ကချင်ပြည်နယ်၊ ရွှေကူမြို့ တဖက်ကမ်း ရေလဲကျေးရွာကို စစ်ကောင်စီတပ်က မေလ ၄ ရက် ညနေပိုင်းက လက်နက်ကြီးနဲ့ ပစ်ခတ်ပြီး စစ်ကြောင်းထိုးဝင်ရောက်ကာ နေအိမ်တွေကို အကြမ်းဖက် မီးရှို့ဖျက်ဆီးသွားတယ်လို့ ဒေသခံတွေဆီက သိရပါတယ်။

ဒေသခံ အမျိုးသားတဦးက “မနက်အစောကြီးကတည်းက လက်နက်ကြီးနဲ့ ရွာကို လှမ်းပစ်နေတာ။ ညနေ ၆ နာရီလောက်မှာ ရွာထဲကိုဝင်ပြီး ရွာအစွန်ကအိမ်တွေကို မီးစရှို့တယ်။ ည ၇ နာရီခွဲလောက်မှာ ရွာအလယ်ပိုင်းကအိမ်တွေကို မီးထပ်ရှို့တယ်။ မီးလောင်တဲ့အနေအထားကတော့ ရွာလုံးကျွတ် ကုန်နိုင်တယ်။ ကျနော်တို့လည်း ဘေးလွတ်ရာ ပြေးနေရတော့ ဘယ်နှစ်အိမ်လောင်သွားလဲ တိတိကျကျ မသိဘူး” လို့ ပြောပါတယ်။

ရွှေကူမြို့နယ်မှာ KIA/PDF ပူးပေါင်းတပ်ဖွဲ့နဲ့ စစ်ကောင်စီတပ်တို့ ထိတွေ့တိုက်ပွဲတွေ မကြာခဏ ဖြစ်ပွားနေပြီး စစ်ကောင်စီတပ်က အရပ်သားပြည်သူတွေကို ဖမ်းဆီးတာ၊ နေအိမ်တွေကို မီးရှို့ဖျက်ဆီးနေလို့ ဒေသခံပြည်သူတွေဟာ နေရပ်စွန့်ခွာ ထွက်ပြေးတိမ်းရှောင်နေကြရတာပါ။

ရွှေကူမြို့နယ် အရှေ့ဘက်ခြမ်းက ကျေးရွာတွေကို မတ်လ ၂၁ ရက်က စစ်ကောင်စီတပ် ဝင်ရောက်စီးနင်းပြီး မီးရှို့ဖျက်ဆီးခဲ့တဲ့အတွက် စီသောင်ကျေးရွာက နေအိမ် ၂၀၀ ကျော်၊ စီမူကြီးကျေးရွာက နေအိမ် ၄၀ ကျော်၊ စီမူလေးကျေးရွာက နေအိမ် ၇၀ ကျော်၊ မံနားကျေးရွာက နေအိမ် ၄၀ ကျော်၊ တုံကောက်ကျေးရွာက နေအိမ် ၄၀ ကျော်၊ မံခါးကျေးရွာက နေအိမ် ၃၀ ကျော်၊ မံဝိန်းကျေးရွာက နေအိမ် ၁၀၀ ကျော်၊ စီမော်ကျေးရွာက နေအိမ် ၁၀၀ ကျော်၊ နန့်လတ်ကျေးရွာက နေအိမ် ၃၀ ကျော်၊ နောင်လတ်ကြီးကျေးရွာက နေအိမ် ၃၀ ကျော်နဲ့ စီသာကျေးရွာက နေအိမ် ၁၀၀ ကျော် မီးလောင်ပျက်စီးသွားပြီး ဒေသခံ ၁၀,၀၀၀ လောက် နေရပ်စွန့်ခွာ စစ်ဘေးတိမ်းရှောင်နေကြရပါတယ်။

ကချင်ပြည်နယ်၊ ဖားကန့်မြို့နယ်၊ ဆိုင်းတောင်ကျေးရွာမှာ ဧပြီ ၂၈ ရက် မနက်က ဒေသခံကာကွယ်ရေးတပ် PDF တွေ ရှိလို့ဆိုပြီး နေအိမ်တလုံးကို စစ်ကောင်စီတပ်က မီးရှို့ဖျက်ဆီးခဲ့ပါတယ်။

မှော်ရှန်ရပ်ကွက်မှာရှိတဲ့ နေအိမ်တလုံးမှာ PDF တွေ ဝင်ရောက်နေထိုင်လို့ဆိုပြီး စစ်ကောင်စီတပ် အင်အား ၂၀ နီးပါးက အိမ်သုံးဆောင်ပစ္စည်းနဲ့ မော်တော်ကားနှစ်စီးကို သိမ်းဆည်းပြီး နေအိမ်ကို မီးရှို့ဖျက်ဆီးသွားတာဖြစ်ကြောင်း ဒေသခံတွေဆီက သိရပါတယ်။

မှော်ရှန်ရပ်ကွက်မှာ နေထိုင်သူတဦးက “မနက် ၅ နာရီလောက်က စစ်ကား အသေးနှစ်စီးနဲ့ အင်အား ၂၀ ပတ်ဝန်းကျင်လောက် ရှိတယ်။ အိမ်ထဲကပစ္စည်းတွေ အတော်များများ သိမ်းသွားတယ်။ ကားနှစ်စီး သိမ်းယူသွားတယ်။ လူတွေကတော့ ဖမ်းဆီးခံရတာမရှိဘူး။ ပစ္စည်း‌တွေ သိမ်းပြီး အိမ်ကို မီးရှို့သွားတယ်။ အမှန်တကယ် PDF နေ မနေကတော့ ကျနော်လည်း မသိဘူး” လို့ ပြောပါတယ်။

ဒါ့အပြင် ဧပြီ ၂၇ ရက်ကလည်း မဇွပ်ယန်ကျေးရွာနဲ့ ဆန်ခါကျေးရွာက နေအိမ်တွေကို သော့တွေ ရိုက်ဖျက်ချိုးပြီး ငွေနဲ့ ဖုန်းတွေကို စစ်ကောင်စီတပ်က သိမ်းဆည်းယူဆောင်ပြီး ဒေသခံ ၆၀ ထက်မနည်းကို ဖမ်းဆီးစစ်ဆေးခဲ့ပါသေးတယ်။

ဖားကန့်မြို့နယ်မှာ မတ်လကုန်ပိုင်းက စတင်ကာ မဇွပ်ယန်၊ မဒဲ့ယန်၊ ဆန်ခါ စတဲ့ကျေးရွာတွေမှာ PDF တွေနဲ့ ပတ်သက်ဆက်နွှယ်မှုရှိတယ်ဆိုပြီး စစ်ကောင်စီတပ်က ဒေသခံတွေရဲ့ နေအိမ်တွေကို ဝင်ရောက်ရှာဖွေ စီးနင်းမှုတွေပြုလုပ်ပြီး အရပ်သား ပြည်သူတွေကို ဖမ်းဆီးတာတွေ မကြာခဏ ပြုလုပ်နေပါတယ်။