မွန်ပြည်နယ်၊ ရေးမြို့နယ်မှာ စက်သုံးလောင်စာဆီတွေ ပြတ်လပ်လာတာကြောင့် မီတာခတွေ ထပ်မံတိုးမြှင့်ကောက်ခံသွားမယ်လို့ မီးလင်းရေးကော်မတီက သြဂုတ် ၁၅ ရက်နေ့မှာ အသိပေးထုတ်ပြန်လိုက်ပါတယ်။

မီးလင်းရေးကော်မတီဘက်ကတော့ အခုလို စက်သုံးလောင်ဆီတွေ အလွယ်တကူ ဝယ်ယူဖို့ နိုင်ငံခြားငွေ အလုံလောက်မရှိတာရယ်၊ ဒီဇယ်ဈေးတွေ၊ ဒေါ်လာဈေးတွေ မြင့်တက်သွားတာကြောင့် အခုလကစပြီး မီးသုံးစွဲခ တယူနစ်ကို ကျပ် ၁,၃၅၀ ကနေ ကျပ် ၁,၅၅၀ အထိ ပေးဆောင်ရမှာဖြစ်ပြီး ၂၄ နာရီအစား မနက် ၉ နာရီမှ မွန်းလွဲ ၃ နာရီအထိ လျှပ်စစ်မီးကို ယာယီဖြတ်တောက်ထားမယ်လို့ ဆိုပါတယ်။

“လက်ရှိမှာ အခုမီတာခနဲ့၊ ပြီးတော့ မီးကလည်း နေ့ဘက်ဆို မလာရင် မီးစက်နဲ့သုံးပြီး လုပ်ခဲ့ရင်လည်း အခုဓာတ်ဆီဈေးနဲ့က ဘယ်လိုမှ အလုပ်နဲ့ တွက်ခြေမကိုက်ဘဲ တပိုင်တနိုင် အလုပ်က ထိခိုက်ကြတယ်” လို့ လုပ်ငန်းလုပ်ကိုင်သူတွေက ပြောပါတယ်။

အိမ်ရှင်မတွေကလည်း “အခုအလုပ်တွေက အဆင်မပြေကြတဲ့ ကြားကနေ အရင်က တလဆို ကျပ် ၃၀,၀၀၀ လောက်ကုန်တာ။ အခု ဈေးဆို ကျပ် ၅၀,၀၀၀ လောက်အထိ ကုန်ကျမယ်။ အခုက စားဖို့လည်းပူရ၊ ရေ မီးကအစ ကုန်စျေးနှုန်းကပါ ကြီးပြန်တော့ အိမ်တအိမ်ရဲ့ ကုန်ကျစရိတ်က များပြီးဆိုတော့ ရှေ့ဆက် ရပ်တည်ဖို့က သာမန်လူတန်းစားတွေမှာ တနေ့တခြား ခက်ခဲလာနေတယ်” လို့ ပြောပါတယ်။

အခု ဒေါ်လာဈေးနဲ့ စက်သုံးဆီဈေးတွေ စံချိန်တင် တဖန်ပြန်မြင့်တက်လာခဲ့တာကြောင့် အာဏာသိမ်းပြီး တနှစ်ကျော်ကာလအတွင်းမှာ အလုပ်အကိုင် ရှားပါးလာသလို ပုံမှန်ဝင်ငွေတွေ မရှိတော့ ပြည်ပနိုင်ငံတွေ ထွက်ခွာကြတဲ့သူတွေလည်း နေ့စဉ်နဲ့အမျှ ရှိနေပါတယ်။

စစ်အုပ်စုခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြီးခဲ့တဲ့ရက်က မြန်မာနိုင်ငံအတွင်း စက်သုံးလောင်စာဆီတွေ လျှော့သုံးပြီး ဝယ်ယူကြဖို့ ပြောဆိုရာကနေ တနိုင်ငံလုံးမှာ စက်သုံးဆီဈေးတွေ ထပ်မံမြင့်တက်လာသလို စက်သုံးဆီဆိုင်တွေမှာ ဆီပြတ်လပ်မှုနဲ့ ကြုံနေရတာပါ။

စက်သုံးဆီ ဂါလန် ၁၃ သိန်းလောက် ရောက်ရှိနေပြီး လာမယ့်ရက်ပိုင်းအတွင်း စက်သုံးဆီ တင်ဆောင်လာတဲ့ သင်္ဘော ၁၂ စင်း ထပ်မံဝင်ရောက်လာဖို့လည်း ရှိတယ်လို့ စစ်ကောင်စီ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက မနေ့က ပြောထားပါတယ်။

ပြည်တွင်းစက်သုံးဆီ အလုံအလောက် ရှိနေတဲ့အတွက် ပြတ်လပ်မှာကို စိုးရိမ်စရာ မရှိဘူးလို့လည်း ဆိုပါတယ်။

စက်သုံးလောင်စာဆီဈေးတွေ ဆက်လက်မြင့်တက်လာတဲ့အတွက် မွန်ပြည်နယ်၊ ရေးမြို့နယ်က မီတာခကို ထပ်မံတိုးမြှင့် ကောက်ခံသွားမယ်လို့ မီးလင်းရေးကော်မတီဘက်က ထုတ်ပြန်ပါတယ်။

အခု စက်သုံးဆီဈေးတွေ ထပ်မံမြင့်တက်နေတာကြောင့် ဇွန်လမှာသုံးစွဲထားတဲ့ မီတာခကို တယူနစ် ကျပ် ၁,၂၀၀ ကနေ ကျပ် ၁,၃၅၀ ကို တိုးြမှင့်သတ်မှတ်လိုက်ပြီး တယူနစ်ကို ကျပ် ၁၅၀ ထပ်မံတိုးမြှင့်ပြီး ဇူလိုင်လမှာ စတင်ပေးသွင်းရမယ်လို့ ဆိုပါတယ်။

မီတာခတွေ စံချိန်တင် ထပ်မံမြင့်တက်သွားလို့ အိမ်သုံးသမားတွေ မသုံးစွဲနိုင်တဲ့အခြေအနေနဲ့ ရင်ဆိုင်ကြုံတွေ့နေရတယ်လို့ မြို့ခံတွေက ပြောပါတယ်။

မီတာခ တယူနစ် ကျပ်  ၉၀၀ ကနေ အခု မတ်လ တယူနစ် ကျပ် ၁,၂၀၀ မြင့်တက်ရာကနေ စစ်တပ်အာဏာသိမ်းပြီး ၁ နှစ်ကျော်ကာလအတွင်းမှာ အခု ၁,၃၅၀ ကျပ်အထိ ထပ်မံ မြင့်တက်လာတဲ့အတွက် ယူနစ်ဈေးတွေ အမြင့်ဆုံးအခြေအနေနဲ့ ဒေသခံတွေ သုံးစွဲနေရတာပါ။

ဒေသခံတဦးက “အခုလို အလုပ်အကိုင်တွေ အဆင်မပြေတဲ့ကြားက နေ့စဉ်ပုံမှန်ဝင်ငွေတွေတောင် မရှိလာတဲ့အခါ စားဝတ်နေရေးတွေမှာ အခက်ခဲရှိပြီး နေရတော့ မီတာခတွေပါ ထပ်မံတိုးမြှင့် ကောက်ခံမယ်ဆိုတော့ လျှပ်စစ်မီး ချွေတာသုံး ရတာထက် မသုံးစွဲတာ ပိုပြီး သင့်တော်မယ်” လို့ မီးသုံးစွဲသူတဦးက ပြောပါတယ်။

အခု ဆီစျေးတွေက ၄ ဆလောက်တက်သွားတဲ့အတွက် မီတာခ ထပ်မံတိုးမြှင့် ကောက်ခံရတာဖြစ်ပြီး ဆီဈေးတွေ ပြန်လည်ကျဆင်းလာပါက မီတာခ ပြန်လျှော့ချပေးသွားမယ်လို့ မီးလင်းရေးကော်မတီက ဆိုပါတယ်။

ရေးမြို့နယ်မှာ နိုင်ငံတော်ရဲ့ လျှပ်စစ်ဓာတ်အားလိုင်းကို ဒီနေ့အထိ သုံးစွဲနိုင်ခြင်း မရှိသေးသလို မြို့ပေါ်မှာ ပုဂ္ဂလိက မီးလင်းရေးကော်မတီက လျှပ်စစ်မီးကိုသာ အမှီပြု သုံးစွဲနေရပြီး နယ်ကျေးရွာတွေဘက်မှာတော့ ကိုယ့်အားကိုယ်ကိုးမီးစက်နဲ့ မီးဖြန့်ဖြူးပေးကာ တယူနစ်ကို ကျပ် ၁,၅၀၀ အထိပေးပြီး သုံးစွဲရတယ်လို့ ဒေသခံတွေက ပြောပါတယ်။

ပြီးခဲ့တဲ့ မတ် ၅ ရက်က မီတာခ တယူနစ် ကျပ် ၉၀၀ ကောက်ခံလို့ဆိုပြီး ရေး PDF တွေက သတိပေးတဲ့အနေနဲ့ ရေးမီးလင်းရေးကော်မတီရုံးကို မိုင်းခွဲထားခဲ့ပါတယ်။

စစ်တပ်က အာဏာသိမ်းတဲ့ ၁ နှစ်ကျော်ကာလအတွင်းမှာ စက်သုံးလောင်ဆီစျေးတွေ အခြေခံစားသောက်ကုန်တွေ စံချိန်တင် အဆမတန် မြင့်တက်လာနေခဲ့တာပါ။

အခြေခံလူတန်းစား သာမန်လက်လုပ်လက်စားတွေမှာ စားဝတ်နေရေး တနေ့တခြား ပိုပြီးခက်ခဲလာပြီး တပိုင်တနိုင်လုပ်ငန်းတွေကအစ ရပ်နားထားရဖွယ်ရှိပြီး အလုပ်လက်မဲ့တွေ တနေ့တခြား များပြားလာနေသလို တဖက်နိုင်ငံတွေမှာ သွားရောက်လုပ်ကိုင်နေကြတဲ့သူတွေ အများပြားရှိနေပါတယ်။