စပိန်နိုင်ငံ ဘာစီလိုနာမြို့မှာကျင်းပတဲ့ ကမ္ဘာ့မိုဘိုင်းလ်ပြပွဲမှာ တောင်ကိုရီးယား ပတ်နောင်း ကုမ္ပဏီ ဟာ အိမ်မွေးတိရစ္ဆာန်တွေနဲ့ပတ်သက်တဲ့ မိုဘိုင်းအက်ပလီကေးရှင်းတစ်ခုကို ထုတ်ပြခဲ့ပါတယ်။
အိမ်မွေးတိရစ္ဆာန်ပိုင်ရှင်တွေ အသုံးပြုလေ့ရှိတဲ့ တိရစ္ဆာရဲ့အမှတ်လက္ခဏာအချက်အလက်တွေကို မိုက်ကရိုချစ်ပ်တွေ၊ နာမည်ကတ်ပြားတွေနဲ့ ထည့်သွင်းသိမ်းဆည်းထားရက ဒီမိုဘိုင်းအက်ပ်က အစားထိုးဖြည့်စွက်လာနိုင်ဖို့ ကုမ္ပဏီက မျှော်လင့်ထားပါတယ်။
ဒီအက်ပ်ဟာ လူတွေရဲ့လက်ဗွေရာလိုပဲ ခွေးလေးတွေရဲ့နှာခေါင်းနဲ့ ကြောင်လေးတွေရဲ့မျက်နှင့် စတဲ့ ဇီဝအချက်အလက်တွေအပေါ် အခြေခံကာ ခွဲခြားသတ်မှတ်ပေးမှာပါ။
လူသားတွေရဲ့ လက်ဗွေရာ ပြောင်းလဲခြင်းမရှိသလိုဘဲ ခွေးလေးတွေနဲ့ ကြောင်လေးတွေရဲ့ နှုတ်သီးအရာတွေကလည်း မပြောင်းလဲဘူးလို့ ပတ်နောင်းကုမ္ပဏီရဲ့ ဂျွန်လီက ရိုက်တာကို ရှင်းပြပါတယ်။
ပတ်နောင်းအက်ပ်ကို အသုံးပြုကာ အိမ်မွေးတိရစ္ဆာလေးတွေရဲ့ မျက်နှာကို ပိုင်ရှင်က စာရင်းသွင်းထားနိုင်တယ်လို့ ဆိုပါတယ်။
တိရစ္ဆာန်လေးတွေ ပျောက်ဆုံးခဲ့ရင် ပိုင်ရှင်ကိုအသိပေးနိုင်မယ့် နောက်ထပ်နည်းလမ်းတစ်ခုလည်း အက်ပ်မှာပါဝင်ပြီး ရှာဖွေတွေ့ရှိထားသူက ဒီတိရစ္ဆာန်လေးတွေဟာ ဘယ်သူဘယ်ဝါဖြစ်ကြောင်း အက်ပ်ကနေတဆင့် အလွယ်တကူ ခွဲခြားအတည်ပြုနိုင်မှာပါ။
ဒီ အက်ပ်မှာ ဉာဏ်ရည်တုနည်းပညာ AIကို အဓိကအသုံးပြုထားတာဖြစ်ပြီး အချက်အလက်တွေ ကောက်ယူပြီးတဲ့အခါ AI နည်းပညာက သက်ဆိုင်ရာနှာခေါင်းကို ခပ်မြန်မြန် ခြေရာခံနိုင်မယ် လို့ လည်း ကုမ္ပဏီအရ သိရပါတယ်။
အက်ပ်ရဲ့တိကျမှုနှုန်းဟာ ၉၈ ဒသမ ၉၇ ရာခိုင်နှုန်းအထိ ရှိတယ်လို့တော့ ကုမ္ပဏီဘက်က ဆိုထားပါတယ်။
၂၀၂၁ ခုနှစ်၊ မတ်လက လုပ်ငန်းတူချင်း အပြန်အလှန်သုံးသပ်နိုင်တဲ့ IEEE Access အမည်ရ သိပ္ပံဂျာနယ်မှာ ခွေးလေးတွကို AI နည်းပညာအရ ခွဲခြားသတ်မှတ်နိုင်တဲ့အပေါ် ကုမ္ပဏီအနေနဲ့ စာတမ်းတစ်စောင် ထုတ်ဝေခဲ့ဖူးပါတယ်။
ဒီ အက်ပလီကေးရှင်းဟာ လက်စ်ဗီးဂတ်စ်မြို့မှာ ကျင်းပခဲ့တဲ့ CES 2022 နည်းပညာပြပွဲရဲ့ အကောင်းဆုံး တီထွင်ဆန်းသစ်မှု တစ်ခုအဖြစ်လည်း ရွေးချယ်ခံခဲ့ရပါတယ်။
အမေရိကန်ပြည်ထောင်စုဟာ အမျိုးသားလုံခြုံရေး အယူအဆကို လွန်လွန်ကဲကဲ ဆွဲဆန့်ပြီး နိုင်ငံခြားကုမ္ပဏီတွေကို ဖိနှိပ်ဖို့ နိုင်ငံတော်အာဏာကို အလွဲသုံးစားလုပ်နေကြောင်း တရုတ်နိုင်ငံခြားရေးဝန်ကြီးဌာနက ဖေဖော်ဝါရီ ၂၇ ရက်မှာ ပြောလိုက်ပါတယ်။
အိမ်ဖြူတော်ဟာ ဖက်ဒရယ်အစိုးရထုတ်ပေးထားတဲ့ စမတ်ဖုန်းနဲ့တခြားကွန်ပျူတာပစ္စည်းတွေကနေ တရုတ်ပိုင် TikTok အက်ပ်ကို ဖယ်ရှားဖို့ အစိုးရအေဂျင်စီတွေကို ရက် ၃၀ အချိန်ပေးပြီးနောက်မှာ “ကမ္ဘာ့နံပါတ် ၁ - စူပါ ပါဝါ ဖြစ်တဲ့ အမေရိကန်ပြည်ထောင်စုဟာ လူငယ်တွေ အလွန်နှစ်သက်တဲ့ မိုဘိုင်းလ်ဖုန်း အက်ပလီကေးရှင်းကို အလွန်ကြောက်လန့်ပြီး ကိုယ့်ကိုယ်ကိုယ် ယုံကြည်မှု လုံးဝမရှိပဲ အမျိုးသားလုံခြုံရေးဆိုင်ရာ အယူအဆကို ချဲ့ထွင်တဲ့အတွက် အမေရိကန်ဘက်က မှားယွင်းတဲ့ချဉ်းကပ်မှုကို ပြတ်ပြတ်သားသား ကန့်ကွက်ပါတယ်” လို့ ဝန်ကြီးဌာန ပြောရေးဆိုခွင့်ရှိသူ မော်နင်းက ပုံမှန်သတင်းစာရှင်းလင်းပွဲမှာ ပြောသွားတာပါ။
အမေရိကန်အစိုးရအနေနဲ့ စျေးကွက်စီးပွားရေးစနစ်နဲ့ တရားမျှတတဲ့ ယှဉ်ပြိုင်မှုဆိုင်ရာ အခြေခံမူတွေကို ထိထိရောက်ရောက် လေးစားလိုက်နာသင့်ကြောင်းလည်း မော်နင်းက ဆိုပါတယ်။
သက်ဆိုင်ရာကုမ္ပဏီတွေကို ကျိုးကြောင်းမဆီလျော်စွာ ဖိနှိပ်နေတာကို ရပ်တန့်ဖို့နဲ့ အမေရိကန်ပြည်ထောင်စုမှာ လာရောက်ရင်းနှီးမြှုပ်နှံပြီး လည်ပတ်လုပ်ကိုင်ကြတဲ့ နိုင်ငံအားလုံးက ကုမ္ပဏီတွေအတွက် ပွင့်လင်းမျှတပြီး ခွဲခြားမှုမရှိတဲ့ ပတ်ဝန်းကျင်ကို ပံ့ပိုးပေးဖို့လည်း ထည့်ပြောသွားပါတယ်။
ရိုက်တာသတင်းဌာနက မြင်တွေ့ခဲ့ရတဲ့ လမ်းညွှန်စာချွန်လွှာထဲမှာ စီမံခန့်ခွဲမှုနဲ့ ဘတ်ဂျက်ရုံးရဲ့ ဒါရိုက်တာ ရှာလန်ဒါ ယမ်းင်ဟာ ဖက်ဒရယ်အစိုးရရဲ့ စမတ်ဖုန်းနဲ့တခြားကိရိယာတွေမှာ TikTok မပါရှိကြောင်း သေချာစေဖို့နဲ့ ရောင်းချသူတွေကိုလည်း တူညီတဲ့ စည်းမျဉ်းတွေကို လိုက်နာကြောင်း သေချာစေဖို့ ဖက်ဒရယ်ပြည်ထောင်စု အေဂျင်စီတွေကို တာဝန်ပေးအပ်ခဲ့ပါတယ်။
ကန်ထရိုက်တာတွေဟာ ရက်ပေါင်း ၉၀ အတွင်း လိုက်နာရမှာဖြစ်ပြီး အေဂျင်စီတွေဟာ ရက်ပေါင်း ၃၀ အတွင်း အစိုးရထုတ်ပေးထားတဲ့ မိုဘိုင်းဖုန်းနဲ့ တခြားကွန်ပျူတာကိရိယာတွေ ထဲကနေ တရုတ်ပိုင် အက်ပ်ကို ဖယ်ရှားပစ်ဖို့ လိုအပ်ပါတယ်။
