စစ်ကိုင်းတိုင်း ရေဦး၊ ရွှေဘို၊ ဒီပဲယင်း ၊ အရာတော်မြို့နယ်ရှိ ကျေးရွာပေါင်း ၃၈ ရွာမှ မီးရှို့ဖျက်ဆီးခံခဲ့ရတဲ့ ပြည်သူတွေအတွက် နေအိမ်တွေကို S&C မီးဘေး စစ်ဘေးပညာရေး ကူညီစောင့်ရှောက်ရေးအဖွဲ့က ဦးဆောင်ကာ တည်ဆောက်လှူဒါန်းခဲ့တာ နေအိမ် ၆၀၀ ရှိသွားပြီလို့ သိရပါတယ်။

ပြီးခဲ့တဲ့ သုံးလအတွင်းမှာ နေအိမ်အလုံး ၅၀၀ တည်ဆောက်ပြီးစီးခဲ့ပြီး အခု ဧပြီ ၅ ရက်နေ့မှာတော့ လေးလအတွင်း စုစုပေါင်း နေအိမ် ၆၀၀ ပြည့်သွားတာလို့ သိရပါတယ်။

“အိမ်တွေပြန်တည်ဆောက်ဖို့ အဓိကကျတဲ့ ငွေကြေး အခက်အခဲတွေ၊ သွားလာရခက်ခဲတဲ့ နေရာတွေ၊ အသက် ဘေးအန္တရာယ်အခက်အခဲတွေ၊ သယ်ယူပို့ဆောင်ရေး အခက်အခဲတွေ စသည်ဖြင့် အခက်အခဲမျိုးစုံကြားကနေပြီး နေအိမ်မီးရှို့ခံရတဲ့ ပြည်သူများအတွက် နားခိုစရာအရိပ်အဖြစ် အိမ်တွေ တည်ဆောက် ပေးနိုင်ခဲ့တာ၊ မီးရှို့ခံထားရတဲ့ ကျေးရွာများအတွက် နေအိမ်များ ပြန်လည် တည်ဆောက်ပေးဖို့ အိမ်အလုံးရေ ၁၀၀၀ အထိ ရည် ရွယ်ထားတယ်” လို့ S&C မီးဘေး စစ်ဘေးပညာရေး ကူညီစောင့်ရှောက်ရေး အဖွဲ့တာဝန်ရှိသူက ပြောပါတယ်။

ပြည်တွင်းပြည်ပ အလှူရှင်တွေ စုပေါင်းတည်ဆောက် လှူဒါန်းထားတဲ့ နေအိမ်တွေ ပြည်သူကို အပ်နှံတဲ့အချိန်မှာလည်း အညာမြေဒေသ ပြန်လည် စိမ်းလန်းစေဖို့ ရည်ရွယ်ချက်နဲ့ အိမ်ရှင်ပြည်သူက သစ်ပင် ၅ ပင်ကို မဖြစ်မနေ စိုက်ပေးရတယ်လို့လည်း သိရပါတယ်။

မတ်လ ၁ လတာအတွင်း NUG အစိုးရ၊ ပြည်ထဲရေးနှင့် လူဝင်မှုကြီးကြပ်ရေးဝန်ကြီးဌာန၊ မီးသတ်ဦးစီးဌာနက စာရင်းပြုစု ထုတ်ပြန်ချက်အရ စစ်ကောင်စီတပ်တွေဟာ စစ်ကိုင်းတိုင်းထဲမှာ အကြိမ်ရေ ၅၀ မီးရှို့ဖျက်ဆီးမှုတွေပြုလုပ်ခဲ့ပြီး မီးလောင်ပျက်စီးခဲ့ရတဲ့ နေအိမ်ပေါင်း ၃,၁၀၇ လုံးအထိ ရှိခဲ့တယ်လို့ သိရပါတယ်။

မကွေးတိုင်း၊ ပေါက်မြို့နယ်မှာ တော်လှန်ရေးတပ်ဖွဲ့တွေ စုပေါင်းပြီး စစ်ဘေးရှောင် မီးဘေးသင့်ပြည်သူတွေအတွက် “စာနာသနား စစ်ရှောင်များသို့” အစီအစဉ်နဲ့  ကံစမ်းမဲ့ ကမ်ပိန်း လုပ်နေတယ်လို့ Rocket Fighter လက်နက်ထုတ်လုပ်ရေးတပ်ဖွဲ့ကနေ သိရပါတယ်။

ပေါက်မြို့နယ်ထဲမှာ စစ်ကောင်စီတပ်တွေ မီးရှို့ဖျက်ဆီးခဲ့လို့ မီးလောင်ကျွမ်းခဲ့တဲ့ အိမ်ခြေအရေအတွက်က ၇၆၀၀ လောက်ရှိပြီး မီးဘေးသင့် စစ်ဘေးရှောင်ပြည်သူ အရေအတွက်က ၁၅၀၀ လောက်ရှိနေတယ်လို့ Rocket Fighter လက်နက်ထုတ်လုပ်ရေးနပ်ဖွဲ့ရဲ့ တာဝန်ခံ ဗိုလ်လပြည့်က ပြောပါတယ်။

အဲဒီစစ်ဘေးရှောင် မီးဘေးသင့် ပြည်သူတွေအတွက် ရန်ပုံငွေရရှိအောင် Rocket Fighterတပ်ဖွဲ့ ပခုက္ကူခရိုင် တပ်ရင်း(၄)တပ်ခွဲ(၁)CAF-SPUPDF၊ ပခုက္ကူခရိုင် အမှတ်(၁၈)တပ်ရင်း၊ ထိုင်းအခြေစိုက် သွေးမအေးတဲ့ ဒေါင်မလေးအဖွဲ့တို့က တဖွဲ့ကို ၅ သိန်းကျပ်စီ စုဆောင်းပြီး ရွှေထည်ပစ္စည်းတွေဝယ်ယူကာ ကံစမ်းမဲကမ်ပိန်း ပြုလုပ်ပေးကြတာလို့ ဆိုပါတယ်။

ဆုမဲတွေကတော့ ၅ သိန်းကျပ်တန် ရွေဆွဲကြိုး ၂ ကုံး၊ ဟန်းချိန်း ၁ခု၊ နားကပ် တရံဖြစ်ပြီး ကံစမ်းမဲ လက်မှတ်တစောင်ကို ၁၀၀၀၀ ကျပ်နှုန်းနဲ့ရောင်းချကာ အစောင်ရေ ၁၀၀၀ ရောင်းချပေးဖို့ လျာထားကာ  ဧပြီလ ၁၆ ရက်နေ့မှာ ဖွင့်လှစ်ပေးမယ်လို့ ဗိုလ်လပြည့်က ပြောပါတယ်။

အဲဒီကမ်ပိန်းကနေ ရရှိခဲ့တဲ့ ရန်ပုံငွေတွေအားလုံးကိုတော့ ပေါက်မြို့နယ်အတွင်းမှာရှိတဲ့ မီးဘေးသင့် စစ်ဘေးရှောင်ပြည်သူတွေကိုထောက်ပံ့ကူညီပေးသွားမယ်လို့ ဆိုပါတယ်။

ဒါကြောင့်မို့ ပြည်တွင်းပြည်ပမှာရှိတဲ့ မိဘပြည်သူတွေအနေနဲ့ ဒီကမ်ပိန်းမှာ ပါဝင်ကူညီပေးကြဖို့နဲ့ ရပ်ဝေးကနေ မဲပေါက်ခဲ့တဲ့ သူတွေကိုလည်း ပစ္စည်းတန်ဖိုးအတိုင် ငွေလွှဲပြောင်းပေးသွားမယ်လို့ ဆိုပါတယ်။

စစ်အာဏာသိမ်းပြီးနောက် ၂၀၂၃ ခုနှစ် ဖေဖော်ဝါရီ ၂၈ ရက်အထိ မကွေးတိုင်းအတွင်းက ကျေးရွာတွေကို စစ်တပ်က စစ်ကြောင်ထိုး မီးရှို့ဖျက်ဆီးခဲ့လို အိမ်ခြေပေါင်း ၉၀၁၉ လုံးမီးလောင်ဆုံးရှုံးခဲ့ကာ တနိုင်ငံလုံးအတိုင်းတာနဲ့ အိမ်ခြေပေါင်း ၆၀၄၅၉ အိမ်ကို မီးရှို့ဖျက်ဆီးခံရတယ်လို့  Data For Myanmar က မတ်လ ၁၉ ရက်နေ့မှာ ထုတ်ပြန်ထားပါတယ်။