ပဲခူးတိုင်း၊ ကျောက်ကြီးမြို့နယ်ထဲက မုန်းမြို့ အခြေစိုက် စစ်ကောင်စီတပ် ခမရ ၅၉၉ က အရာရှိနဲ့ တခြားအဆင့်တပ်သား စုစုပေါင်း ၁၁ ယောက်ကို ဒေသအခြေစိုက် PDF တပ်ဖွဲ့တွေက တပ်ထဲကို ဝင်ရောက်ဖမ်းဆီးပြီး ထွက်ပြေးဖို့ကြိုးစားတဲ့ စစ်ကောင်စီတပ်သားတယောက်ကိုတော့ လမ်းမှာ ပစ်သတ်ခဲ့တယ်လို့ PDF တပ်ဖွဲ့ဝင်တွေနဲ့ ဒေသခံတွေက ပြောပါတယ်။
မုန်းမြို့ဒေသခံတယောက်က“မေလ ၁၀ ရက်နေ့ ညနေ ၅ နာရီလောက်မှာ PDF က စစ်ကားတစီးနဲ့ ၅၉၉ တပ်က တပ်ရင်းမှူးကို ဝင်ဖမ်းသွားတာ။ တယောက်ကိုတော့ သာစည်ရွာထိပ်မှာ သတ်ပြီး ထားခဲ့တယ်။ အဲ့ဒီတပ်သားက ကားသမားလို့ ပြောတယ်။ ထွက်ပြေးလို့ ပစ်သတ်လိုက်တာတဲ့။ ပါသွားတဲ့အထဲမှာ တချို့ကတော့ ဒုရင်းမှူးလို့လည်း ပြောကြတယ်။ အဲ့ဒီ နှစ်ယောက်ထဲက တယောက်ပါသွားတာတော့ ကြိမ်းသေပဲ။ အခု မုန်းမှာ လမ်းပိတ်ထားတယ်။ ဖုန်းတွေလည်း ဆက်မရတော့ဘူး။ ဖုန်းလိုင်းတွေပါ ဖြတ်ထားတယ်။ ကော့ပြင်းရွာတို့၊ ရေအိုးစဥ်ရွာတို့ဆို ဘယ်သူမှ မနေရဲကြတော့ဘူး၊ အကုန်ထွက်ပြေးနေကြပြီ။ မုန်းမှာလည်း လူသိပ်မရှိကြတော့ဘူး။ သူတို့က မဲပြီး ပြည်သူတွေဘက်ကို လှည့်မှာ”လို့ပြောပါတယ်။
အဲဒီကိစ္စကို ဒေသခံ ပဲခူးတိုင်းအခြေစိုက် PDF အဖွဲ့တဖွဲ့က လုပ်ဆောင်ခဲ့တာဖြစ်ပြီး ကားသမားကတော့ ထွက်ပြေးလို့ ပစ်သတ်လိုက်တယ်လို့ ပြောပါတယ်။
ဒေသခံ PDF တပ်ဖွဲ့ဝင်တယောက်က “အခုဖမ်းခေါ်လာတာက ဒုရင်းမှူးနဲ့အဖွဲ့လို့တော့ သိထားကြပါတယ်။ သူတို့ကတော့ တရားဝင် သတင်းမထုတ်ပြန်သေးပါဘူး။ ကျနော်တို့က နီးတော့ သိနေတာပါ။ ထပ်ပြီးသိရတာရှိရင်လည်း ပြောပါ့မယ်” လို့ အတည်ပြုပါတယ်။
ခမရ ၅၉၉ တပ်ဟာ မုန်းမြို့အရှေ့ဘက် ရေအိုးစဥ်ရွာအနီးမှာရှိပြီး မုန်းမြို့နဲ့ ပတ်ဝန်းကျင်ကရွာတွေကို မကြာခန ဝင်ရောက်ဖမ်းဆီးတာ၊ လက်နက်ကြီးတွေနဲ့ မကြာခန ပစ်ခတ်နေတာကြောင့် ဒေသခံတွေ ရွာတွေမှာ မနေရဲကြဘဲ စစ်ဘေးရှောင်နေရပါတယ်။
အခုလို တပ်ရင်းမှူးအပါအဝင် စစ်ကောင်စီတပ်ဖွဲ့ဝင်တွေ ဖမ်းဆီးခံရတဲ့သတင်းနဲ့ ပတ်သက်ပြီး စစ်ကောင်စီဘက်ကိုတော့ ဆက်သွယ်မေးမြန်းနိုင်ခြင်း မရှိသေးပါဘူး။
တောင်ငူခရိုင် ကျောက်ကြီးမြို့နယ် မုန်းမြို့မှာ မီးတာခများ ပေးဆောင်ခြင်း မရှိပါက မီးဖျက်သွားမဲ့ အပြင်အာဏာဖီဆန်မှုနဲ့ ဖမ်းဆီးသွားမယ်လို့ စစ်ကောင်စီခန့်အုပ်ချုပ်ရေးမှူးနဲ့ ဒလန်တွေက လိုက်လံ ခြိမ်းခြောက်နေတယ်လို့ ဒေသခံ ပြည်သူတွေက ပြောပါတယ်။
ဓာတ်အား သုံးစွဲခ ကြွေးကျန်တွေကို မပေးပါက မီးဖျက်ခံရမယ့်အပြင် အာဏာဖီဆန်မှုနဲ့ပါ ဖမ်းဆီးခံရမှာကြောင့် အမြန်ဆုံးမီတာခတွေ ဆောင်ကြဖို့ စစ်ကောင်စီခန့်အုပ်ချုပ်ရေးမှူးနဲ့ ဒလန်တွေက နီးစပ်ရာလူတွေကို တိတ်တဆိတ် ခြိမ်းခြောက်ပြောဆိုနေတယ်လို့ ဆိုပါတယ်။
"ဒီကောင်တွေက စေတနာနဲ့ပြောသလို၊ အသိပေးသလို၊ ခြိမ်းခြောက်သလိုနဲ့ ပြည်သူတွေ ကြောက်လန့်ပြီ မီတာဆောင်အောင် ပြောနေတာလေ။ စာတွေကတော့ ရွာတွေကို မြို့နယ်လျှပ်စစ်က စာပို့တယ်ကြားတယ်။ ကျနော်တို့ဆီကိုတော့ မရောက်သေးဘူး"
မုန်းမြို့ သောင်လည်ကျေးရွာမှာ မီတာခ ကြွေကျန်တွေကို အမြန်လာရောက်ပေးဆောင်ကြဖို့ မပေးဆောင်ပါက လျှပ်စစ်ဥပဒေအရဓာတ်အားဖြတ်တောက်သွားမယ်ဆိုတဲ့ စာတွေကို လျှပ်စစ်ဓာတ်အားဖြန့်ဖြူရေးရုံးက လိုက်လံပို့ဆောင်နေတယ်လို့ ဒေသခံ ပြည်သူတစ်ဦးက ပြောပါတယ်။
မီတာဖတ်စာရေးတွေက အိမ်တွေမှာ မီတာလိုက်လံ ဖတ်ရှု့ခြင်း မရှိဘဲ ခန့်မှန်းခြေနဲ့ မီတာခကို တွက်ချက်ပြီး အဆမတန်စျေးတင်တောင်းထားတာကြောင့် လပေါင်းများစွာ မီတာခ သိန်းချီ ကြွေးကျန်ရှိနေတာကြောင့် မပေးဆောင်နိုင်ဘူးလို့လည်း ဆိုပါတယ်။
"အုပ်ကြီတွေ ဒလန်တွေခြိမ်းခြောက်သလို မီးပဲဖျက်ဖျက်၊ မီတာပဲဖြုတ်ဖြုတ်၊ အာဏာဖီဆန်မှုနဲ့ပဲ ဖမ်းဖမ်း ခုအချိန်အခါဟာ ဘာအလုပ်အကိုင်မှလည်းမရှိလို့ မီတာဆောင်စရာငွေလည်း မရှိဘူး။ ငွေရှိလည်း စစ်ကောင်စီကို အသိအမှတ်မပြုတဲ့အတွက် မီတာခလည်းမဆောင်ဘူး။" လို့ ဒေသခံတဦးက ပြောပါတယ်။
မုန်းမြို့ အုပ်ချုပ်ရေးမှူးရုံးနဲ့ မီတာကြွေးကျန်ပေးဆောင်ဖို့ စာပို့ထားတဲ့ သောင်လယ်ကျေးရွာမှာ အောက်တိုဘာ ၂၀ နဲ့ ၂၁ ရက်တွေ မှာ ဗုံးပေါက်ကွဲမှုတွေ ဖြစ်ခဲ့ပါတယ်။
