close

မေတ္တာရပ်ခံ

close

January 10, 2021

ထိန်းသိမ်းထားသည့် မြန်မာသင်္ဘောသားများအား အမြန်လွှတ်ပေးရန် အီရန်အစိုးရကို မေတ္တာရပ်ခံ

နှစ်နိုင်ငံချစ်ကြည်ရင်းနှီးမှုကိုထောက်ရူပြီး ဖမ်းဆီးထိန်းသိမ်းခံထားရတဲ့ မြန်မာသင်္ဘောသား ၁၁ ဦးကို အမြန်ဆုံးပြန်လည်လွှတ်ပေးဖို့ မြန်မာနိုင်ငံဘက်က အီရန်အစိုးရကို မေတ္တာရပ်ခံလိုက်ပါတယ်။

မြန်မာ သဘောင်္သား ၁၁ ဦးကိုပြန်လွှတ်ပေးဖို့ လက်ရှိမှာ အီရန်နိုင်ငံကိုပါ ပူးတွဲ တာဝန်ယူထားတဲ့ အိန္ဒိယနိုင်ငံဆိုင်ရာ မြန်မာသံအမတ်ကြီးက အိန္ဒိယ နိုင်ငံအခြေစိုက် အီရန်သံအမတ်ကြီးနဲ့ တွေ့ဆုံညှိနှိုင်းတာ၊ ထိုင်းနိုင်ငံဆိုင်ရာ မြန်မာသံ အမတ်ကြီးကလည်း ထိုင်းနိုင်ငံဆိုင်ရာ အီရန်သံအမတ်ကြီးတွေနဲ့တွေ့ဆုံညှိနှိုင်းတာတွေ လုပ်ဆောင်ထားပါတယ်။ 

ဒီလိုတွေ့ဆုံညှိနှိုင်းမှုတွေအရလည်း နှစ်နိုင်ငံချစ်ကြည်ရင်းနှီးမှုကိုထောက်ရူပြီး ဖမ်းဆီးထိန်းသိမ်းထားရတဲ့ မြန်မာသဘောင်္သား ၁၁ ဦးကို အမြန်ဆုံးပြန်လည်လွှတ်ပေးဖို့ အီရန်နိုင်ငံအစိုးရကို မေတ္တာရပ်ခံထားတယ်လို့ နိုင်ငံခြားရေးဝန်ကြီးဌာနက ဇန်နဝါရီ ၁၀ ရက်နေ့မှာ ထုတ်ပြန်ထားပါတယ်။

လက်ရှိမှာ ဖမ်းဆီးထိန်းသိမ်းခံထားရတဲ့ မြန်မာသင်္ဘောသား ၁၁ ဦးရဲ့ လုံခြုံရေးကို အီရန်နိုင်ငံဘက်က အပြည့်အဝ တာဝန်ယူပေးထားပြီး ကောင်းမွန်စွာ ထိန်းသိမ်းထားသလို သူတို့ရဲ့မိသားစုဝင်တွေနဲ့လည်း ဆက်သွယ်ခွင့်ပြုထားပါတယ်။ 

အရင်က ဖမ်းဆီးခံရတဲ့ မြန်မာသင်္ဘောသားအများစုက တရားမဝင်သင်္ဘောလိုင်းတွေကြောင့် အဖြစ်များခဲ့တာမို့ လုပ်ကိုင်ရခက်ခဲတဲ့အနေ အထားတွေ ရှိခဲ့ပေမဲ့ အခုဖြစ်ရပ်ကတော့ တရားဝင် သင်္ဘောလိုင်းဖြစ်တဲ့အတွက် သိပ်မကြာခင်မှာ ပြန်လွတ်နိုင်မဲ့ အနေအထားရှိတယ်လို့ ဆိုပါတယ်။

အီရန်သံအမတ်ကြီးတွေကလည်း နှစ်နိုင်ငံချစ်ကြည်ရင်းနှီးမှုကို  အခြေခံပြီး မြန်မာသင်္ဘောသား ၁၁ ဦးအား ပြန်လွှတ်ပေးဖို့ မြန်မာနိုင်ငံအစိုးရရဲ့ မေတ္တာရပ်ခံချက်ကို အီရန်အစိုးရဆီ ဆောလျင်စွာ တင်ပြပေးမယ်လို့လည်း တွေ့ဆုံဆွေးနွေးမှုမှာ တုံ့ပြန်ပြောဆိုထားပါတယ်။

ကိုရီးယားသမ္မတနိုင်ငံ အခြေစိုက် DM Shipping Co., Ltd ကုမ္ပဏီပိုင် ရေနံတင်သင်္ဘောကို ဇန်နဝါရီ ၄ ရက်နေ့က အီရန်ဟော်မုဇ် ရေလက်ကြားမှာ အီရန်လက်နက်ကိုင်တော်လှန်ရေး အစောင့်တပ်တွေက  ဖမ်းဆီးခဲ့တာပါ။

ဒီရေနံတင်သင်္ဘောပေါ်မှာ ကိုရီးယား၊ အင်ဒိုနီးရှား၊ ဗီယက်နမ် စတဲ့သင်္ဘောသားတွေနဲ့ အတူ မြန်မာသင်္ဘောသား ၁၁ ဦးပါ ဖမ်းဆီးထိန်းသိမ်းခံထားရပါတယ်။ 

ဇာခြည်

4 months Ago

December 25, 2020

စမွတ်စာခွန်တွင် ယာယီဆေးရုံဆောက်ခွင့်ပြုရန် ထိုင်းအစိုးရက ပြည်သူများထံ မေတ္တာရပ်ခံ 

ကိုဗစ်-၁၉ ကူးစက်ရောဂါပိုးတွေ့ရှိသူ တစ်ထောင်ကျော်ရှိနေတဲ့ စမွတ်စာခွန်မြို့မှာ ယာယီ ဆေးရုံဆောက်ခွင့်ပြုဖို့ ထိုင်းနိုင်ငံ ကိုဗစ်ကူးစက်မှုအခြေအနေ စီမံကွပ်ကဲရေးဗဟိုအဖွဲ့ CCSA က ဒေသခံပြည်သူတွေကို မေတ္တာရပ်ခံလိုက်ပါတယ်။  မနေ့က စမွတ်စခွန်းရှိ အမျိုးသားအားကစားတက္ကသိုလ်ဝင်းထဲမှာ ယာယီဆေးရုံ တည်ဆောက်ဖို့ လိုအပ်တဲ့ပစ္စည်းတွေ လာချစဉ် ရပ်ကွက်နေပြည်သူတွေ ဝိုင်းဝန့်ကန့်ကွက်ဆန္ဒပြလို့ ပစ္စည်းတင်ကားတွေ ပြန်ဆုတ်သွားခဲ့ရတာပါ။  ဒီကနေ့မနက် ကိုဗစ် ၁၉ အခြေအနေနဲ့ ပတ်သက်တဲ့ သတင်းစာရှင်းပွဲမှာတော့ CCSA ပြောရေးဆိုခွင့်ရှိသူ ဒေါက်တာဝိဆနုယိုးထင်းက တာဝန်ရှိသူတွေအနေနဲ့ စမွတ်စာခွန်မှာ ကိုဗစ်-၁၉ ကူးစက်ခံရသူတွေကို တွေ့ရှိအောင် ရှာဖွေပြီး သာမန်လူနဲ့ ခွဲထားမှာဖြစ်လို့ ဒီနေရာမှာ ယာယီဆေးရုံဟာ အလွန်အရေးကြီးကြောင်း၊ ဒေသခံတွေ ကြောက်ရွံ့ပြီးကန့်ကွက်တဲ့အပေါ် စိတ်မသက်မသာဖြစ်ရတယ်လို့ ပြောပါတယ်။ အဲဒီနေရာမှာ ယာယီဆေးရုံဆောက်ဖို့ဆိုတာ ပတ်ဝန်းကျင်အခြေအနေကို သေချာ စဉ်းစားပြီးမှ ဆုံးဖြတ်ထားတာလို့ ဆိုပါတယ်။ “ဆေးရုံလို့ ဆိုတာနဲ့ လူများစုကကြောက်ရွံ့ကြတယ်။ တကယ်တော့ ကြောက်စရာမဟုတ်ပါဘူး။ ဘန်ကောက် နဲ့ တခြားခရိုင်ကြီးတွေမှာလည်း ဆေးရုံက လူနေရပ်ကွက်ထဲမှာ ရှိတာပဲ။ ဆေးရုံကနေ အနီးပတ်ဝန်းကျင်က လူတွေကို မကူးစက်ပါဘူး။  ရောဂါပိုးကူးစက်ခံနေရသူတွေက သင်တို့ခရိုင်ထဲမှာရှိနေတော့ သူတို့ကို ဂရုစိုက်ခွင့်ပြုပါ။ လိုအပ်တဲ့ ဆရာဝန်တွေ၊ ကျန်းမာရေးဝန်ထမ်းတွေ အများကြီးလည်း ရောက်လာမှာပါ၊ စိတ်မပူကြပါနဲ့။ ကျန်းမာရေးဝန်ထမ်းတွေ သူတို့လည်း သူတို့ကို ရောဂါကူးစက်မှာ မလိုလားပါဘူး။ အားလုံးက သတိထားပြီး အကောင်းဆုံးလုပ်ဆောင်သွားကြမှာပါ။ နည်းလမ်းအသွယ်သွယ်နဲ့ ကာကွယ်ထိန်းချုပ်မယ်၊ ပြည်ထဲရေးဌာနနဲ့ ဒုဝန်ကြီးချုပ်ရုံးက တာဝန်ရှိသူတွေလည်း အဲဒီနေရာ ပတ်ဝန်းကျင်အနေအထားကို သွားကြည့်ခဲ့ပါပြီ။ ကျနော်တို့အနေနဲ့ ကိုဗစ် ၁၉ ရောဂါကို အမြန်ဆုံး နှိမ်နင်းချင်တယ်။ ဒီလုပ်ငန်းစဉ်တွေ လွယ်ကူစွာဆောင်ရွက်နိုင်ဖို့ ၊ ဒီပြဿနာကို ကျော်လွှား သွားနိုင်ဖို့အတွက် ပြည်သူတွေအနေနဲ့ ပူးပေါင်းပါဝင်ပါလို့ မေတ္တာရပ်ခံပါတယ်” လို့  ဒေါက်တာ ဝိဆနုယိုးထင်းက ပြောသွားပါတယ်။  လက်ရှိ ထိုင်းနိုင်ငံမှာ ကိုဗစ် ၁၉ လူနာတွေ့ရှိတဲ့ ခရိုင်ပေါင်း ၃၁ ခရိုင်ရှိပြီး အများစုက စမွတ်စာခွန် ပုစွန်ဈေးနဲ့ ဆက်စပ်နေတယ်လို့ ဆိုပါတယ်။  ဒါပေမယ့် နေရာတိုင်းကိုတော့ လော့ဒေါင်းချထားမှာမဟုတ်ကြောင်း၊ ပိတ်ဆို့ကန့်သတ်မှုတွေကို ဇုန်အလိုက် အရောင်လိုက်ခွဲပြီး ၄ ဇုန်သတ်မှတ်ကြောင်း၊ အနီရောင်ဇုံမှာ ရောဂါကူးစက်မှုနှုန်းမြင့်မားပြီး ဆက်လက်ကူး စက်နိုင်ဖွယ်ရှိတဲ့ဇုန်၊ လိမ္မော်ရောင်ဇုန်မှာ ကူးစက်သူပေါင်း ၁၀ ဦးအထက်ရှိပြီး နောက်ထပ်ကူး စက်သူပိုများလာနိုင်ဘွယ်ရှိတဲ့ဇုန်၊ တတိယ အဝါရောင်ဇုန်မှာ ကူးစက်သူ ၁၀ ဦးအောက်ရှိပြီး နောက်ထပ်ကူးစက်မှုမရှိအောင် ထိန်းချုပ်နိုင်ဘွယ်ရှိတဲ့ဇုန်၊ အစိမ်းရောင်ဇုန်မှာ ကူးစက်သူတစ်ဦးမှမရှိ ကူးစက်ဖို့ အလားအလာလည်း မရှိတဲ့ဇုန်၊ အဲဒီဇုန်တွေပေါ်မူတည်ပြီး နှစ်သစ်ကူးပွဲတော်လုပ်မလုပ်၊  ခရီသွားလာခွင့်ကန့်သတ်တာ၊ စာသင်ကျောင်းတွေပိတ်တာ စတဲ့ကန့်သတ်ချက်တွေ ရှိလိမ့်မယ်လို့   CCSA သတင်းစာရှင်းပွဲမှာ ပြောသွားပါတယ်။  
5 months Ago
Up