ကချင်ပြည်နယ်၊ ဗန်းမော်ခရိုင်၊ ရွှေကူမြို့နယ်၊ မိုးစစ်ကျေးရွာနေ ကြံ့ခိုင်ရေးပါတီဝင် ၁ ဦး စက်တင်ဘာ ၂၅ ရက် မွန်းလွဲ  ၁ နာရီလောက်က သေနတ်နဲ့ပစ်သတ်ခံလိုက်ရတယ်လို့  ဒေသခံတွေထံက သိရပါတယ်။

စစ်တပ်သတင်းပေးဒလန်လုပ်နေတဲ့ ဦးသန်းလွင်စိန်ဟာ ဒီနေ့ နေ့လယ် ၁ နာရီလောက်မှာ  မိုးစစ်ကျေးရွာ အခင်းတဲက အပြန်လမ်း တစ်နေရာမှာ သေနတ်နဲ့ပစ်ခတ်ခံရပြီး နေရာမှာတင် ပွဲချင်းပြီး သေဆုံးသွားတယ်လို့သိရပါတယ်။

ကျေးရွာဒေသခံတစ်ဦးက "သူက အာဏာစသိမ်းကတည်းက ရွာထဲကို စစ်ကြောင်းလာရင် ဘယ်အိမ်ကဘယ်သူ ဆန္ဒပြနေတာ။ ဘယ်သူကတောထဲကို သင်တန်းသွားတာ ဆိုပြီးတော့ပေါ့ဗျာ။ သတင်းပေးပြီး ဖမ်းခိုင်းတာတွေ မကြာခဏလုပ်လို့ အပြစ်မဲ့ကျေးရွာသားတွေ အိမ်မှာကောင်းကောင်း မနေကြရဘဲ အကြောင်းမဲ့ထွက်ပြေးနေရတာဗျ။ တစ်ရွာတည်းသားချင်းမို့ဆိုပြီး သေသွားတာကို သနားရမယ့် အချိန်မဟုတ်တော့ဘူးဗျ။ ကိုယ့်ဒေသအတွက် ဆူးငြောင့်တစ်ခုရှင်းသွားတယ်လို့ပဲ တွေးထားပါတယ်"လို့ ပြောပါတယ်။

မိုးစစ်ကျေးရွာဟာ စစ်အာဏာရှင်အလိုမရှိကြောင်း ဆန့်ကျင်ဆန္ဒဖော်ထုတ်ရာမှာ အင်အားကောင်းတဲ့ကျေးရွာတစ်ရွာဖြစ်ပြီး သတင်းပေးဒလန်တွေကြောင့် ကျေးရွာအတွင်း အကြမ်းဖက်စစ်ကောင်စီရဲ့ မကြာခဏရှာဖွေစစ်ဆေးခံနေရတဲ့ ကျေးရွာဖြစ်ပါတယ်။

ရွှေကူမြို့နယ်မှာ စက်တင်ဘာ ၁၄ ရက်က စစ်ကောင်စီ သတင်းပေးတစ်ဦးဖြစ်သူ  စီသောင်ကျေးရွာအုပ်စုအုပ်ချုပ်ရေးမှူး ပစ်သတ်ခံရပြီးနောက် အခုဖြစ်စဉ်ဟာ ဒုတိယမြောက် ဖြစ်ပါတယ်။

ကချင်ပြည်နယ်၊ ရွှေကူမြို့နယ်၊ မိုးစစ်ကျေးရွာမှာ မေလ ၃၁ ရက် ည ၉ နာရီခွဲလောက်က အကြမ်းဖက်စစ်ကောင်စီတပ်တွေက လက်နက်ကြီးတွေနဲ့ ပစ်ခတ်နေပြီး သေနတ်သံတွေ ဆက်တိုက်ကြားနေရတယ်လို့ ဒေသခံတွေက ပြောပါတယ်။

ဒေသခံအမျိုးသမီးတစ်ဦးက “မိုးစစ်ရွာထိပ်မှာ တပ်စွဲထားတဲ့တပ်က ‌လက်နက်ကြီး ၃ ချက်အရင်ပစ်တာ နောက်တော့ တောဘက်ကနေ လက်နက်ကြီး အသံ ၃ ချက် ပြန်ထွက်လာတယ်။ ပြီးတော့မှ ရွှေကူ ရဲစခန်းဘက်ကလည်း သေနတ်သံ အနည်းဆုံး အချက် ၂၀ လောက် ပစ်သံကြားရတယ်ရှင့်။ ကျမတို့လည်း ကြောက်လန့်ပြီး အိမ်မှာမအိပ်ရဲလို့ ဘေးကင်းလုံခြုံမယ်ထင်တဲ့နေရာတွေမှာ ပုန်းအိပ်နေတာရှင့်”လို့ ပြောပါတယ်။

အဆိုပါ မိုးစစ် ကျေးရွာမှာအရင်က  စစ်ကောင်စီတပ်‌တွေ စခန်းချ တပ်စွဲတာမရှိပေမဲ့ ကျောင်းအပ်လက်ခံစဉ်ကာလက ကျေးရွာဒေသခံပြည်သူတွေက ကျောင်းအပ်လက်ခံတဲ့ Non CDM ပညာရေးဝန်ထမ်းတွေကို သံပုံးတီးပြီးမောင်းထုတ်တဲ့ ဖြစ်စဉ်တွေရှိခဲ့တာ‌ကြောင့် မေလ ၃၁ ရက်နေ့မနက်ကစကာ ရွာထိပ်မှာ စစ်ကောင်စီတပ်မှ တပ်စွဲထားတာဖြစ်ပါတယ်။