မကွေးတိုင်း ပေါက်မြို့နယ်မှာ မေလ ၁၆ ရက်နေ့ညက ပေါက်မြို့ကနေ ကားနဲ့ စျေးဝယ်ပြီး ပြန်လာတဲ့ အမျိုးသား ၂ ယောက်ကို မျက်နှာဖုံးစွပ်ထားသူတွေအပါအဝင် လူတစုက မီးရှို့ သတ်ဖြတ်လိုက်တယ်လို့ ဒေသခံတွေက ပြောပါတယ်။

ပေါက်မြို့နယ် မြေနီ (မြောက်ဘက်) ကျေးရွာက ဦးမောင်ရီ၊ ဇနီး၊ မြေးနဲ့ သမက်ဖြစ်သူ ကိုကျော်သူမင်းတို့ ပေါက်မြို့ကနေ စျေးဝယ်ပြီးပြန်လာရာ အဲဒီနေ့ ည ၉နာရီလောက်က ဝါးတောရွာအနောက်ဘက်အရောက် အရပ်ဝတ်နဲ့ မျက်နှာဖုံးစွပ်ထားသူ ၄ ယောက်အပါအဝင် ၆ ယောက်က ကားမှန်ကိုထုပြီး အမျိုးသမီးနဲ့ ကလေးအား ပြေးခိုင်းကာ ဦးမောင်ရီနဲ့ ကိုကျော်သူမင်းတို့ကို ကားရှေ့ခန်းမှာ မီးရှို့သတ်ဖြတ်သွားတာလို့ ထွက်ပြေးလွတ်မြောက်လာတဲ့ အမျိုးသမီးက ပြန်ပြောကြောင်း မြေနီကျေးရွာ ဒေသခံတယောက်က ပြောပါတယ်။

သူတို့နှစ်ယောက်ကို သေနတ်နဲ့ ပစ်သတ်ပြီးမှ ကားပေါ်တင် မီးရှို့တာလား၊ ကားပေါ်မှာပဲ အရှင်လတ်လတ် မီးရှို့လိုက်တာလားဆိုတာ အတိကျတော့မသိရဘူး။ 

“မနေ့ မေ ၁၇ ရက်နေ့ညနေ ၄ နာရီလောက်မှာ သွားကြည့်တော့ ၂ ယောက်လုံး မီးလောင်ပြီး သေဆုံးနေတာတွေ့ရတယ်။ ကျနော်တို့ ရောက်သွားတဲ့အထိကို ကားက မီးလောင်နေတုန်းပဲ။ သူတို့လုပ်ရပ်ကတော့ တော်တော်ကို ရက်စက်ယုတ်မာလွန်းပါတယ်။ လုံးဝကိုလူမဆန်ဘူး သူတို့လုပ်ရပ်က။ တကယ်ကို ရက်စက်ကြမ်းကြုတ် လွန်းတယ်” လို့ ဒေသခံက ပြောပါတယ်။ 

ဦးမောင်ရီရဲ့ ဇနီးဖြစ်သူဟာလည်း ခင်ပွန်းဖြစ်သူနဲ့ သမက်ဖြစ်သူ မီးရှို့သတ်ဖြတ်ခံရတာကို ရုတ်တရက်တွေလိုက်ရတော့ စိတ်ဖောက်ပြန်သလိုဖြစ်နေပြီး ဖြစ်စဉ်အသေးစိတ်ကို မေးမြန်းရတာ သိမ်အဆင်မပြေသေးဘူးလို့ ဆိုပါတယ်။

“ဒီနေရာမှာက သစ်ချိုကုန်းရွာက ပျူစောထီးတွေပဲ မကြာခဏ စစ်ဆေးမေးမြန်းတာတွေလုပ်တယ်။ သူတို့လိုချင်တဲ့ ပစ္စည်းတွေကိုယူတယ်၊ ပြည်သူတွေကိုလည်း နေလှန်းပြီး စစ်ဆေးမေးမြန်းတာတွေလုပ်တယ်။ ဒါကြောင့်မို့ ဘယ်အဖွဲ့စည်းကမှလုပ်တာမဟုတ်ဘူး၊ သစ်ချိုကုန်း ပျူတွေပဲလို့ ပြောပြတယ်” လို့ ဒေသခံပြည်သူတဦးက ပြောပါတယ်။

ပေါက်တောင်ပိုင်းပြောက်ကျားတပ်ဖွဲ့ SPGF ရဲ့ သတင်းနှင့်ပြန်ကြားရေးတာဝန်ခံ ကိုနဂါးလေးက “အခုကိစ္စက ကျနော်တို့ ပြည်သူ့ကာကွယ်ရေးတပ်ဖွဲ့တွေလုပ်တာ လုံးဝမဟုတ်ပါဘူး။ ဒီနယ်မြေက သူတို့ပျူစောထီးတွေ ကြီးစိုးတဲ့ နယ်မြေဖြစ်တယ်။ ဒီကိစ္စက သစ်ချိုကုန်း၊ ပင်ထောင်ရွာက ပျူစောထီးတွေ ကျက်စားရာနယ်မြေဖြစ်လို့ ဒီလူတွေပဲ လုပ်တာပါ။ ကျနော်အနေနဲ့ပြောရရင် သူတို့က ပြည်သူလူထုကို လက်နက်အားကိုးပြီး အနိုင်ကျင့်တယ်လို့ မြင်တယ်ဗျ။ ကျနော်တို့ ပြည်သူတွေဟာ ဘယ်နေရာသွားသွား မလွတ်လပ်တော့ဘူး။ အမြဲတမ်း ကြောက်စိတ်တွေနဲ့ပဲ ဘဝကို ရပ်တည်နေရတဲ့ ပုံစံမျိုးဖြစ်နေတယ်” လို့ ပြောပါတယ်။

ပေါက်မြို့ အောင်ချမ်းသားရပ်ကွက် ဇရပ်နားမှာလည်း မေ ၉ ရက်နေ့ မနက် ၈ နာရီလောက်က စစ်ကောင်စီတပ်သားတွေနဲ့ပျူစောထီးတွေ ပူးပေါင်းအဖွဲ့က စျေးသွားဝယ်တဲ့ မြေနီ(မြောက်ဘက်)ကျေးရွာက ကိုမျိုးထက်ခိုင်နဲ့ ကိုဟိန်းထက်ကျော်တို့ကို PDF လို့စွပ်စွဲပြီး ဖမ်းဆီးသွားကြတယ်လို့ သိရပါတယ်။

စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းကတော့ ပြည်သူတွေကို မီးရှို့သတ်ဖြတ်တာနဲ့ ကျေးရွာတွေကို မီးရှို့ ဖျက်ဆီးတာဟာ သူတို့ရဲ့ လက်ချက်မဟုတ်ဘဲ PDF တပ်ဖွဲ့တွေက လုပ်တာလို့ စွပ်စွဲပြောဆိုလေ့ရှိပါတယ်။

ပေါက်မြို့နယ်ထဲမှာ စစ်ကောင်စီတပ်တွေနဲ့ ပျူစောထီးတွေဟာ တရွာဝင်တရွာထွက် မီးရှို့ဖျက်ဆီးခဲ့လို့ အိမ်ခြေ ၁၁၀၀ ကျော်လောက်မီးလောင်ဆုံးရှုံးခဲ့ပြီး ဒေသခံပြည်သူ ၂၀၀၀၀ ကျော် ဘေးလွတ်ရာ ထွက်ပြေးတိမ်ရှောင်နေကြရတယ်လို့ ဒေသခံတွေက ပြောပါတယ်။

မကွေးတိုင်းဒေသကြီးမှာ စစ်တပ်အာဏာသိမ်းတဲ့ ဖေဖော်ဝါရီ ၁ ရက်နေ့ကနေ ဧပြီလ ၃၀ ရက်နေ့အထိ စစ်ကောင်စီတပ်သားတွေ မီးရှို့ဖျက်ဆီးလို့ အိမ်ခြေ ၂၁၃၁ လုံးမီးလောင် ဆုံးရှုံးခဲ့တယ်လို့ Data For Myanmar က မေလ ၁ ရက်နေ့ရက်စွဲနဲ့ ထုတ်ပြန်ထားပါတယ်။

စစ်ကိုင်းတိုင်း ယင်းမာပင်ခရိုင် ယင်းမာပင်မြို့နယ် လက်ပံ​တောကျေးရွာမှာ စစ်​ကောင်စီတပ်ဖွဲ့က သတ်ဖြတ်မီးရှို့ထားတဲ့ ကလေးငယ် ၄ ဦးအပါအဝင် အပြစ်မဲ့ပြည်သူရုပ်အ​လောင်း ၁၁ ​လောင်း ဒီနေ့မနက် တွေ့ရှိခဲ့တယ်လို့ သိရပါတယ်။

စစ်ကောင်စီတပ်ဟာ မတ် ၈ ရက်နေ့ညနေ ၃ နာရီလောက်က လက်ပံ​တော ကျေးရွာဘုန်းကြီး​ကျောင်း​ဘေးမှာရှိတဲ့ ​နေအိမ် ၂ လုံးနဲ့အတူ ပြည်သူ ၁၀ ဦးအား မီးရှို့သတ်ဖြတ်ခဲ့တာလို့ ​ဒေသခံ​တွေက ​ပြောပါတယ်။

ဒါ့အပြင် သေဆုံးနေတဲ့ အဘွားအို ၁ ဦးရဲ့ ရုပ်အ​လောင်းကိုလည်း ​ထပ်မံ​တွေ့ရှိခဲ့​ရပြီး ​လက်ရှိအချိန်ထိ ​ပျောက်ဆုံး​နေတဲ့ ပြည်သူ​တွေကို ဆက်လက်ရှာ​ဖွေ​နေကြတယ်လို့ ဆိုပါတယ်။ 

စစ်​ကောင်စီတပ်ဖွဲ့ဟာ ဘုန်း​ကြီး​ကျောင်းထဲက ဘုရား​လှူထားတဲ့ အလှူခံပုံးထဲက ​ငွေ​တွေကိုလည်း ​ဖောက်ယူ​သွားကြတယ်လို့ ​ဒေသခံ​တွေက ​ပြောပါတယ်။

စစ်​ကောင်စီတပ်ဖွဲ့က က​လေးငယ်​တွေနဲ့ သက်ကြီးရွယ်အို​တွေကိုပါ အခုလို ရက်ရက်စက်စက် သတ်ဖြတ်သွားတာ​ဟာ မလုပ်သင့်တဲ့ကိစ္စ​တွေဖြစ်ပြီး လုံးဝသည်းခံနိုင်စရာမရှိတာကြောင့် အဆုံးစွန်ထိ စစ်အာဏာရှင်ကို ဆန့်ကျင်​တော်လှန်သွားမှာဖြစ်​ကြောင်း၊ ပြည်သူ​တွေအ​နေနဲ့ ​သွေး​အေးမ​နေကြဘဲ ​တော်လှန်​ပေးကြဖို့ ​ဒေါင်းမင်း PDF အဖွဲ့​ခေါင်း​ဆောင်တဦးက ​တိုက်တွန်းပါတယ်။

စစ်​ကောင်စီတပ်ဖွဲ့ဟာ ​မတ် ၈ ရက်က ကံသာ​ကျေးရွာမှာ ညအိပ်တပ်စွဲခဲ့ပြီး ဒီနေ့မနက်မှာတော့ သီးကုန်း​ကျေးရွာ ဝင်​ရောက်​နေကာ တရွာဝင်တရွာထွက် အကြမ်းဖက်သတ်ဖြတ် မီးရှို့တာတွေ ပြုလုပ်မယ့် အ​ခြေ​နေရှိတယ်လို့ ​ဒေသခံ​တွေက ​ပြောပါတယ်။

ယင်းမာပင်မြို့နယ်မှာ စစ်​ကောင်စီတပ်ဖွဲ့နဲ့ ​PDF ပူး​ပေါင်းအဖွဲ့​တွေလည်း မတ် ၈ ရက်နဲ့ ၉ ရက်နေ့ နှစ်ရက်ဆက်  တိုက်ပွဲတွေဖြစ်ပွားနေတယ်လို့ ဆိုပါတယ်။

စစ်​ကောင်စီတပ်တွေဟာ ​ ယင်းမာပင်မြို့နယ်အတွင်း ပြည်သူတွေကို ဖမ်းဆီး သတ်ဖြတ်တာ၊ နေအိမ်တွေကို မီးရှို့ဖျက်ဆီးတာနဲ့ ပစ္စည်းတွေကို ယူဆောင်တာတွေ လုပ်​နေကြတာလို့ ဒေသခံတွေက ပြောပါတယ်။