ဘရာဇီးနိုင်ငံ ရီယိုဒီဂျနေရိုမြို့ မြောက်ပိုင်းက ဆင်းရဲသားရပ်ကွက်ထဲမှာ ရဲတွေက မူးယစ်ကုန်ကူးတဲ့ အဖွဲ့အစည်း ခေါင်းဆောင်တွေကို မေ ၂၄ ရက်က ဝင်ရောက်စီးနင်းလို့ လူ ၂၁ ယောက် အသေပစ်သတ်ခံရပါတယ်။

ဗီလာ ခရူဇေးရို ဖာဗေလာ ဆင်းရဲသားရပ်ကွက်ထဲမှာ မူးယစ်မှောင်ခို ဂိုဏ်းဝင်တွေနဲ့ ရဲတွေ အပြန်အလှန် ပစ်ခတ်ကြရင်း သေဆုံးသူတွေထဲမှာ အမျိုးသမီးတယောက်လည်း ပါပါတယ်။

တခြားသေဆုံးသူတွေကတော့ စစ်ဆင်ရေးကို ခုခံရင်း ရဲတွေကို အော်တိုမက်တစ် လက်နက်တွေနဲ့ ပစ်ခတ်ခဲ့တဲ့ ဂိုဏ်းဝင်လို့ သံသယရှိသူတွေလို့ ရဲတွေက ပြောပါတယ်။

ဗီလာခရူဇေးရို ရပ်ကွက်နားက သစ်တောထူတဲ့ ဒေသထဲမှာ မနက် ၄ နာရီက စပြီး အကြီးအကျယ် ပစ်ခတ်နေလို့ ဆင်းရဲသားရပ်ကွက်ထဲမှာ ကြောက်လန့် ချောက်ချားခဲ့ကြတယ်လို့ ဒေသခံတွေက လူမှုကွန်ရက်တွေပေါ်ကနေ ပြောခဲ့ပါတယ်။

ရဟတ်ယာဉ်တွေ ပစ်ကူပေးထားတဲ့ ရဲစစ်ဆင်ရေးဟာ ရီယိုမြို့ရဲ့ အကြီးဆုံး ရာဇဝတ်ဂိုဏ်း ခေါင်းဆောင်တွေကို ပစ်မှတ်ထားတာပါ။

ကိုမန်ဒို ဗာမယ်ဟိုလို့ ခေါ်တဲ့ ဒီဂိုဏ်းဟာ ဗီလာခရူဇေးရို ရပ်ကွက်ထဲမှာ ပုန်းအောင်းနေတယ်လို့ ရဲစုံထောက်တွေက ဆိုပါတယ်။

ရဲတွေဟာ ရာဇဝတ်သားတွေသုံးတဲ့ မော်တော်ဆိုင်ကယ်တွေ၊ ကားတွေ၊ ဗုံးတွေ၊ ပစ္စတိုတွေနဲ့ တိုက်ခိုက်ရေး ရိုင်ဖယ်တွေကို သိမ်းယူရရှိခဲ့တယ်လို့ ရဲက ပြောပါတယ်။

သေဆုံးသူ အမျိုးသမီးကတော့ အနားက ချာတူဘာ ဆင်းရဲသားရပ်ကွက်မှာ နေသူဖြစ်ပြီး ချော်ထွက်လာတဲ့ ကျည်သင့်လို့ သေဆုံးတာပါ။

အခုလို ရဲတပ်ဖွဲ့ဝင်တွေနဲ့ မူးယစ်မှောခိုင်ဂိုဏ်းဝင်တွေ ပစ်ခတ်မှုကြောင့် ကျောင်းတွေကိုလည်း ပိတ်ထားရပါတယ်။

မနှစ်က ရီယိုမြို့ ဆင်းရဲသားရပ်ကွက်တွေမှာ မူးယစ်ကုန်ကူးသူတွေနဲ့ ရဲတွေကြား ထိပ်တိုက်တွေ့ပြီး လူ ၂၈ ယောက် သေဆုံးခဲ့ပါတယ်။