သင်္ကြန်အကျနေ့က မိုင်း၂ လုံးခွဲပြီး သတိပေးလိုက်တယ်လို့ ပျံလွှာအထူးတပ်ဖွဲ့က ပြောပါတယ်။

မနက် ၁၁ နာရီ ကျော်က သံဖြူဇရပ်မြို့ ဓနသဟာရစစ်သင်္ချိုင်းရှေ့ သင်္ကြန်မဏ္ဍပ်အနီး မိုင်း ၁ လုံးခွဲပြီး သတိပေးခဲ့သလို ဖြစ်စဥ်အပြီးမှာ လူငယ် ၃ ယောက်ကို ရဲတပ်ဖွဲ့ဝင်တွေက ဖမ်းဆီးခေါ်ဆောင်သွားခဲ့တယ်လို့ ဆိုပါတယ်။

ဒေသခံတယောက်က “မိုင်းပေါက်ကွဲအပြီးမှာ သင်္ကြန်ရေကစားသူတွေရော၊ ယိမ်းအကတွေပါ မကတော့ဘဲ ရပ်နားသွားကြပြီး ဘယ်သူ့မှ ရေဆက်မကစားကြရဲဘူး” လို့ ပြောပါတယ်။

အကျနေ့ည ၇ နာရီလောက်ကလည်း လုံခြုံရေးတွေ တင်းကျပ်ထားတဲ့ သံဖြူဇရပ်မြို့လယ်က ဗဟိုဏ္ဍပ်အနီးရှိ ကိုက် ၁၀၀ အတွင်းမှာ ယိမ်းကနေစဥ် မိုင်းခွဲခဲ့တယ်လို့ ပျံလွှာအထူးတပ်ဖွဲ့က ပြောပါတယ်။

မွန်ပြည်နယ်အတွင်းမှာတော့ စစ်ကောင်စီရဲ့သင်္ကြန်ကို ပြည်သူတွေကို ဆန့်ကျင်သပိတ်မှောက်ထားကြဖို့ သတိပေးထားတာကြောင့် စစ်ကောင်စီ ရေကစားမဏ္ဍပ်တွေမှာ ရေကစားသူတွေအနေနဲ့ ထိခိုက်ပျက်စီးမှုရှိခဲ့ပါက တာဝန်ယူသွားမှာမဟုတ်ဘူးလို့ တော်လှန်ရေးအဖွဲ့တွေက ပြောထားပါတယ်။

အခုသံဖြူဇရပ်ရေးကစားမဏ္ဍပ်တွေကို မိုင်းခွဲသတိပေးခဲ့တာဟာ ပျံလွှာအထူးတပ်ဖွဲ့ နဲ့ မိုင်းနှင့် လက်နက်ထုတ်လုပ်ရေးပူးပေါင်းအဖွဲ့တွေက ပူးပေါင်းလုပ်ခဲ့တာလို့ ဆိုပါတယ်။

တော်လှန်သကြင်္န် အကျနေ့ ည ၆ နာရီ မိနစ် ၅၀ လောက်မှာလည်း ရေးမြို့နယ် ကျောက်မိချောင်းကျေးရွာ (တောင်) နဲ့ ကျုံလောင်းရွာဟောင်းအကြားရှိ ဖက်ဆစ်တပ်စီးပွားရေးထောက်တိုင် Mytel တာဝါတိုင်အား ရေးမြို့ ပြည်သူ့ကာကွယ်ရေး YSTF က ဖျက်ဆီးလိုက်တယ်လို့ YSTF ခေါင်းဆောင် စောသာစေးက ပြောပါတယ်။

“စစ်တပ်အပိုင် စီးပွားရေးလုပ်ငန်းတွေကို ဒီနွေဦး‌တော်လှန်ရေးကာလမှာသာ မဖြိုချနိုင်ရင် နောက်ဘယ်တော့မှ စစ်အာဏာရှင်ကို တွန်းလှန်နိုင်မှာမဟုတ်တော့ဘူး၊ ဒါကြောင့် သူတို့ရဲ့ ပင်မအသက်သွေးကြောစီးပွားရေး လုပ်ငန်းမှန်သမျှကို အခြားအခြားသော တော်လှန်ရေး အင်အားစုတွေက နည်းအမျိုးမျိုးနဲ့ ဖြိုချပစ်ဖို့လိုတယ်။” 

ရေးမြို့နယ်မှာ စစ်အုပ်စုရဲ့ ဝင်ငွေကို ပိတ်ဆို့တဲ့အနေနဲ့ မိုင်တဲလ်တာဝါတိုင် အနည်းဆုံး ၅ ခုလောက် ဖျက်ဆီးခဲ့တယ်လို့ တော်လှန်ရေးအင်အားစုတွေက ပြောပါတယ်။

မြန်မာတနိုင်ငံလုံးမှာ အာဏာသိမ်းပြီးကတည်းကစပြီး စစ်အုပ်စုရဲ့ မိုင်တဲလ်တာဝါတိုင်တွေ ဖျက်ဆီးခံထားရတာ ဒီနေ့အထိ  ၂၀၀၀ ကျော် ရှိပြီလို့ သိရပါတယ်။

တစ်ကျော့ပြန် ပြန်လည်စည်ကားနေတဲ့ ထားဝယ်ခရိုင် ကံပေါက်ဒေသက လောင်းကစားဝိုင်းတခုအနီးမှာ မိုင်းခွဲ သတိပေးခဲ့တယ်လို့ ဒေသကာကွယ်ရေးတပ်ဖွဲ့က ဇန်နဝါရီလ ၁၉ ရက်နေ့က ထုတ်ပြန်ထားပါတယ်။ 

ကံပေါက်ဒေသမှာ စစ်တပ်က အာဏာသိမ်းပြီးတဲ့နောက် တစ်ကျော့ပြန် ပြန်လည်စည်ကားလာတဲ့အတွက် အခုလို မိုင်းခွဲသတိပေးလိုက်တာလို့ ဆိုပါတယ်။ 

ပေါက်ကွဲတဲ့အသံက တော်တော်ကျယ်ပြီး မိုင်းပေါက်ကွဲမှုကြောင့် ထိခိုက်ဒဏ်ရာ ရရှိသူ မရှိဘူးလို့လဲ ဒေသခံ တစ်ဦးက ပြောပါတယ်။ 

အဆိုပါ လောင်းကစားဝိုင်းတွေဟာ ပွဲတော်လိုဖြစ်နေပြီး ရွာစဉ်လှည့်လည်ကာ အလှည့်နဲ့ လုပ်နေကြကာ အရင်က ဒီလိုမျိုး မလုပ်တာကြာပြီလို့ ဒေသခံ အမျိုးသမီးတစ်ဦးက ပြောပါတယ်။  

လောင်းကစားဝိုင်းတွေဟာ ပြည်သူတွေရဲ့ စာရိတ္တကိုပျက်ပြားစေတဲ့အပြင် စစ်ကောင်စီကို ဆက်ကြေးပေးနေရတာဖြစ်တဲ့အတွက် နမူနာအနေနဲ့ အခုလို သတိပေးရတာလို့ ဒေသကာကွယ်ရေးတပ်ဖွဲ့ ထုတ်ပြန်ချက်မှာ ဖော်ပြထားပါတယ်။ 

အာဏာသိမ်းပြီး တပတ်အကြာ ကံပေါက်ဒေသ အုန်းပင်ကွင်းကျေးရွာအုပ်စုက လောင်ကစားဝိုင်းတခုကို စစ်တပ်က ဖမ်းပြီး  ရက်အနည်းငယ်အတွင်း ပြန်လွှတ်ပေးခဲ့တဲ့ ဖြစ်စဉ်မျိုးလည်း ရှိခဲ့ပါတယ်။ 

ထားဝယ်ခရိုင် ရေဖြူမြို့နယ် ကံပေါက်ဒေသမှာ ပေါက်ကွဲမှုဖြစ်ပေါ်နေတာဟာ အခုတကြိမ်အပါအဝင် ၃ ကြိမ်ရှိပြီလို့ သိရပါတယ်။