မကွေးတိုင်း ရေစကြိုမြို့နယ်မှာ ဧပြီ ၃၀ ရက် မနက်နဲ့ မွန်းလွဲပိုင်းတွေမှာ စစ်ကောင်စီ တပ်သားတွေ ၂ နေရာ မိုင်းဆွဲတိုက်ခိုက်ခံရပြီး ၂ ယောက်သေဆုံးကာ အများအပြား ဒဏ်ရာရခဲ့ တယ်လို့ ရေစကြိုမြို့နယ် ပကဖက သိရပါတယ်။

ကံသစ်ရွာနားမှာ မနေ့ မနက် ၁၀ နာရီ ၄၅ မိနစ်က တပ်ထဲက ထွက်လာတဲ့ ကား ၃ စီးကို ပေပါမိုင်း ၁ လုံး၊ မိုင်းအသေး ၅ လုံးနဲ့ မိုင်းဆွဲတိုက်ခိုက်ခဲ့တယ်လို့ ရေစကြိုမြို့နယ် ပကဖ ခေါင်းဆောင် ရဲဘော်ဝေကြီးက ပြောပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်က ၂ ယောက်သေဆုံးပြီး ၁၀ ယောက်ထက်မနည်း ဒဏ်ရာရရှိခဲ့တယ်လို့ ဆိုပါတယ်။

ရဲဘော်ဝေကြီးက “နောက်ထပ် ရေစကြိုမြို့အဝင် ဘက်စုံခြံနားလေးမှာ မိုင်းဆွဲ တိုက်ခိုက်ခဲ့တာ။ အဲဒါကတော့ နေ့လယ် ၂ နာရီလောက်မှာပါ၊  ကား ၂ စီးပေါ့။ အဲဒီမှာတော့ ၃ ယောက်ထက် မနည်း ဒဏ်ရာရတယ်။ သေတာတော့ မရှိဘူး”လို့ ပြောပါတယ်။

ရေစကြိုမြို့နယ်မှာ ဧပြီ ၂၃ ရက်နဲ့ ၂၄ ရက်နေ့တွေမှာ စစ်ကောင်စီတပ်သားတွေနဲ့ ပျူစောထီးတွေ တိုက်ခိုက်ခံရပြီး ၂ ယောက်သေဆုံးကာ ၇ ယောက်ထက်မနည်း ဒဏ်ရာရရှိခဲ့တယ်လို့ ရေစကြို မြို့နယ် ပကဖကနေသိရပါတယ်။

မြိုင်မြို့နယ်၊ ဖလံကိုင်းရေနံမြေမှာလည်း ဧပြီ ၂၉ ရက် မနက်က စစ်ကောင်စီစစ်ကြောင်း တိုက်ခိုက်ခံရပြီး တပ်ကြပ်ကြီး ၂ ယောက်သေဆုံးကာ ၅ ယောက် ဒဏ်ရာရရှိခဲ့တယ်လို့ မြိုင် ပကဖက သိရပါတယ်။

ဖလံကိုင်းရေနံမြေမှာ ဧပြီ ၂၉ ရက် မနက် ၆ နာရီ ၅ မိနစ်လောက်မှာ ရေနံမှော်တွေကို စစ်ကြောင်းထိုးပြီး ပြန်ဝင်လာတဲ့ စစ်ကြောင်းကို  လက်နက်ငယ်နဲ့ ပစ်ခတ်ကာ ဒရုန်းနဲ့ အီနာဂါဗုံးသီး အလုံး ၆၀ လောက်ချပြီး မိုင်းဆွဲခဲ့တယ်လို့ မြိုင်ပကဖတပ်ရင်း ၁ တပ်ရင်းမှူး ဗိုလ်လက်ယာက ပြောပါတယ်။

“အဲဒီတိုက်ခိုက်မှုအတွင်းမှာ စစ်ကောင်စီဘက်က တပ်ကြပ်ကြီး ၂ ယောက်သေဆုံးကာ တယောက်ကို ကုတင်ပေါ်တင်ပြီး အလောင်းကို မီးရှို့သွားတယ်။ နောက်တယောက်ကတော့ မီးမရှို့ဘဲထားခဲ့တာ။ ၂ လောင်းလုံး ကျနော်တို့ ကိုယ်တိုင် သင်္ဂြိုဟ်ခဲ့ရတာ။”

အဲဒီစစ်ကြောင်းက ပြည်သူ ၂ ယောက်ကို ဖမ်းဆီးခံခဲ့ရကာ ပြန်လည်လွတ်မြောက်လာတော့ စစ်ကောင်စီတပ်က ၅ ယောက်ကတော့ ပေါင်တွေ၊ ဂျိုင်းတွေ၊ ရင်ဘတ်တွေ ဒဏ်ရာရရှိခဲ့ကြောင်း ပြောပြတယ်လို့ ဗိုလ်လက်ယာက ပြောပါတယ်။

ပခုက္ကူမြို့နယ်မှာလည်း ဧပြီ ၂၅ ရက်ညပိုင်းမှာ ပျူစောထီးစခန်းတခု တိုက်ခိုက်ခံရပြီး ၁၃ ယောက် သေဆုံးပြီး PDF ရဲဘော် တယောက်ကျဆုံးခဲ့ကာ လက်နက်ခဲယမ်းတွေ သိမ်းဆည်းရရှိခဲ့တယ်လို့ မြိုင် ပကဖကနေ သိရပါတယ်။

တနင်္သာရီတိုင်း၊ မြိတ်ခရိုင်၊ ပုလောမြို့နယ် မင်းထိန်ရွာနဲ့ ပဝတ်ကုန်းရွာကြားမှာ တောကြီးမြွေဟောက်အဖွဲ့က စစ်ကောင်စီယာဉ်တန်းကို မတ် ၁၄ ရက်မှာ ပဒေသာမိုင်း ၁၁ လုံးနဲ့ မိုင်းဆွဲတိုက်ခိုက်ခဲ့တယ်လို့ ထုတ်ပြန်ထားပါတယ်။

“ကျနော်တို့ ည ၇ နာရီဝန်းကျင်မှာ စခယာဉ်တန်း ၈ စီးကို ပဒေသာနှစ်ဆိုင်းမိုင်း ၁၁ လုံးနဲ့ တိုက်ခိုက်ခဲ့တာပါ။ စခကား ၃ စီး ပျက်စီးပြီး  ကျန်ကားတွေလည်း ထိခိုက်မှုရှိပါတယ်” လို့ တိုက်ပွဲတွင်ပါဝင်ခဲ့တဲ့ ရဲဘော်တဦးက ပြောပါတယ်။

စစ်ကောင်စီဘက်က ထိခိုက်ကျဆုံးမှု များပြားတယ်လို့ တောကြီးမြွေဟောက်အဖွဲ့ရဲ့ ထုတ်ပြန်ထားပေမယ့် အရေအတွက် အတိအကျကိုတော့ ဒီဗွီဘီအနေနဲ့ သီးခြားအတည်မပြုနိုင်သေးပါဘူး။

ပုလောမြို့နယ်၊ ပဝတ်ကုန်းရွာမှာရှိတဲ့ ဒေသခံတွေဟာ ပြီးခဲ့တဲ့ နှစ်ကတည်းက စစ်ရှောင်နေကြပြီး မင်းထိန်ကျေးရွာမှာရှိတဲ့ ဒေသခံတွေဟာ ယာယီစစ်ရှောင်သဘောမျိုးပဲ ရှိတယ်လို့လည်း ဒေသခံတွေဆီက သိရပါတယ်။

ပုလောမြို့နယ် မင်းထိန်ရွာနဲ့ ပဝတ်ကုန်းရွာကြားမှာ တောကြီးမြွေဟောက်အဖွဲ့က စစ်ကောင်စီရဲ့ ခြေလျင်စစ်ကြောင်းကို ပဒေသာမိုင်း ၄ လုံးနဲ့ ပြီးခဲ့တဲ့ မတ် ၁၃ ရက်မှာ မိုင်းဆွဲတိုက်ခိုက်ခဲ့ပြီး စစ်ကောင်စီတပ်သား ၂၀ ကျော် သေဆုံးခဲ့ပါတယ်။

တနင်္သာရီတိုင်း၊ ကော့သောင်းမြို့နယ်မှာ ပျူစောထီးခေါင်းဆောင် ကိုကျော်မိုးခိုင်ကို မြို့ပြပြောက်ကျားအဖွဲ့တွေက ပစ်ခတ်ရှင်းလင်းခဲ့တယ်လို့ ကော့သောင်း ပြည်သူ့ကာကွယ်ရေးတပ်ဖွဲ့ ပကဖ လက်အောက်ခံ တပ်ဖွဲ့ ၃ မြို့ပြ သမန်းကျား ပြောက်ကျားတပ်ဖွဲ့ တာဝန်ခံတယောက်ဆီက သိရပါတယ်။

မတ် ၁၅ ရက် ည ၉ နာရီ ၁၅ မိနစ်လောက်မှာ ခမရ ၃၄၂ တပ်ရင်းကို ကိုကျော်မိုးခိုင် ဆိုင်ကယ်မောင်းနှင်လာချိန် အဆိုပါတပ်ရင်းအရှေ့လောက်မှာ မြို့ပြပြောက်ကျားအဖွဲ့က ပစ်ခတ်ရှင်းလင်းခဲ့တာဖြစ်ပြီး စစ်ဆေးရုံအရောက်မှာ သေဆုံးခဲ့တယ်လို့ သိရပါတယ်။

မြို့ပြသမန်းကျား ပြောက်ကျားတပ်ဖွဲ့ တာဝန်ခံတယောက်က “ဒီပျုစောထီးခေါင်းဆောင်ဟာ လက်ရှိ ခမရ ၃၄၂ တပ်ရင်းထဲမှာ နေထိုင်ပြီး ဗျုဟာမှူးရဲ့ လက်ထောက်တယောက်ပါ။ သူလုပ်နေတာတွေက လဝကရုံးမှာ မှတ်ပုံတင်ပွဲစားပါ။ ရုံးဥက္ကဋ္ဌနဲ့ပေါင်းပြီး လုပ်စားပါတယ်။ မူးယစ်ဆေးဝါးရောင်းတဲ့သူတွေဆီမှာလည်း လိုင်းကြေးကောက်ခံတာရှိသလို ဘောလုံးဒိုင်၊ ချဲဒိုင်နဲ့ ဘတ်ငွေလဲလှယ်ဆိုင် မှန်သမျှကို စစ်ကြေးကောက်ပါတယ်။ သူက ကော့သောင်းမြို့ရဲ့ ပျူစောထီးခေါင်းဆောင် အကြီးဆုံးဖြစ်ပါတယ်” လို့ ပြောပါတယ်။

ပျူစောထီးခေါင်းဆောင် ကိုကျော်မိုးခိုင် အသတ်ခံရပြီးနောက် ခမရ ၃၄၂ တပ်ထဲကနေ အင်အား ၈၀ နီးပါးခန့် မြို့ထဲကို ကားကြီး ၄ စီးနဲ့ ထွက်သွားတယ်လို့ သိရပါတယ်။

ပြီးခဲ့တဲ့ ဖေဖော်ဝါရီလကလည်း ကော့သောင်းခရိုင် ခမောက်ကြီးမြို့နယ်ထဲက စစ်ကောင်စီလက်အောက်ခံ ပျူစောထီးနဲ့ ရာအိမ်မှူးတို့ကိုလည်း ပြည်သူ့ကာကွယ်ရေးတပ်ဖွဲ့ဝင်တွေက သွားရောက်ရှင်းလင်းခဲ့တာတွေ ရှိခဲ့တယ်လို့ သိရပါတယ်။