မွန်ပြည်နယ်၊ လုံခြုံရေးနဲ့ နယ်စပ်ရေးရာဝန်ကြီးဟောင်း အငြိမ်းစား ဗိုလ်မှူးကြီး ဝင်းနိုင်ဦး စီးလာတဲ့ကားကို ဇန်နဝါရီ ၁၅ ရက် ည ၆ နာရီခွဲလောက်မှာ အဝေးထိန်းမိုင်းနဲ့ ဖောက်ခွဲ တိုက်ခိုက်ခဲ့တယ်လို့ မုဒုံမြို့နယ်ပြည်သူ့ကာကွယ်ရေးတပ်ဖွဲ့(ပကဖ)က ထုတ်ပြန်ပါတယ်။

မြို့မ (၃) ရပ်ကွက်၊ ဦးစံဖေလမ်းမှာနေတဲ့ ဗိုလ်မှူးကြီးဟောင်း ဝင်းနိုင်ဦးကို အိမ်အပြန် စောင့်ပြီး အိမ်ခြံဝအနီးမှာ အဝေးထိန်းမိုင်းနဲ့ ဖောက်ခွဲတိုက်ခိုက်ခဲ့တာဖြစ်ပြီး လူထိခိုက်ဒဏ်ရာ ရတာ မရှိပေမဲ့ ကားကတော့ ထိခိုက်ပျက်စီးခဲ့တယ်လို့ မုဒုံ(ပကဖ) က ဆိုပါတယ်။

ဒေသခံတွေကတော့ ဗိုလ်မှူးကြီး ဝင်းနိုင်ဦး(အငြိမ်းစား) ရဲ့ကား မိုင်းဆွဲတိုက်ခိုက်ခံရတာ မှန်ကန်ကြောင်းနဲ့ ထိခိုက်ပျက်စီးမှု အခြေအနေ အသေးစိတ် မသိရဘူးလို့ ပြောပါတယ်။

မိုင်းဆွဲတိုက်ခိုက်ခံရပြီးနောက် စစ်ကောင်စီတပ်က ဒေသခံ ၁၀ ဦး ထက်မနည်း ဖမ်းဆီးထားကာ မုဒုံမြို့မရဲစခန်းမှာ စစ်ဆေးမေးမြန်းပြီး တချို့ကို ပြန်လွှတ်ပေးခဲ့တယ်လို့ ဆိုပါတယ်။

ဗိုလ်မှူးကြီး ဝင်းနိုင်ဦး(အငြိမ်းစား)ဟာ ၂၀၂၀ အထွေထွေရွေးကောက်ပွဲတုန်းက ကြံ့ခိုင်ရေးပါတီ ကနေ မုဒုံမြို့နယ်မဲဆန္ဒနယ် ပြည်နယ်လွှတ်တော်ကိုယ်စားလှယ်နေရာက ဝင်ရောက်ယှဉ်ပြိုင်ခဲ့ပေမဲ့ ရှုံးနိမ့်ခဲ့ပါတယ်။

လက်ရှိမှာတော့ ဗိုလ်မှူးကြီး ဝင်းနိုင်ဦး(အငြိမ်းစား)ဟာ မွန်ပြည်နယ် ဗုဒ္ဓဘာသာကလျာဏ ယုဝအသင်း(YMBA) မှာ ဥက္ကဋ္ဌအဖြစ် ဆောင်ရွက်နေတာ ဖြစ်ပါတယ်။

ကရင်ပြည်နယ်၊ ကြာအင်းဆိပ်ကြီးမြို့နယ်၊ ခလယ်-တံခွန်တိုင်ကျေးရွာမှာ ဖြစ်ပွားနေတဲ့တိုက်ပွဲ တွေကြောင့် ဒေသခံရွာသားတွေဟာ မုဒုံမြို့နယ်ဘက်ကို ထွက်ပြေးတိမ်းရှောင်နေရတယ်လို့ မုဒုံမြို့ခံတယောက်က ပြောပါတယ်။

စစ်ဘေးရှောင်တွေဟာ မုဒုံမြို့နယ်ထဲက ဘုန်းကြီးကျောင်းတွေနဲ့ ဆွေမျိုးတွေဆီ ထွက်ပြေး လာကြတာဖြစ်ပြီး ဧပြီ ၂၅ ရက် ညပိုင်းအထိ ဆက်တိုက်ထွက်ပြေးနေရကာ စုစုပေါင်း ၁၀၀ ကျော်ရှိတယ်လို့ ဆိုပါတယ်။

စစ်တပ်က မုဒုံ-ကြာအင်းဆိပ်ကြီးလမ်းတလျှောက်ကျေးရွာတွေမှာ ရွာသားတွေကို ပေါ်တာဆွဲ နေတာကြောင့် ရော်ဘာခြံအလုပ်သမားတွေ အခက်အခဲတွေ့နေရတယ်လို့ မုဒုံမြို့ခံ တယောက်က ပြောပါတယ်။

ကရင်ပြည်နယ် ကြာအင်းဆိပ်ကြီးမြို့နယ်၊ ခလယ်တံခွန်တိုင်ကျေးရွာအုပ်စုတွင်းက  ဒေသခံ ကျေးရွာသား ၃ဝ ကျော်လောက်ကို ဧပြီ ၂၅ ရက် မနက် ၁၁ နာရီလောက်မှာ စစ်ကောင်စီတပ်က ဖမ်းဆီးခေါ်ဆောင်သွားပါတယ်။

ဧပြီ ၂၃ ရက်နက ခလယ်-တံခွန်တိုင်ကျေးရွာအနီး ရဲစခန်းအနီးမှာ စစ်တပ်နဲ့နယ်မြေခံ တော်လှန်ရေးပူးပေါင်းတပ်ဖွဲ့တွေ တိုက်ပွဲစတင်ဖြစ်ပွားခဲ့တာပါ။ 

စစ်ကောင်စီက ပစ်ခတ်လိုက်တဲ့ လက်နက်ကြီးကျည်ကြောင့် ဒေသခံအမျိုးသမီး တယောက် သေဆုံးပြီး အမျိုးသား ၂ ယောက် ဒဏ်ရာ ရရှိခဲ့ပါတယ်။

တံခွန်တိုင်ဘုန်းကြီးကျောင်းအနီးနားက အိမ်တလုံးကို လက်နက်ကြီးကျည်ထိမှန်ခဲ့တာ ဖြစ်ပါ တယ်။ 

ဧပြီ ၂၃ ရက်တိုက်ပွဲမှာ စစ်ကောင်စီဘက်က တစ်ယောက်သေဆုံးခဲ့ပြီး ထိခိုက်ဒဏ်ရာရသူတွေ လည်း ရှိခဲ့တယ်လို့ ဒေသခံတွေက ပြောပါတယ်။

ဧပြီ ၂၂ ရက်ကစပြီး တံခွန်တိုင်ရဲစခန်းအနီးမှာ အခြေအနေစတင်တင်းမာခဲ့ပြီး အပြန်အလှန် ပစ်ခတ်တာတွေ ဖြစ်ပွားခဲ့တာပါ။ 

တိုက်ပွဲတွေကြောင့် မုဒုံ၀- ခလယ်၊ တံခွန်တိုင်-ဝင်းရော်လမ်းမကြီးကို သွားလာမှု ယာယီရပ်ဆိုင်း ထားတယ်လို့ ဒေသခံတွေက ပြောပါတယ်။