ရခိုင်ပြည်နယ်၊ မြောက်ဦးမြို့မှာ စက်တင်ဘာ ၂၉ ရက်က မိုင်းထိပြီး ခြေနှစ်ဖက်လုံးပြတ်သွားတဲ့လူငယ်တယောက် မြောက်ဦးခရိုင်ဆေးရုံကြီးမှာ ဆေးကုသမှုခံယူနေတုန်း သေဆုံးသွားတယ်လို့ မိသားစုနဲ့ နီးစပ်သူတဦးက ပြောပါတယ်။
မိုင်းထိသွားတဲ့ မြောက်ဦးမြို့ အောင်မင်္ဂလာရပ်ကွက်က အသက် ၁၈ နှစ်အရွယ် မောင်စိုးနိုင်ကျော်ဟာ မြောက်ဦးမြို့ မင်းသားကျွန်တံတိုင်းအနီးရှိတောင်မှာ မိုင်းကွဲပေါက်ပြီး ခြေနှစ်ဖက်လုံးပြတ်သွားကာ စက်တင်ဘာ ၂၉ ရက် ည ၁၁ နာရီကျော်လောက်မှာ သေဆုံးသွားတာလို့ ဆိုပါတယ်။
“မနေ့က ည ၁၁ နာရီကျော်လောက်မှာ သေသွားတယ်။ သတိတွေရခဲ့ပြီးတော့ သွေး ၄ ပုလင်း သွင်းလိုက်သေးတယ်။ ဒါပေမဲ့ ဒဏ်ရာက ပြင်းထန်တော့ အသက်တော့ မရလိုက်တော့ဘူး။ ဒီနေ့ သင်္ဂြိုဟ်သွားမှာဖြစ်တယ်။”
မိုင်းပေါက်ကွဲတဲ့နေရာအနီးမှာ စစ်ကောင်စီတပ်တွေက ယာယီ တပ်စွဲထားတယ်လို့ မြို့ခံတွေက ဆိုပါတယ်။
ရခိုင်ပြည်နယ်မှာ အရင်က စစ်တပ်မြေတွေနဲ့ တိုက်ပွဲဧရိယာ တောတောင်တွေမှာသာ မိုင်းပေါက်ကွဲမှုတွေရှိပြီး အခု မြို့ပေါ်ရပ်ကွက်တွေအထိ မိုင်းပေါက်ကွဲမှုတွေ ရှိလာတာကြောင့် ဒေသခံတွေအကြား စိုးရိမ်မှုတွေ မြင့်တက်နေပါတယ်။
ရခိုင်ပြည်နယ်မှာ ၂၀၂၂ ခုနှစ်အတွင်း မြေမြှုပ်မိုင်းထိပြီး သေဆုံးသူ ၂၀ နီးပါးအထိ ရှိလာပြီး ဒဏ်ရာရရှိသူ ၃၀ ကျော် ရှိနေပြီဖြစ်ပါတယ်။
ရခိုင်ပြည်နယ်၊ ကျောက်တော်မြို့နယ်မှာ နွားကျောင်းနေစဉ် မြေမြှုပ်မိုင်းထိလို့ စစ်တွေပြည်သူ့ဆေးရုံကြီးကိုတင်ထားရတဲ့ ဝက်မှိုင်းကျေးရွာသား ဦးသန်းစိန်မောင်(၄၅နှစ်)ဟာ ဇူလိုင် ၂ ရက်မှာ သေဆုံးသွားတယ်လို့ မိသားစုဝင်တစ်ဦးက ပြောပါတယ်။
မိသားစုဝင် တစ်ဦးက “ နေ့လယ် ၃ နာရီလောက်မှာ ဆုံးသွားတာ။ ညာဘက်ခြေက အခင်းဖြစ်တဲ့ နေရာမှာတင် ပြတ်သွားတာပါ။ ဘယ်ဘက်ခြေကလည်း ပြင်းထန်တဲ့ဒဏ်ရာ ရထားတာကြောင့် ဓာတ်မှန်ရိုက်ပြီး ဖြတ်ဖို့အတွက် ပြင်ဆင်နေတုန်းမှာ ဆုံးသွားတာဖြစ်တယ်။ စိတ်တော့ တော်တော်လည်း မကောင်းဖြစ်ရတယ်" လို့ပြောပါတယ်။
ဦးသန်းစိန်မောင်ဟာ ဇူလိုင် ၁ ရက်က ကျေးရွာနဲ့ တစ်မိုင်လောက်ဝေးတဲ့ ခမရ(၃၇၅)အနီး နွားကျောင်းနေစဉ် တပ်ဧရိယာနားရောက်သွားတဲ့ နွားနောက်ကို လိုက်သွားရာမှာ မြေမြှုပ်မိုင်းနင်းမိပြီး ကျောက်တော်ဆေးရုံးက တဆင့် စစ်တွေ ဆေးရုံကြီးကို အရေးပေါ်လူနာအဖြစ် ပို့ဆောင်လိုက်တာဖြစ်ပါတယ်။
မေ ၁ ရက်ကနေ ဇူလိုင် ၂ ရက် အတွင်း ရခိုင်ပြည်နယ်က မြို့နယ် ခြောက်ခုနဲ့ ချင်းပြည်နယ် ပလက်ဝမြို့နယ်အတွင်းမှာ မြေမြှုပ်မိုင်းထိပြီး သေဆုံးသူ ငါးယောက် အထိရှိခဲ့ပြီး ဒဏ်ရာရရှိသူ ခြောက်ယောက် အထိရှိပါတယ်။
ရခိုင်ပြည်နယ်မှာ ၂၀၂၂ ခုနှစ်အတွင်း မြေမြှုပ်မိုင်းပေါက်ကွဲမှုကြောင့် တောင်သူတွေ စိုးရိမ်စိတ်မြင့်တက်နေကြပါတယ်။
