မက်ဆီ ဦးဆောင်လာမည့် အာဂျင်တီးနားအသင်း
၂၀၂၂ ကာတာ ကမ္ဘာ့ဖလားဘောလုံးပြိုင်ပွဲမှာ တောင်အမေရိကအသင်းတွေထဲက ဘရာဇီးအသင်းနဲ့အတူ ရေပန်းစားနေတာကတော့ အာဂျင်တီးနားအသင်းပဲ ဖြစ်ပါတယ်။ အာဂျင်တီးနားလို့ ပြောလိုက်တာနဲ့ ပရိသတ်တွေစိတ်ထဲ မာရာဒိုနာနဲ့ မက်ဆီကို တန်းမြင်မိမှာ မလွဲမသွေပါပဲ။
၁၉၇၈ ကမ္ဘာ့ဖလားနဲ့ ၁၉၈၆ ကမ္ဘာ့ဖလားပြိုင်ပွဲတွေမှာ ချန်ပီယံနှစ်ကြိမ် ဖြစ်ခဲ့တဲ့ အာဂျင်တီးနားအတွက် ၁၉၈၆ မှာရခဲ့တဲ့ ချန်ပီယံဖလားက တကယ့်ကို အမှတ်ရစရာ ဖြစ်ခဲ့ပါတယ်။
အုပ်စုတွင်းမှာ လက်ရှိချန်ပီယံ အီတလီကိုကျော်ဖြတ်ပြီး အုပ်စုပထမနဲ့ ရှုံးထွက်အဆင့်ကိုတက်၊ အဲဒီအဆင့်မှာ ဒေသတွင်းပြိုင်ဘက် ဥရုဂွေးကို အနိုင်ယူကာ ကွာတားဖိုင်နယ်ကို တက်ရောက်ခဲ့ပါတယ်။
ကွာတားဖိုင်နယ်မှာ ဥရောပနာမည်ကြီး အင်္ဂလန်နဲ့ဆုံတွေ့တဲ့ပွဲမှာ မာရာဒိုနာရဲ့ ကမ္ဘာကျော် ဘုရားပေးတဲ့လက်နဲ့ ဂိုးသွင်းယူပြီး အင်္ဂလန်ကို အနိုင်ယူကာ ဆီမီးဖိုင်နယ် တက်ရောက်ခဲ့တာပါ။ ဆီမီးဖိုင်နယ်မှာလည်း မာရာဒိုနာရဲ့ အစွမ်းပြမှုနဲ့ ဘယ်လ်ဂျီယံကို အနိုင်ယူပြီး ဗိုလ်လုပွဲ တက်ရောက်ခဲ့ပါတယ်။ ဗိုလ်လုပွဲမှာ အနောက်ဂျာမနီနဲ့ ယှဉ်ပြိုင်ရာ ၃ ဂိုး ၂ ဂိုးနဲ့ အနိုင်ရပြီး ဒုတိယအကြိမ်မြောက် ကမ္ဘာ့ချန်ပီယံ ဖြစ်ခဲ့ပါတယ်။
မာရာဒိုနာခေတ်ပြီးနောက် အာဂျင်တီးနားအသင်းကို ဦးဆောင်နေသူကတော့ တိုက်စစ်မှူး မက်ဆီပဲ ဖြစ်ပါတယ်။ အာဂျင်တီးနားအသင်းဟာ တိုက်စစ်မှူး မက်ဆီနဲ့အတူ ကမ္ဘာ့အဆင့် အောင်မြင်မှု မရှိသေးဘဲ ၂၀၁၄ ကမ္ဘာ့ဖလားတကြိမ်သာ ဒုတိယနေရာ ရခဲ့ပါတယ်။ လက်ရှိ လတ်တလော အောင်မြင်မှုအနေနဲ့တော့ တောင်အမေရိကချန်ပီယံ အာဂျင်တီးနားအသင်းနဲ့ ဥရောပချန်ပီယံ အီတလီတို့ အခုနှစ်အတွင်း ယှဉ်ပြိုင်ခဲ့တဲ့ Finalissima ပြိုင်ပွဲမှာ အာဂျင်တီးနားအသင်းက အီတလီကို ၃ ဂိုး ဂိုးမရှိနဲ့ အနိုင်ရခဲ့တာပဲ ဖြစ်ပါတယ်။
အာဂျင်တီးနားအသင်းဟာ နည်းပြ စကာလိုနီနဲ့အတူ ၂၀၂၂ ကမ္ဘာ့ဖလား ခြေစစ်ပွဲစဉ်တွေ ယှဉ်ပြိုင်ခဲ့ရာမှာ ရှုံးပွဲမရှိဘဲ ၁၁ ပွဲနိုင်၊ ၆ ပွဲသရေကျပြီး အုပ်စု ဒုတိယနေရာကနေ တိုက်ရိုက် ခြေစစ်ပွဲအောင်မြင်ခဲ့တာပါ။
နည်းပြ စကာလိုနီလက်ထက်မှာ အာဂျင်တီးနားအသင်းဟာ အသင်းလိုက် တည်ငြိမ်ပြီး စုစည်းကောင်းတယ်လို့ ကမ္ဘာ့မီဒီယာတွေမှာ ဖော်ပြကြပါတယ်။ သူဟာ အာဂျင်တီးနားအသင်းကို ၂၀၁၈ ခုနှစ်ကတည်းက စတင်ကိုင်တွယ်နေတာဖြစ်ပြီး သူ့လက်ထက်မှာ လော်တာရိုမာတီနက်ဇ်၊ မိုလီနာ၊ ရိုမဲရိုး၊ လီဆန်ဒရိုမာတီနက်ဇ်၊ အယ်လ်ဗာရက်ဇ် စတဲ့ လူငယ်ကစားသမားတွေကို နေရာပေးခဲ့သလို အထိုက်အလျောက်လည်း အောင်မြင်ခဲ့ပါတယ်။ အခု ကမ္ဘာ့ဖလားပြိုင်ပွဲဝင်မယ့် အသင်းမှာလည်း အဲ့ဒီလူငယ်ကစားသမားတွေကို မက်ဆီ၊ ဒီမာရီယာ၊ အော့တာမန်ဒီ၊ ပါရေဒက်စ် စတဲ့ ဝါရင့်ကစားသမားတွေနဲ့ အကောင်းဆုံး တွဲဖက်အသုံးပြုဖွယ် ရှိနေပါတယ်။
အာဂျင်တီးနားအသင်းဟာ ကမ္ဘာ့ဖလားပြိုင်ပွဲ အုပ်စု စီ မှာ ပိုလန်၊ မက္ကဆီကို၊ ဆော်ဒီအာရေးဗျတို့နဲ့ အတူကျရောက်နေပြီး နိုဝင်ဘာ ၂၂ ရက်မှာ ဆော်ဒီအာရေဗျ၊ ၂၆ ရက်နေ့မှာ မက္ကဆီကိုနဲ့ ၃၀ ရက်နေ့မှာ ပိုလန်တို့နဲ့ အသီးသီး ယှဉ်ပြိုင်ရမှာ ဖြစ်ပါတယ်။ အုပ်စုပွဲစဉ်တွေထဲမှာ တိုက်စစ်မှူး မက်ဆီနဲ့ လီဝန်ဒေါစကီး ထိပ်တိုက်တွေ့နေတဲ့ ပိုလန်နဲ့ပွဲစဉ်ဟာ ပရိသတ်တွေအတွက် စိတ်လှုပ်ရှားစရာပွဲစဉ်တခု ဖြစ်လာမှာ သေချာလှပါတယ်။
အခုကမ္ဘာ့ဖလားပွဲစဉ်ဟာ သူ့ရဲ့ နောက်ဆုံးပွဲစဉ်ဖြစ်တယ်လို့ ဝန်ခံထားတဲ့ အသက် ၃၅ နှစ်အရွယ် တိုက်စစ်မှူး မက်ဆီရဲ့ အာဂျင်တီးနားအသင်းဟာ ၃ ကြိမ်မြောက် ကမ္ဘာ့ဖလားချန်ပီယံ ဖြစ်လာမလား ဆိုတာကတော့ စောင့်ကြည့်ရမှာပဲ ဖြစ်ပါတယ်။
၂၀၂၂ ကမ္ဘာ့ဖလားပြိုင်ပွဲဝင် အာဂျင်တီးနားအသင်း
ဂိုး - မာတီနက်ဇ် (အက်စ်တွန်ဗီလာ)၊ အာမေနီ (ရေးဗားပလိတ်)၊ ရူလီ (ဗီလာရီးရဲလ်)
နောက်တန်း - မားကို့စ် အကူနာ (ဆီဗီလာ)၊ ဂျူအန် ဖွိုက်သ် (ဗီလာရီးရဲလ်)၊ လီဆန်ဒရို မာတီနက်ဇ် (မန်ယူ)၊ တက်ဂ်လီယာဖီကို (လိုင်ယွန်)၊ ရိုမဲရိုး (တော့တင်ဟမ်ဟော့စပါး)၊ အော့တာမန်ဒီ (ဘင်ဖီကာ)၊ မိုလီနာ (အက်သလက်တီကိုမက်ဒရစ်)၊ မွန်တီယယ် (ဆီဗီလာ)၊ ပက်ဇဲလား (ရီးရဲဘက်တစ်)
အလယ်တန်း - ဒီမာရီယာ (ဂျူဗင်တပ်စ်)၊ ပါရေဒက်စ် (ဂျူဗင်တပ်စ်)၊ ဒီပေါလ် (အက်သလက်တီကိုမက်ဒရစ်)၊ မက် အယ်လစ္စတာ (ဘရိုက်တန်)၊ အန်ဇို ဖာနန်ဒက်စ် (ဘင်ဖီကာ)၊ ပလာစီယို (လေဗာကူဆင်)၊ ရိုဒရီဂွက်ဇ် (ရီးရဲဘက်တစ်)
ရှေ့တန်း - မက်ဆီ (ပီအက်စ်ဂျီ)၊ လော်တာရိုမာတီနက်ဇ် (အင်တာမီလန်)၊ ဒီဘားလား (ရိုးမား)၊ ကော်ရီယာ (အင်တာမီလန်)၊ အယ်လ်ဗာရက်ဇ် (မန်စီးတီး)၊ နီကိုလပ်စ် ဂွန်ဇာလက်ဇ် (ဖီအိုရင်တီးနား)၊ အလက်ဂျန်ဒရို ဂိုးမက်ဇ် (ဆီဗီလာ)
မောင်လူစိမ်း
