ကချင်ပြည်နယ်၊ မြစ်ကြီးနားမြို့ မီးရထားဝင်းအတွင်း နေထိုင်တဲ့ ပြည်သူတွေကို စစ်ကောင်စီက နိုဝင်ဘာ ၁၅ ရက် နောက်ဆုံးထား ပြောင်းရွှေ့ခိုင်းတဲ့အတွက် အခက်အခဲဖြစ်နေကြတယ်လို့ မီးရထားဝင်းအတွင်း နေထိုင်သူတွေက ပြောပါတယ်။
လက်နက်အပြည့်အစုံနဲ့ စစ်ကောင်စီတပ်ဖွဲ့ဝင် ၁၀ ယောက်လောက်နဲ့ မီးရထားဝန်ထမ်းက အောက်တိုဘာ ၂ ရက်က ကျူးကျော်နေထိုင်သူတွေလို့ အကြောင်းပြကာ အိမ်ခြေ ၂၅၀ လောက်ကို အသိပေးကြေညာစာတွေ လိုက်လံပေးဝေပြီး ဖယ်ရှား နှင်ထုတ်ခဲ့တာပါ။
မီးရထားဝင်းအတွင်း နေထိုင်သူတယောက်က “နိုဝင်ဘာ ၁၅ ရက်နေ့ နောက်ဆုံးထား ဖယ်ရှားဖို့ စစ်ကောင်စီတပ်ဖွဲ့နဲ့ မီးရထားဝန်ထမ်း တဦးက အကြောင်းကြားစာ လိုက်ဝေတာ။ ဝန်ထမ်း ဟုတ်ဟုတ် မဟုတ်ဟုတ် ကျူးကျော်နေထိုင်သူတွေကို ဖယ်ရှားပေးဖို့ စာလိုက်ဝေတယ်။ တနည်းပြောရရင် နှင်ထုတ်တာပေါ့။ ဒီလိုကာလမှာ ဖယ်ရှားခိုင်းတာက အတော်လေး အခက်အခဲဖြစ်တယ်။ လိုင်းခန်းတွေနဲ့ ဆိုင်ခန်းတွဲတွေတော့ ဖယ်ရှားဖို့ စာဝေတာ မတွေ့ဘူး” လို့ ပြောပါတယ်။
အခုလို အတင်းအကျပ် ဖယ်ခိုင်းနေတဲ့အတွက် မီးရထားဝင်းအတွင်း ဆောက်လုပ်ထားတဲ့ နေအိမ် ၂၅၀ လောက်မှာ နေထိုင်တဲ့ ဝန်ထမ်းတွေနဲ့ မိသားစုတွေ အခက်အခဲနဲ့ ကြုံတွေ့နေကြရပါတယ်။
မီးရထားဝန်ထမ်းဟောင်းတယောက်က “ဒီရထားဝင်းထဲမှာက CDM ဝန်ထမ်းတွေကော Non CDM ဝန်ထမ်းတွေကော နေကြတယ်။ အဲဒါကို ကျူးအဖြစ်သတ်မှတ်ပြီး ဖယ်ရှားခိုင်းတာ။ ဒီမှာက အတော်လေးကို အခက်အခဲဖြစ်နေတာ။ တချို့ဝန်ထမ်းဟောင်းတွေဆို အပြင်မှာ ကျပန်းလုပ်စားနေရတယ်” လို့ ပြောပါတယ်။
မြစ်ကြီးနား မီးရထားဝင်းအတွင်း နေထိုင်တဲ့ CDM ဝန်ထမ်းတွေကို ပြီးခဲ့တဲ့ ဇန်နဝါရီ ၁၄ ရက်က လည်း တပတ်အတွင်း ပြောင်းရွှေ့ဖို့ နို့တစ်စာထုတ်ခဲ့ဖူးပြီး တခြားနေရာတွေကို ပြောင်းရွှေ့နေထိုင်တဲ့ ဝန်ထမ်းတွေရှိသလို အခက်အခဲ အမျိုးမျိုးကြောင့် ရထားဝင်းအတွင်း ဆက်လ်က နေထိုင်နေကြသူတွေလည်း ရှိနေပါတယ်။
စစ်အာဏာသိမ်းပြီးနောက်ပိုင်း မြစ်ကြီးနားဘူတာမှာ CDM ပြုလုပ်ထားတဲ့အတွက် ဝန်ထမ်းအဖြစ်က ထုတ်ပယ်ခံထားရသူ မီးရထားဝန်ထမ်း ၁၀၀ နီးပါးလောက် ရှိပါတယ်။
မင်္ဂလာတောင်ညွန့်မြို့နယ် စက်ဆန်းရပ်ကွက်၊ စက်ဆန်းမီးရထားဝင်းအတွင်းက ဝန်ထမ်းတဦး နေအိမ်မှာ သြဂုတ် ၁၁ ရက် ညနေ ၅ နာရီက ဓားပြတိုက်ခံရပြီး ငွေကျပ်သိန်း ၁၃၀ ကျော်နဲ့ ရွှေတွေပါသွားတယ်လို့ ရပ်ကွက်နေသူတွေက ပြောပါတယ်။
မနေ့ ညနေ ၅ နာရီလောက်က မီးရထားဝင်း လိုင်းအမှတ် ၈၀၊ အခန်း A နေ တံတားဘောင် အလုပ်ရုံမှ အလုပ်ကြပ် ဦးစိုးဝင်း နေအိမ်ကို အမျိုးသား ခြောက်ဦး ကားတစီးနဲ့ ရောက်လာပြီး ဓားပြတိုက်ခဲ့တယ်လို့ ရပ်ကွက်နေသူတဦးက ပြောပါတယ်။
"ကားနဲ့ဓားပြ လာတိုက်တာ၊ ပစ်တာခတ်တာ မရှိတော့ ရပ်ကွက်ထဲက လူတွေလည်း မသိဘူး။ အိမ်ကို လာလည်တဲ့ ဧည့်သည်ပဲထင်ကြတာ၊ နောက်မှ ဓားပြတိုက်ခံရမှန်း သိတာ။"
ဦးစိုးဝင်းဟာ ညီမဖြစ်သူနဲ့အတူ လိုင်းခန်းမှာ ရှိနေချိန် ဓားပြ တိုက်ခံရတာဖြစ်ပြီး ထိုးကြိတ် ရိုက်နှက်ခံရမှုကြောင့် ဦးစိုးဝင်း နဲ့ ညီမဖြစ်သူတို့ ထိခိုက်ဒဏ်ရာတွေ ရရှိခဲ့တယ်လို့ အုပ်ချုပ်ရေးနဲ့ နီးစပ်သူတဦးက ပြောပါတယ်။
"ပရိုဘောက်အဖြူရောင်နဲ့ လူခြောက်ယောက်ရောက်လာပြီး တယောက်က ညီမဖြစ်သူကို ဓားနဲ့ထောက်ထားတယ်။ ကျန်တဲ့သူ ငါးယောက်က ဦးစိုးဝင်းပါးစပ်ကို တိတ်နဲ့ကပ်ပြီး ဝိုင်းပြီး ထိုးကြိတ်ပြီး အိပ်ခန်းထဲက ငွေသိန်း ၁၃၀ ကျော်နဲ့ရွှေခြောက်ကျပ်သားကို ယူသွားတယ်။"
ဓားပြတိုက်မှုဖြစ်ပြီးနောက် စစ်ကောင်စီတပ်နဲ့ ရဲတွေဟာ စက်ဆန်းမီးရထားဝင်းမှာ ပိတ်ဆို့ ရှာဖွေခဲ့ပေမဲ့ ဖမ်းဆီးရမိခြင်း မရှိဘူးလို့ ရပ်ကွက်နေသူတွေက ပြောပါတယ်။
လတ်တလောမှာ ဓားပြတိုက်မှုနဲ့ ပတ်သက်လို့ မင်္ဂလာတောင်ညွန့်မြို့နယ် ရဲစခန်းမှာ အမှုဖွင့်လှစ်ထားတယ်လို့ ဆိုပါတယ်။
