ကချင်ပြည်နယ်၊ မြစ်ကြီးနားမြို့၊ ရမ်ပူရပ်ကွက်နဲ့ မန်ခိန်ရပ်ကွက်မှာ မေ ၉ ရက် တရက်တည်း ဝါယာရှော့ဖြစ်ပြီး မီးလောင်မှု ၂ ခု ဖြစ်ပွားခဲ့တာကြောင့် နေအိမ်အဆောက်အဦ ၃ လုံး ပျက်စီးဆုံးရှုံးခဲ့တယ်လို့ မြစ်ကြီးနားမြို့နယ် မီးသတ်စခန်းက ပြောပါတယ်။

မနက်အစောပိုင်း ၂ နာရီလောက်က ရမ်ပူရပ်ကွက်၊ နယ်မြေ ၂၃၊ မြစ်သာလမ်းရှိ အောင်ဝင်း ကုန်မာဆိုင်ရဲ့ ဂိုထောင်မှာ ပါဝါဘန့် အားသွင်းရာက အပူလွန်ကဲပြီး မီးလောင်ခဲ့တာကြောင့် ဂိုထောင်တလုံးနဲ့ နေအိမ်တလုံး မီးလောင်ပျက်စီးသွားတယ်လို့ သိရပါတယ်။

အဆိုပါ မီးလောင်မှုကို မြစ်ကြီးနားမီးသတ်စခန်းက မီးငြှိမ်းသတ်ယာဉ် ၂ စီး၊ ရေသယ်ယာဉ် ၃ စီးနဲ့ ကယ်ဆယ်ရေးအသင်းတွေက ဝိုင်းဝန်းငြှိမ်းသတ်ခဲ့တာကြောင့် မနက် ၂ နာရီ ၂၅ မိနစ်ခန့်မှာ မီးငြိမ်းသွားပါတယ်။

အဲဒီနေ့ညနေပိုင်း ၄ နာရီ ၃၉ မိနစ်ခန့်မှာ မြစ်ကြီးနား မန်ခိန်ရပ်ကွက်၊ နယ်မြေ ၁၊ မန်ခိန်ရွှေစက်လမ်းရှိ ၂ ထပ်အိမ်တခုမှာ ဝါယာရှော့ဖြစ်ပြီး မီးလောင်ကျွမ်းခဲ့တာပါ။

မြို့ခံပရဟိတအသင်း တာဝန်ခံတဦးက “ရမ်ပူ မြစ်သာလမ်းမှာက ကုန်ဆိုင်နဲ့ ဘေးကအိမ် လောင်တာ။ ပါဝါဘန့်ကနေ ‌လောင်တာလို့ ပြောတယ်။ လူထိခိုက်တာတော့ မရှိပါဘူး။ ညနေပိုင်းကျ‌တော့ ရွှေစက်လမ်းမှာ မိန်းဘုတ်ကနေ ရှော့ဖြစ်ပြီး လိုက်ကာစကို မီးစွဲသွားတာ၊ ၂ ထပ် တအိမ်လုံးပါပဲ” လို့ ပြောပါတယ်။

မီးလောင်မှုကြောင့် ၃၀×၂၀ ပေရှိ နှစ်ထပ်အိမ်တလုံး ပျက်စီးဆုံးရှုံးသွားပြီး မီးသတ်ယာဉ် ၁ စီး၊ ရေသယ်ယာဉ် ၂ စီး၊ သ‌‌န္ဓေတပ်ဖွဲ့ဝင် ၃၁ ဦးနဲ့ ငြှိမ်းသတ်ခဲ့တာကြောင့် ညနေ ၅ နာရီလောက်မှာ မီးငြိမ်း‌သွားပါတယ်။

မီးလောင်မှုဖြစ်ပွားခဲ့တဲ့ အဆောက်အဦပိုင်ရှင်တွေကို မြစ်ကြီးနားမြို့ သက်ဆိုင်ရာ ရဲစခန်းတွေမှာ ပုဒ်မ ၂၈၅ နဲ့ အမှုဖွင့်ထားတယ်လို့ သိရပြီး မီးလောင်မှုကြောင့် ထိခိုက်ဒဏ်ရာရသူ မရှိဘူးလို့ သိရပါတယ်။

ရှမ်းပြည်နယ်မြောက်ပိုင်း၊ သီပေါမြို့နယ်နဲ့ ၁၆ မိုင်အကွာမှာရှိတဲ့ နောင်ကော်ကြီးကျေးရွာက သီရိမင်္ဂလာဘုန်းတော်ကြီးကျောင်းမှာ မေလ ၄ ရက် နေ့လယ်ပိုင်းက မီးလောင်မှုဖြစ်ပွားခဲ့ပြီး ၂ ထပ်ကျောင်းဆောင်တခု ပျက်စီးသွားတယ်လို့ သီပေါမြို့နယ် ကယ်ဆယ်ရေးအသင်းတွေက ပြောပါတယ်။

မွန်းလွဲ ၁၂ နာရီလောက်က ကျောင်းဆောင်အောက်ထပ် အခန်းတခုကနေ စတင်လောင်ကျွမ်းရာကနေ ၂ ထပ် အုတ်အဆောက်အဦတခုလုံး မီးလောင်သွားတယ်လို့ သိရပြီး သီပေါမြို့နယ်အတွင်းရှိ မီးသတ်ယာဉ် ၄ စီး၊ ရေသယ်ယာဉ် ၂ စီးနဲ့ မြို့ခံကယ်ဆယ်ရေးအသင်းတွေက ဝိုင်းဝန်းငြှိမ်းသတ်ခဲ့ကြတာပါ။

သီပေါမြို့ခံ ကယ်ဆယ်ရေးအသင်း တာဝန်ခံက “နေ့လယ် ၁၂ နာရီလောက်က မီးသတင်းရလို့ သွားတာပါ။ သီပေါနဲ့ကတော့ ၁၆ မိုင်လောက် ဝေးတာပေါ့။ ကျောင်းဝန်းအလယ်က ကျောင်းမကြီးတခုလုံးတော့ အကုန်လုံးလောင်သွားတယ်၊ လူထိခိုက်တာတော့ မရှိဘူး” လို့ ပြောပါတယ်။

မီးလောင်ရတဲ့အကြောင်းရင်းနဲ့ ပျက်စီးဆုံးရှုံးမှုတန်ဖိုးကို သီပေါမြို့နယ်မီးသတ်တပ်ဖွဲ့က စစ်ဆေးတွက်ချက်နေဆဲဖြစ်ပြီး နေ့လယ် ၁ နာရီလောက်မှာ မီးငြိမ်းသွားတယ်လို့ သိရပါတယ်။

ပြီးခဲ့တဲ့ ၂၀၂၃ ခုနှစ် ဖေဖော်ဝါရီ ၁၃ ရက်၊ ညပိုင်းကလည်း သီပေါမြို့နယ်၊ စံဖိတ်ကျေးရွာ၊ မဏိရတနာစံဖိတ် ဘုန်းကြီးကျောင်း မီးလောင်မှုဖြစ်ပွားခဲ့ပြီး အသက် ၁၀ နှစ်အရွယ် ကိုရင်တပါး ပျံလွန်တော်မူခဲ့ပါတယ်။