စစ်ကိုင်းတိုင်း ကလေးမြို့၊ ဗိုလ်ချုပ်လမ်းမ‌ပေါ်မှာရှိတဲ့ မြို့နယ်မီးသတ်ရုံးကို ဖေဖော်ဝါရီ ၂၃ ရက်က ကလေးမြို့ပြစစ်ဆင်ရေးအဖွဲ့က သတိပေးတိုက်ခိုက်ခဲ့တယ်လို့ တော်လှန်ရေးအင်အားစု တွေဆီက သိရပါတယ်။

မြို့နယ်မီးသတ်ဌာနက မီးသတ်တပ်ဖွဲ့ဟာ ပြည်သူ့နေအိမ်တွေ မီးလောင်ကျွမ်းပါက မီးလာရောက် မငြှိမ်းသတ်ဘဲ စစ်ကောင်စီနဲ့ဆက်စပ်တဲ့ ရုံးတွေ မီးလောင်မှသာ လာရောက် ငြှိမ်းသတ် နေတာကြောင့် သတိပေးတိုက်ခိုက်ခဲ့တာလို့ ကလေးမြို့မြို့ပြစစ်ဆင်ရေးအဖွဲ့ဝင် တဦးက ပြောပါတယ်။

"အခုကတော့ သတိပေးတဲ့အနေနဲ့  တိုက်ခိုက်ခဲ့တာပါ။ သူတို့ဘက်က ထိခိုက်ဒဏ်ရာရမှာလည်း မဟုတ်ပါဘူး။ အဓိကက မီးသတ်သတ်ဖွဲ့ဆိုတာ ပြည်သူအတွက် လုပ်ပေးရမှာလေ။ အခုဟာက မီးလောင်တယ်လို့ ဖုန်းဆက်ရင် လာမငြှိမ်းတာတွေ များနေပြီ။"

ကလေးမြို့ခံတဦးဖြစ်တဲ့ ကိုဆလိုင်းဗန်ထောင်ဘိတ်က "မီးသတ်သတ်ဖွဲ့က ပြည်သူတွေရဲ့ နေအိမ်မီးလောင်ကျွမ်းရင်သာ မီးလာမငြှိမ်းတာ။ တရားရုံးကို မြို့ပြင်စစ်ဆင်ရေးအဖွဲ့က မီးပုလင်းနဲ့ပစ်လို့ မီးလောင်တုန်းက မီးသတ်ကား ၅ စီးနဲ့ ချက်ချင်းလာရောက်ငြှိမ်းပေးတယ်"‌ လို့ ဆိုပါတယ်။

မီးသတ်ဌာနတိုက်ခိုက်ခံရတာနဲ့ပတ်သက်ပြီး ကလေးမြို့မီးသတ်ဌာနဘက်ကို ဒီဗွီဘီက ဆက်သွယ်ခဲ့ပေမဲ့ ဆက်သွယ်မရခဲ့သလို မြို့နယ်မီးသတ်ဌာနမှူးကတော့ အထက်က ခွင့်ပြုချက် ရရှိပြီး လုံခြုံရေးအင်အား ချပေးမှာသာ မီးသတ်သတ်ဖွဲ့ဘက်က မီးသွားရောက်ငြှိမ်းသတ် ပေးနိုင်မယ်လို့ ပြောခဲ့ပါတယ်။

စစ်ကိုင်းတိုင်း ယင်းမာပင်ခရိုင်၊ ပုလဲမြို့ပေါ်က စစ်ကောင်စီလက်အောက်ခံဌာန ၃ ခုကို ဒေသခံ ပြည်သူ့ကာကွယ်ရေးအဖွဲ့ ၁၂ ဖွဲ့က နိုဝင်ဘာ ၂၄ ရက် ည ၇ နာရီ ကျော်က စတင်ကာ လက်နက်ကြီးနဲ့ ပစ်ခတ်တိုက်ခိုက်ခဲ့တယ်လို့ ဒေသခံ ကာကွယ်ရေးအဖွဲ့တွေဆီက သိရပါတယ်။

ပုလဲမြို့ပေါ်က စစ်ကောင်စီလက်အောက်ခံ မီးသတ်ရုံး၊ စုပေါင်းရုံးနဲ့ ရဲစခန်းတို့ကို အဓိက ပစ်မှတ်ထား တိုက်ခိုက်ခဲ့တာဖြစ်ပြီး ထိခိုက်ဒဏ်ရာရတဲ့ အခြေအနေကိုတော့ မသိရသေးပါဘူး။

ကျားသစ်နက် ပြောက်ကျားတပ်ဖွဲ့ တပ်ရင်းမှူး ကိုဥက္ကာက “ပစ်တာကတော့ ရဲစခန်းကို အရင်ပစ်တာ။ နောက်ပိုင်း တခြားက မီးသတ်ရုံး၊‌ စုပေါင်းရုံးတွေက ပြန်ပစ်လို့ သူတို့ကိုပါ ပစ်ခတ် ခဲ့တယ်။ ကျနော်တို့ မြို့နားအထိ ချဉ်းကပ်ပြီး လက်နက်ငယ်တွေနဲ့ရော ပစ်ခတ်ခဲ့တယ်။ ကျနော်တို့အဖွဲ့ နောက်ကနေ လိုက်ပစ်တဲ့ကောင်တွေလည်း မိုင်းဆွဲခဲ့သေးတယ်ဗျ။ အကျအဆုံး ကတော့ ညတိုက်ပွဲဆိုတော့ အတိအကျ မသိရသေးဘူး။ ကျနော်တို့အဖွဲတွေဘက်ကတော့ အထိအခိုက် မရှိခဲ့ဘူး” လို့ ပြောပါတယ်။

နိုဝင်ဘာ ၂၂ ရက်ကလည်း ပုလဲမြို့ပေါ်က အထွေထွေအုပ်ချုပ်ရေးမှူးရုံးကို ဒေသခံကာကွယ်ရေး အဖွဲ့က လက်နက်ကြီးနဲ့ ပစ်ခတ်တိုက်ခိုက်ခဲ့လို့ စစ်ကောင်စီဘက်က အထိအခိုက် အကျအဆုံး တွေ ရှိခဲ့တယ်လို့ ဒေသခံတွေဆီက သိရပါတယ်။