ရှမ်းပြည်မြောက်ပိုင်း၊ ကျောက်မဲခရိုင်၊ သီပေါမြို့နယ်၊ ကုန်းသာကျေးရွာမှာ ဧပြီ ၂၆ ရက် မနေ့မွန်းလွဲပိုင်းက မိုးသက်လေပြင်းကျလို့ ဘုန်းကြီးကျောင်းနဲ့ နေအိမ်အလုံး ၂၀ လောက် ခေါင်မိုးတွေလန် ပျက်စီးသွားပါတယ်။

မနေ့မွန်းလွဲ ၁ နာရီခွဲကနေ ၂ နာရီထိ မိုးရောလေပါ တိုက်ခတ်လာလို့ ကုန်းသာရွာဦး ဘုန်းတော်ကြီးကျောင်း ခေါင်မိုးက သွပ်တွေ လန်ထွက်ပျက်စီးပြီး သီလရှင်ဇရပ်မှာ သစ်ပင် လဲပြိုကျလို့ ပျက်စီးကြောင်း၊ ရွာထဲကအိမ်တွေလည်း ခေါင်မိုးတွေ လန်ကုန်တာလို့ ကုန်းသာရွာသား ၁ ဦးက ဒီဗွီဘီကို ပြောပါတယ်။ 

“မိုးရော လေပါ တပြိုင်တည်းလာတယ်။ လေက အရမ်းပြင်းတော့ ကုန်းသာကျောင်း ပင်မကျောင်းဆောင်က ခေါင်မိုးလန်ထွက်သွားပြီး ကျောင်းဝင်းထဲက သစ်ပင်ကြီးတွေ ပြိုလဲတယ်။ တစ်ပင်က သီလရှင်ကျောင်းပေါ်ကို ပိကျလို့ အဲဒီကျောင်းလည်း ပျက်စီးတယ်။”

လေပြင်းတွေကြောင့် ကုန်းသာရွာက နေအိမ် ၁၇ လုံးနဲ့ ဟိုနောင်ရွာမှာ နေအိမ် ၂ လုံး၊ ရပ်ကွက် ၃ မှာ ၁ လုံးပျက်စီးသွားပြီး အများအားဖြင့် သွပ်ခေါင်မိုးတွေလန်ထွက်ကုန်တဲ့အပြင် သရက်သီး၊ ပိန္နဲသီးတွေလည်း ကြွေကျကုန်ကြောင်း ၊ လူထိခိုက်ဒဏ်ရာရတာတော့ မရှိဘူးလို့ ဆိုပါတယ်။ 

အပျက်အစီးစာရင်းတွေကို ကျေးရွာအုပ်ချုပ်ရေးဘက်က စာရင်းကောက်ပြီး သက်ဆိုင်ရာကို တင်ပြထားပေမဲ့ ဘယ်လိုအကူအညီရမလဲဆိုတာတော့ မသိဘူးလို့ ရွာသားက ပြောပါတယ်။ 

ကုန်းသာရွာမှာ သီပေါမြို့ မြောက်ဘက် ၁၀ မိုင်လောက်အကွာ သီပေါနဲ့ လားရှိုးမြို့ကြားက အိမ်ခြေပေါင်း ၅၀၀ ကျော်တဲ့ ရွာကြီးတစ်ရွာဖြစ်ပြီး လွန်ခဲ့တဲ့ ၂၀၂၀ ပြည့်နှစ်ကလည်း မိုးသီးတွေကြွေ မိုးသက်လေပြင်းဒဏ်ခံခဲ့ရလို့ အိမ်ခြေ ၁၄၀ ကျော် ပျက်စီးခဲ့ရပါတယ်။ 

ထိုင်း-မြန်မာနယ်စပ် တာ့ခ်ခရိုင်ထဲမှာ ဧပြီ ၁၈ ရက်ညက မိုးသက်လေပြင်းကျရောက်ပြီး  တာ့ခ်၊ ဝမ်းကျောက်၊ ဆာမ်ငေါင်းနဲ့ ဖုပ်ဖရ စတဲ့မြို့နယ်တွေမှာ ပျက်စီးဆုံးရှုံးတာတွေ ရှိခဲ့တယ်လို့ AEC ထိုင်းအာဆီယံသတင်းမှာ ဖော်ပြပါတယ်။ 

မိုးသက်လေပြင်းကျပြီး မိုးကြိုးပစ်တာတွေကြောင့် သစ်ပင်တွေ၊ ဓာတ်မီးတိုင်၊ ပိုစတာကြီးတွေ လဲပြိုပြီး လျှပ်စစ်မီးပြတ်တောက်ကုန်တာလို့ ဆိုပါတယ်။ 

မိုးသက်လေပြင်းကြားမှာ မတော်တဆထိခိုက်မှုကြောင့် သေဆုံးဒဏ်ရာရသူရှိကြောင်း၊ ဖုပ်ဖရမြို့နယ် လူမ့်ထိုင်းဖထနားရပ်ကွက် ဘန့်ဖထီလမ်းပေါ်မှာ ဆိုင်ကယ်စီးနေသူတယောက်ပေါ် သစ်ပင်လဲကျလို့ သေဆုံးသွားပြီး တာ့ခ်မြို့ ကော်လန်းရပ်ကွက် ဖဟွန်ယိုးထင်းလမ်းပေါ်မှာတော့ ဆိုင်ကယ်စီးနေရင်းနဲ့ ရှေ့ကလဲကျလာတဲ့ သစ်ပင်ကိုဝင်တိုက်မိပြီး ဒဏ်ရရသွားတာကြောင်း၊ တာ့ခ်မြို့နယ် ဆာထွန်းကျေးရွာမှာလည်း ၂ ဦး ဒဏ်ရာရပြီး ဘာကြောင့်လဲဆိုတာတော့ သတင်းမှာ ဖော်ပြထားခြင်းမရှိပါဘူး။ 

မိုးသက်လေပြင်းဒဏ်ခံရသူတွေကို လိုအပ်တဲ့အကူအညီပေးဖို့ ဒီကနေ့ ဧပြီ ၁၉ ရက်နေ့မှာ သက်ဆိုင်ရာ တာဝန်ရှိသူတွေက မြို့နယ် ၄ ခုလုံးရဲ့ ပျက်စီးဆုံးရှုံးမှုစာရင်းတွေကို လိုက်လံကောက်ယူနေတယ်လို့ သတင်းမှာ ဖော်ပြပါတယ်။ 

အလားတူ ထိုင်းမြောက်ပိုင်း ချင်းမိုင်ခရိုင် ချင်းမိုင်မြို့ထဲမှာလည်း မနေ့ညက မိုးသက်လေပြင်းကျ တာကြောင့် သစ်ပင်တချို့လဲကျပြီး  အနိမ့်ပိုင်းလမ်းမပေါ်မှာ ရေလွှမ်းမှုတွေဖြစ်ခဲ့ပါတယ်။ 

ထိုင်းနိုင်ငံမှာ အပူပိုင်းမုန်တိုင်းဝင်ရောက်တာကြောင့် နောက် ၂၄ နာရီအတွင်း ထိုင်းမြောက်ပိုင်း နဲ့ အရှေ့မြောက်ပိုင်းဒေသတွေမှာ မိုးသည်းထန်စွာရွာနိုင်ပြီး ရွာရန်ရာနှုန်း ၆၀ ရှိတယ်လို့ ထိုင်းမိုးဇလဌာနက ထုတ်ပြန်ထားပါတယ်။