ကေအန်ယူ-မုန်းမြို့နယ် စီမံအုပ်ချုပ်မှုနယ်မြေထဲက ကျေးရွာတွေကို အာဏာသိမ်းအကြမ်းဖက်စစ်ကောင်စီတပ်ဘက်က ၃ ရက်အတွင်း လက်နက်ကြီးအလုံး ၄၀ နီးပါးပစ်ခတ်ခဲ့တဲ့အပြင် ဒရုန်းနဲ့လည်း ဗုံးသီး ၄ လုံးထက် မနည်းပစ်ချခဲ့တယ်လို့ ထုတ်ပြန်ပါတယ်။

ဒါဟာ ပြီးခဲ့တဲ့ ဇန်နဝါရီ ၁၁ ရက်ကနေ ၁၃ ရက်အထိ စစ်ကောင်စီတပ်အခြေစိုက်စခန်းဖြစ်တဲ့ ခမရ(၃၅၁)/ခလရ(၆၀)တပ်တွေက ကေအဲန်ယူ-မုန်းမြို့နယ် စီမံအုပ်ချုပ်မှုနယ်မြေထဲက ကျေးရွာတွေဖြစ်တဲ့ နောင် ကုန်း၊ တမာခေါ၊ တောင်စု (ရှေ့,နောက်)၊ သပြေကုန်း၊ မျက်ရဲ(ဗမာ) ကျေးရွာတွေကို ပစ်ခတ်ခဲ့တာဖြစ်ပြီး အဆိုပါပစ်ခတ်မှုကြောင့် လူနေအိမ် ၄ လုံးထက်မနည်းပျက်စီးဆုံးရှုံးခဲ့ရတဲ့အပြင် စပါးကျီ ၂ လုံး လည်း ပျက်စီးခဲ့ရတယ်လို့ ဆိုပါတယ်။

ဇန်နဝါရီ ၁၁ ရက် မနက်ပိုင်းမှာတော့ အာဏာသိမ်းအကြမ်းဖက်စစ်ကောင်စီတပ်က မျက်ရဲ(ဗမာ) ကျေးရွာထဲကို ဝင်ရောက်ပစ်ခတ်ရာမှာ ဒေသခံပြည်သူ ၁ ယောက် သေနတ်ထိမှန်သေဆုံးခဲ့ရပြီး လက်နက်ကြီး ထိမှန်မှုကြောင့်လည်း နောက်ထပ်ပြည်သူ ၁ ယောက်သေဆုံးခဲ့ရတယ်လို့ ကေအန်ယူ(ဗဟို) ထုတ်ပြန်ချက်မှာ ဖော်ပြပါတယ်။

ဒါ့အပြင် လတ်တလောအချိန်ထိ လက်နက်ကြီးပစ်ခတ်မှုကြောင့် ထွက်ပြေးတိမ်းရှောင်နေကြရတဲ့ အဆိုပါကျေးရွာအိမ်ခြေပေါင်း ၂၈၇ အိမ်က လူဦးရေ စုစုပေါင်း ၁၆၁၆ ယောက်လောက် ရှိခဲ့ပြီး နေထိုင်ရာကျေးရွာ တွေထဲ ပြန်နေကြတဲ့သူတွေလည်း ရှိတယ်လို့ ဆိုပါတယ်။

မြန်မာနိုင်ငံမှာတော့ အကြမ်ဖက်စစ်အုပ်စုက မတရားအာဏာသိမ်းယူထားတဲ့ ကာလဟာ ၂ နှစ်နီးပါးထိ ကြာမြင့်လာခဲ့ပြီဖြစ်ကာ ဒီကာလတွေအတွင်း နိုင်ငံရေးမတည်ငြိမ်မှုတွေနဲ့အတူ စီးပွားရေး၊ ပညာရေး၊ ကျန်း မာရေး၊ လူမှုရေးကဏ္ဍတွေ အသီးသီးမှာ အဘက်ဘက်က ကျဆင်းနေခဲ့တာပါ။

ဒါ့အပြင် နိုင်ငံတဝန်း တိုင်းဒေသကြီးနဲ့ ပြည်နယ်တွေအနှံ့ တိုက်ပွဲတွေ ပြင်းထန်နေပြီး လေကြောင်းတိုက်ခိုက်မှုတွေရော၊ မြေပြင်ထိုးစစ်တွေပါ ကျူးလွန်ခံရတဲ့ မြန်မာနိုင်ငံအလယ်ပိုင်း စစ်ကိုင်းတိုင်းဒေသမှာလည်း အကြမ်းဖက်စစ်ကောင်စီဟာ မင်းမဲ့စရိုက်ဆန်ဆန် အရပ်သားပြည်သူတွေရဲ့ အိုးအိမ်စည်းစိမ်တွေကို မီးရှို့ဖျက်ဆီးတာတွေအပြင် ခိုးဆိုးလုယက်မှုတွေကိုပါ အဓမ္မကျူးလွန်နေကြတာကြောင့် နေရပ်စွန့်ခွာထွက် ပြေးတိမ်းရှောင်ရတဲ့ စစ်ဘေးရှောင်ပြည်သူတွေဟာ အခက်အခဲပေါင်းများစွာနဲ့ ရင်ဆိုင်နေကြရပါတယ်။

ပြီးခဲ့တဲ့ ၂၀၂၂ ခုနှစ်ကုန်အထိ မြန်မာနိုင်ငံတဝန်း နေရပ်စွန့်ခွာ ထွက်ပြေးတိမ်းရှောင်နေရသူ ဦးရေ ၁ သန်းခွဲကျော်ထိ ရှိလာနေပြီး ခက်ခဲတဲ့အခြေအနေတွေနဲ့ နေထိုင်နေကြရတာကြောင့် လူမှုကယ်ဆယ်ရေး အကူအညီတွေ အပူတပြင်း လိုအပ်နေတယ်လို့ ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး (OCHA) က ထုတ်ပြန်ထားပါတယ်။

NUG အစိုးရကတော့ အကြမ်းဖက်စစ်ကောင်စီကျူးလွန်တဲ့ စစ်ရာဇဝတ်မှုတွေကို အထောက်အထားရယူပြီးတော့ စနစ်တကျစာရင်းပြုစုကာ မှတ်တမ်းတင်ဆောင်ရွက်နေတယ်လို့ ထုတ်ပြန်ထားပါတယ်။

ကေအန်ယူ၊ တပ်မဟာ ၃ နယ်မြေ မုန်းမြို့နယ်၊ ကျွန်းပင်ဆိပ်ကျေးရွာမှာ စစ်ကောင်စီတပ်က ထောင်ထားတဲ့ မိုင်းနင်းမိပြီး ဒေသခံပြည်သူတဦး သေဆုံးခဲ့တယ်လို့ ကေအန်ယူက သတင်းထုတ်ပြန်ပါတယ်။

စက်တင်ဘာ ၂၂ ရက် မနက် ၆ နာရီလောက်က  စောအားထော်မူး (၂၅ နှစ်)ဟာ တူဖြစ်သူနဲ့အတူ ငါးမြုံးသွားကြည့်ပြီးအပြန် မိုင်းနင်းမိခဲ့တာဖြစ်ပြီး မိုင်းပေါက်ကွဲသံကြောင့် စစ်ကောင်စီရဲ့ ခမရ-၆၀၃ တပ်ဖွဲ့ဝင်တွေ ရောက်ရှိလာပြီး စောအားထော်မူးအား ကျွန်းပင်ဆိပ်ဗုဒ္ဓဘာသာဘုန်းကြီးကျောင်းကို သယ်ဆောင်သွားပြီးနောက် ဆေးတလုံးထိုးပေးပြီး ခြေထောက်ကိုလည်း ပတ်တီးနဲ့ စည်းပေးခဲ့ပါတယ်။

ဆက်လက်ပြီး ဒူးခေါင်းနားကို TQ ချည်ထားပေးခဲ့ပေမယ့် သွေးမတိတ်တဲ့အတွက် ဒေသခံပြည်သူတွေက မုန်းမြို့ကို ပို့ဆောင်ဖို့ပြုလုပ်ခဲ့ရာ စစ်ကောင်စီတပ်က ခွင့်မပြုဘဲ နတ်သံကွင်းကို ပို့ခိုင်းခဲ့တဲ့အတွက် နတ်သံကွင်းမရောက်ခင် ဝဲကြီးကျေးရွာအရောက် မနက် ၁၁ နာရီလောက်မှာ သွေးထွက်လွန်ပြီးသေဆုံးသွားခဲ့ပါတယ်။

မိုင်းနင်းမိခဲ့တဲ့ ကျွန်းပင်ဆိပ်ကျေးရွာနဲ့ နတ်သံကွင်းကိုသွားခဲ့ရတဲ့ လမ်းခရီးတလျှောက် လှေနဲ့ခြေလျင်ကိုပဲ အသုံးပြုသွားခဲ့ရတဲ့အတွက် အချိန်ကြန့်ကြာ သွေးထွက်လွန်သေဆုံးခဲ့ရတာဖြစ်ပြီး အဆိုပါ မိုင်းနင်းမိခဲ့တဲ့နေရာဟာ ကျွန်းပင်ဆိပ်ကျေးရွာကဒေသခံပြည်သူတွေ နေ့စဉ်ပုံမှန်သွားလာလှုပ်ရှားနေတဲ့ လမ်းဖြစ်ပါတယ်။

ကေအန်ယူ ၊ မုန်းမြို့နယ်တာဝန်ရှိဆေးဝန်ထမ်းတွေရဲ့ စစ်ဆေးသုံးသပ်ချက်အရ သွေးထွက်လူနာကို Glucose ထိုးပေးတဲ့အပြင် TQ ကို ပေါင်ရင်းမှာမချည်ပေးဘဲ ဒူးခေါင်းမှာချည်ပေးတဲ့အတွက်ကြောင့် သွေးထွက်လွန်ပြီး အသက်မဆုံးရှုံးသင့်ဘဲ သေဆုံးခဲ့ရတာဖြစ်သလို ဇနီးဖြစ်သူနဲ့ ၂ နှစ်အရွယ်သမီးလေးတဦး ကျန်ရစ်ခဲ့ပါတယ်။

စက်တင်ဘာ ၁၆ ရက်ကလည်း  ဖိုးသောင်းစု၊ တိုင်ပင်ကျေးရွာက အသက် ၂၀ အရွယ်လူငယ်တဦးကို ခမရ ၆၀၃ တပ်ဖွဲ့ဝင်တွေက ဖမ်းဆီးခဲ့ဆောင်သွားပြီးနောက် စက်တင်ဘာ ၁၇ ရက် မနက် ၆ နာရီလောက်က ပြန်လွှတ်ပေးခဲ့ပါတယ်။ အလားတူ စက်တင်ဘာ ၂၀ ရက်ကလည်း ငထွေစုတ်ကျေးရွာက လူငယ်သုံးဦးကို ဖမ်းဆီးခဲ့ပြီး ညနေပိုင်းမှာ ပြန်လွှတ်ပေးခဲ့ပါတယ်။

စက်တင်ဘာ ၁၇ ရက် မွန်းလွဲ ၁၂ နာရီကျော်လောက်က နတ်သံကွင်းမှာ အခြေပြုနေတဲ့ စစ်ကောင်စီတပ်က တောင်စုကျေးရွာအတွင်းကို  ၁၂၀ မမ လက်နက်ကြီး ၉ လုံးပစ်ခတ်ခဲ့တဲ့အတွက်  အမျိုးသမီးတစ်ဦး ထိမှန်သေဆုံးခဲ့ပါတယ်။  စက်တင်ဘာလ(၂၀)ရက်နေ့တွင်လည်း ငထွေစုတ်ကျေးရွာရှိ လူငယ်သုံးဦးကို ဖမ်းဆီးခဲ့ပြီး ညနေပိုင်းတွင် ပြန်လွတ်ပေးခဲ့တယ်လို့ ကေအန်ယူက ထုတ်ပြန်ပါတယ်။

စစ်‌ကောင်စီတပ်တွေဟာ ကေအန်ယူထိန်းချုပ်နယ်မြေအတွင်း နယ်မြေကျော်ဝင်ရောက်ပြီး စစ်ရေးလှုပ်ရှားတာ၊ တပ်စခန်းတွေမှာ လူအင်းအားဖြည့်တင်းတာ၊ ကျေးရွာတွေအတွင်းကို လက်နက်ကြီးနဲ့ပစ်ခတ်တာ၊  နေအိမ်တွေကိုမီးရှို့ဖျက်ဆီးတာ၊ ပစ္စည်းတွေခိုးယူတာ၊ ဒေသခံပြည်သူတွေကို ဖမ်းဆီးတာ၊ သတ်ဖြတ်တာ၊ လူသားဒိုင်းအဖြစ်အသုံးပြုတာ၊ အိမ်မွေးတိရစ္ဆာန်တွေကို သတ်ဖြတ်စားသောက်တာစတဲ့ လူအခွင့်အရေးအမျိုးမျိုးကို ချိုးဖောက်နေတယ်လို့ ဆိုပါတယ်။