‘ဝ’ကိုယ်ပိုင်အုပ်ချုပ်ခွင့်ရတိုင်း ဟိုပန်မြို့၊ မန်ကောင်းရပ်ကွက်ရှိ သာသနာ့ရောင်ခြည် ကျောင်းတိုက်မှာ ဧပြီ ၂၂ ရက် မနက်က မိုင်းဖုန်းဆရာတော် အရှင်ဘဒ္ဒန္တဉာဏသံဝရ ကြွရောက်ပြီး တရားဟောကြားတယ်လို့ ဒေသခံတွေဆီက သိရပါတယ်။
မနေ့နေ့လယ်ပိုင်းအချိန် မိုင်းဖုန်းဆရာတော် ကြွလာမယ်ဆိုတဲ့ သတင်းကြောင့် ဟိုပန်မြို့နေ ဗုဒ္ဓဘာသာကိုးကွယ်သူ ဒေသခံတွေဟာ မနက်ပိုင်းကတည်းက သာသနာ့ရောင်ခြည် ကျောင်းတိုက်ကိုသွားပြီး အဆင်သင့်ပြင်ဆင်ကာ စောင့်နေကြတယ်လို့ ဒေသခံတဦးက ပြောပါတယ်။
မိုင်းဖုန်းဆရာတော်ဟာ ဧပြီ ၂၁ ရက် ညမှာလည်း ကိုးကန့်ဒေသ လောက်ကိုင်မြို့ရှိ ဟိန်းလီ ကုမ္ပဏီအုပ်စု(Hanley Group)ရဲ့ ကြယ်စင်ကွင်းပြင်မှာလည်း ထောင်ချီရှိတဲ့ တရားနာပရိတ် သတ်တွေကို တရားဟောပြီးနောက် ဟိုပန်မြို့ကိုရောက်ရှိလာတာဖြစ်ပါတယ်။
မိုင်းဖုန်းဆရာတော်ဟာ ရှမ်းဘာသာနဲ့သာ အဓိက တရားဟောကြားပြီး လာရောက် တရားနာသူတွေဟာ ရှမ်းလူမျိုးအပြင် ဗမာ၊ ရခိုင်နဲ့ "ဝ"တွေလည်း ပါဝင်ကြပြီး ဟိုပန်မြို့အပြင် အနီးရှိရွာတွေကလည်း အလုပ်တွေကို နားကြပြီး လာရောက်တရားနာကြပါတယ်။
ဟိုပန်မြို့ သာသနာ့ရောင်ခြည်ကျောင်းတိုက်မှာ လာရောက် တရားနာသူတွေ ထောင်နဲ့ချီရှိနေပြီး ဒေသခံတွေဟာ မိုင်းဖုန်းဆရာတော်ကို အလွန်ကြည်ညိုကိုးကွယ်ကြပါတယ်။
ရှမ်းတိုင်းရင်းသားတွေအများစု ကြည်ညိုကိုးကွယ်တဲ့ မိုင်းဖုန်းဆရာတော်ဟာ မတ်လ ၂၀ ရက် ညနေပိုင်းက တနင်္သာရီတိုင်း ကော့သောင်းမြို့ကို ကြွချီလာပါတယ်။
ဆရာတော်ဟာ ထိုင်းတောင်ပိုင်း ရနောင်းမြို့ကတဆင့် ဒကာတို့စီစဉ်ပေးတဲ့ ရေယာဉ်နဲ့ ကော့သောင်းမြို့ကို ညနေ ၄ နာရီကျော်မှာ ကြွရောက်လာပြီး ကော့သောင်းမြို့နယ် တာဝန်ရှိသူတွေ၊ ရပ်မိရပ်ဖ၊ ပြည်သူတွေက သောင်းဆိပ်ကမ်းမှာ သွားရောက်ကြိုဆိုခဲ့ကြပါတယ်။
အဲဒီနောက် ဆရာတော်ဟာ ကော့သောင်းမြို့ အထင်ကရပြည်တော်အေးစေတီကို သွားရောက်ဖူးမြော်အပြီး အဏ္ဏဝါရပ်ကွက်ထဲရှိ မဉ္စူသကမြို့တော်ခန်းမမှာ အပူဇော်ခံ သီလပေးခဲ့တယ်လို့ ကော့သောင်းဒေသခံ ကိုဇေယျာစိုးက ပြောပါတယ်။
“လာဖူးတဲ့လူတွေကတော့ ခန်းမအပြည့်ပါပဲ။ ဆရာတော်က ကျနော်တို့ဆီကို ပထမဆုံးအကြိမ် ကြွလာတာလေ။ ဆရာတော်ကို အရင်က အင်တာနက်ပေါ်မှာပဲမြင်ဖူးတယ်၊ အခု ကိုယ်တိုင်ဖူးမြော်ရတော့ ဝမ်းသာပါတယ်။ ဆရာတော် လာမယ်ဆိုတာကို ကြိုတင်မသိလို့ မလာလိုက်ရတဲ့လူတွေလည်းအများကြီးပါဘဲ။”
ဆရာတော်ကို ကော့သောင်းမြို့ မျက်နှာဖုံးသူဌေးတွေက ပင့်ဖိတ်လာတာဖြစ်ပြီး လမ်းတလျှောက်မှာ လုံခြုံရေးတွေလည်း အပြည့်ချထားတယ်လို့ ဆိုပါတယ်။ ဒီကနေ့မှာတော့ ဆရာတော်ဟာ ကော့သောင်းမြို့နယ် ညောင်ဦးဖီးကျွန်းကို သွားရောက်ခဲ့ပါတယ်။
မိုင်းဖုန်းဆရာတော်ရဲ့ ခုတခေါက် သာသနာပြုခရီးစဉ်မှာ ထိုင်းနိုင်ငံ ချင်းရိုင်း၊ ချင်းမိုင်၊ နယ်စပ်ရှိ RCSS ဌာနချုပ်လွိုင်တိုင်းလျန်း၊ မဲ့စရိန်း၊ မယ်ဟောင်ဆောင်၊ မဲဆောက်၊ မြဝတီ (မြန်မာ)၊ ဘန်ကောက်၊ ရနောင်းနဲ့ ကော့သောင်းတို့ ရောက်ရှိပြီး ကချင်ပြည်နယ်ဘက် ခရီးဆက်မယ်လို့ ဒကာတွေကနေတဆင့် သိရပါတယ်။
