စစ်ကောင်စီတပ်နဲ့ ပြည်သူ့ကာကွယ်ရေးတပ်တွေကြား တိုက်ပွဲဖြစ်ပွားခဲ့လို့ စစ်ဘေးတိမ်းရှောင်နေကြရတဲ့ ရှမ်း-ကယားနယ်စပ်၊ ဖယ်ခုံမြို့နယ်၊ မိုးဗြဲအင်း အရှေ့ဘက်ကမ်းမှာရှိတဲ့ ကျေးရွာတွေက ပြည်သူတွေဟာ နေရပ်မှာ ပြန်လည်နေထိုင်နေကြပြီလို့ ဒေသခံတွေက ပြောပါတယ်။

ဖယ်ခုံမြို့နယ်ရှိ လွယ်ပေါ၊ လဟယ်၊ မခေးခမ်း၊ ငါးမူ(နားနော)၊ နမ်စွန်း၊ နမ့်ပေါ်လုံ၊ ဆောင်းနန်းခဲ စတဲ့ကျေးရွာ ၇ ရွာက စစ်ဘေးရှောင်ပြည်သူတွေ ပြန်လည် နေထိုင်နေကြတာပါ။

လွယ်ပေါရွာမှာ လက်ရှိပြန်နေထိုင်နေတဲ့ စစ်ရှောင်အမျိုးသမီးတယောက်က “အခု ကျမတို့ ရွာမှာ ပြန်နေလို့ရပြီ။ ဆောင်ကမ်းကနေ ဆောင်နမ်းခဲကြားမှာရှိတဲ့ ရွာအကုန်လုံး ပြန်နေကြပြီ။ စစ်တပ်ကတော့ မဆုတ်သေးဘူး ရှိနေတုန်းပဲ။ PDF ကလေးတွေက ပြည်သူ့အသံကို နားထောင်ပေးပြီး စစ်တပ်ကို သွားမတိုက်တော့လို့ ရွာမှာပြန်နေလို့ရတာပါ” လို့ ပြောပါတယ်။

ထိုးစစ်ဆင်လာတဲ့ စစ်ကောင်စီတပ်က အိမ်ခြေ ၅၀ ကျော်ရှိတဲ့ ဆောင်နန်းခဲကျေးရွာ တရွာလုံးကို မီးရှို့ဖျက်ဆီးခဲ့တဲ့အပြင် လွယ်ပေါနဲ့ နမ့်ပေါ်လုံကျေးရွာက နေအိမ်တချို့နဲ့ ပြောင်းပွဲရုံ၊ စျေးဆိုင်ခန်းတွေ ဖောက်ထွင်းခံခဲ့ရတယ်လို့ ဒေသခံတွေထံက သိရပါတယ်။

ဒေသခံတယောက်က “ဆောင်နန်းခဲရွာက အိမ်ခြေ ၅၅ အိမ်ရှိတယ်။ စစ်တပ်က မီးရှို့လိုက်လို့ အခု ၅ အိမ်ပဲ ကျန်တော့တယ်။ စစ်တပ်စစ်ကြောင်း စထိုးလာတဲ့ မေလ ၁၆ ရက်နေ့က ရွာကို မီးရှို့လိုက်တာ။ ကျန်တဲ့ရွာတွေကတော့ အိမ်တွေဖောက်ခံရတယ်၊ စျေးဆိုင်တွေ ဖောက်ခံရတယ်၊ ပြောင်းဂိုဒေါင်တွေ ဖောက်ပြီး အကုန်လုံး ကားနဲ့တိုက်ယူသွားတယ်။ ကားကြီးတွေနဲ့ ညောင်ရွှေဘက်ကို တိုက်ယူသွားတာ ဘာမှကိုမကျန်ဘူး” လို့ ပြောပါတယ်။

ပြီးခဲ့တဲ့ မေလဆန်းက မိုးဗြဲ-ညောင်ရွှေ ကားလမ်းပေါ်မှာရှိတဲ့ ထီရိ စစ်ကောင်စီစစ်ဆေးရေးဂိတ်ကို ရှမ်း-ကယားဒေသက ပြည်သူ့ကာကွယ်ရေး ပူးပေါင်းတပ်ဖွဲ့တွေက တိုက်ခိုက်သိမ်းပိုက်ပြီး လက်နက်ခဲယမ်းတွေ ရယူခဲ့ပါတယ်။

အဲ့ဒီနောက်ပိုင်းမှာ စစ်ကောင်စီတပ်က လေကြောင်းနဲ့ လက်နက်ကြီးပစ်ကူယူကာ လွယ်ပေါကျေးရွာဘက်ကို အင်အားအလုံးအရင်းနဲ့ ထိုးစစ်ဆင်လာခဲ့တာကြောင့် ဒေသခံ ကျေးရွာသားတွေ စစ်ဘေးတိမ်းရှောင်ခဲ့ရတာ ဖြစ်ပါတယ်။

အခုလို  ကောက်ပဲသီးနှံတွေ ရိတ်သိမ်းရာသီမှာ ပြည်သူတွေ နေရပ်ပြန်နေနိုင်ဖို့ ကယန်းပြည်သစ်ပါတီနဲ့ ရပ်မိရပ်ဖတွေက ညှိနှိုင်းခဲ့တာလို့ ဒေသခံတွေက ဆိုပါတယ်။

“ကယန်းပြည်သစ်နဲ့ ရပ်မိရပ်ဖတွေက ကြားကနေပြီး စစ်တပ်နဲ့ ညှိလိုက်လို့ အခုလို အိမ်ပြန်လာနေလို့ရတာပါ။ ပီဒီအက်ကလေးတွေကလည်း လွယ်ပေါမှာရှိနေတဲ့ စစ်တပ်ကို မတိုက်ဘဲ ရှောင်နေပေးတယ်။ အခုကျမတို့ စိုက်ထားတဲ့ ပြောင်းဖူးတွေ လာချိုးနေတာ ကျမအိမ်တော့ အရမ်းကြီးထိခိုက်ပျက်ဆီးတာမရှိဘူး။ တံခါးပေါက်တွေပဲ လက်နက်ကျည်တွေ မှန်ထားတာရှိတယ်” လို့ ဒေ သခံတစ်ဦးကပြောပါတယ်။

ဖယ်ခုံမြို့နယ်၊ မိုးဗြဲတိုက်နယ်အတွင်းမှာ နှစ်ဖက်စစ်ရေးတင်းမာနေပြီး တိုက်ခိုက်မှုဖြစ်လေ့ရှိတဲ့ ကျေးရွာတွေကတော့ လက်ရှိအချိန်ထိ စစ်ဘေးတိမ်းရှောင်နေရဆဲဖြစ်တယ်လို့ ဒေသခံတွေက ဆိုပါတယ်။ 

စစ်အာဏာသိမ်းပြီးနောက်ပိုင်း ကယား(ကရင်နီ)ပြည်နယ်နဲ့ ရှမ်းပြည်နယ် ဖယ်ခုံမြို့နယ်အတွင်းမှာ စစ်ကောင်စီတပ်နဲ့ ပြည်သူ့ကာကွယ်ရေးပူးပေါင်းတပ်တွေကြား တိုက်ပွဲပေါင်း ၅၀၇ ကြိမ် ဖြစ်ပွားခဲ့ပြီး စစ်ကောင်စီတပ်က ၁,၆၁၈ ယောက် သေဆုံးကာ ပြည်သူ့ကာကွယ်ရေးတပ်ဘက်က ၁၈၃ ယောက် ကျဆုံးခဲ့ပါတယ်။

စစ်ပွဲရဲ့ နောက်ဆက်တွဲဆိုးကျိုးတွေကြောင့် အရပ်သား ၃၇၉ ယောက် သေဆုံးခဲ့ပါတယ်။ ဒါ့အပြင် ထိခိုက်ပျက်စီးတဲ့ ဘာသာရေးအဆောက်အဦ ၂၇ ခု၊ နေအိမ်ပေါင်း ၁,၂၄၇ အိမ် ရှိခဲ့တယ်လို့ တိုးတက်သော ကရင်နီပြည်သူအင်အားစုက နိုဝင်ဘာ ၁ ရက်မှာ ထုတ်ပြန်ထားပါတယ်။

စစ်ကောင်စီတပ်ရဲ့ မြေလှန်ဖျက်ဆီးတဲ့ စစ်ဆင်ရေးကြောင့် ရှမ်းပြည်တောင်ပိုင်း မိုးဗြဲအင်း အရှေ့ဘက်ခြမ်း ကျေးရွာတွေက နေအိမ် ၁၀၀ ကျော် မီးရှို့ဖျက်ဆီးခံခဲ့ရပြီး ပြည်သူ ၄၀၀၀ လောက် ထွက်ပြေးတိမ်းရှောင်နေရတယ်လို့ ရှမ်းလူ့အခွင့်အရေးမဏ္ဍိုင်က ထုတ်ပြန်ပါတယ်။

ပြီးခဲ့တဲ့ မေလလယ်ပိုင်းကစတင်ကာ စစ်ကောင်စီတပ်နဲ့ ပြည်သူ့ကာကွယ်ရေးတပ်ဖွဲ့တွေကြား တိုက်ပွဲဖြစ်ပွားပြီးနောက် မိုးဗြဲအင်းအရှေ့ဘက်ခြမ်းမှာ စစ်ကောင်စီတပ်က မြေလှန်ဖျက်ဆီးတဲ့ စစ်ရေးလှုပ်ရှားမှုပြုလုပ်ခဲ့ပြီး နေအိမ် ၁၀၀ ကျော် ဖျက်ဆီးခဲ့တာလို့ ထုတ်ပြန်ထားပါတယ်။

မေ ၁၂ ရက်နေ့က ဖယ်ခုံပြည်သူ့ကာကွယ်ရေးတပ်ဖွဲ့က ညောင်ရွေမြို့တောင်ဘက် မိုးဗြဲညောင်ရွှေလမ်းမကြီးပေါ်ရှိ စစ်ကောင်စီနဲ့ ပအိုးဝ်ပြည်သူစစ်တို့ ပူးတွဲစခန်းချတဲ့ ထီရီးကျေးရွာကင်းစခန်းကို ဝင်ရောက်တိုက်ခိုက်ပြီးနောက်ပိုင်း ခမရ ၄၂၂ တပ်နဲ့ PNO တပ်တွေဟာ ဖယ်ခုံမြို့ မိုးဗြဲအင်းအရှေ့ခြမ်းရှိ လွယ်ပေါ်ကျေးရွာအုပ်စုအတွင်း တပ်ဖြန့်ခဲ့တာလို့ ဆိုပါတယ်။

တပ်ဖြန့်ချိန်ကစပြီး စစ်ကောင်စီတပ်နဲ့ ပြည်သူ့ကာကွယ်ရေးတပ်တို့အကြား တိုက်ပွဲဖြစ်ပွားခဲ့ပြီး မေ ၁၅ ရက်နေ့မှာ‌တော့ စစ်ကောင်စီက လေကြောင်းတိုက်ခိုက်မှုတွေ ပြုလုပ်ခဲ့တဲ့အတွက် လွယ်ပေါကျေးရွာအုပ်စုက ပြည်သူ ၄၀၀၀ ကျော် နေရာအနှံ့ ပြန့်ကျဲ ထွက်ပြေးတိမ်းရှောင်ခဲ့ရပါတယ်။

မေ ၁၆ ရက်နေ့မှာတော့ စစ်ကောင်စီတပ်မ ၆၆ က လွယ်ပေါ်ကျေးရွာအပါအဝင် မိုးဗြဲ-ညောင်ရွှေလမ်းတလျှောက် ဖြန့်ကျက်ခြံရံပြီး အဆိုပါ နေ့ညနေမှာပဲ ဆောင်နန်းခဲကျေးရွာကို တိုက်ပွဲမရှိဘဲ မီးရှိုဖျက်ဆီးခဲ့တာလို့ ထုတ်ပြန်ထားပါတယ်။

“နေအိမ်များကို ဓာတ်ဆီလောင်းကာ မီးရှို့ခဲ့ကြခြင်းဖြစ်တယ်။ နောက်နေ့မနက်မှာ ကျေးရွာအတွင်း ရှိနေအိမ် ၄၀ ကျော်သည် မီးလောင်ပျက်စီးသွားသည်။ ”

ဒါ့အပြင် စစ်ကောင်စီတပ်တွေက လွယ်ပေါ်ကျေးရွာအုပ်စုထဲက နန်းပေါ်လုံ၊ နန်းဆွန့်၊ မခေခမ်း၊ လဟယ် အစရှိတဲ့ ကျေးရွာတွေကိုလည်း ဆက်တိုက်ဆိုသလို မီးရှို့ဖျက်ဆီးမှုတွေ လုပ်ဆောင်ခဲ့ကြောင်း ရှမ်းလူ့အခွင့်အရေးမဏ္ဍိုင်ရဲ့ ထုတ်ပြန်ချက်အရ သိရပါတယ်။

စစ်ကောင်စီတပ်တွေဟာ လွယ်ပေါကျေးရွာအုပ်စုအတွင်း ဆက်လက်စခန်းချနေထိုင်ပြီး ပြည်သူတွေရဲ့ နေအိမ်တွေကို မွှေနှောက်လုယက်ခဲ့ကြသလို မြေမြှုပ်မိုင်းတွေထောင်ထားတာ၊ လမ်းသွားလမ်းလာပြည်သူတွေကို ရမ်းသန်းပစ်ခတ်တာ စတဲ့ လူ့အခွင့်အရေး ချိုးဖောက်မှုတွေ လုပ်ဆောင်တဲ့အတွက် ကျေးရွာသူကျေးရွာသားတွေဟာ အိမ်မပြန်ရဲဘဲ ကြောက်ရွံ့နေကြရတယ်လို့ ဆိုပါတယ်။

ဘွယ်ပေါကျေးရွာအုပ်စုမှာ နေထိုင်သူအများစုဟာ ရှမ်းလူမျိုးတွေဖြစ်ပြီး သူတို့ရဲ့ အသက်မွေးဝမ်းကျောင်းဖြစ်တဲ့ ဆန်၊ ပြောင်း စိုက်ပျိုးတာတွေကို အခုနှစ်တိုက်ပွဲကြောင့် လုပ်ကိုင်နိုင်ခြင်းမရှိကြဘူးလို့ ထုတ်ပြန်ထားပါတယ်။