ရုရှားမြို့တော် မော်စကိုက တရားရုံးက အယ်လ်ဖှာဘတ် နိုင်ငံတကာကော်ပိုရေးရှင်းရဲ့ Google ဌာနကို အမေရိကန် ဒေါ်လာ ၉၈ သန်း ဒဏ်ငွေတပ်လိုက်တယ်လို့ ဒီဇင်ဘာ ၂၄ ရက်မှာ ပြောပါတယ်။
ရုရှားက တရားမဝင်ဘူးလို့ ယူဆတဲ့ အကြောင်းအရာတွေကို ပယ်ဖျက်ဖို့ ထပ်ခါတလဲလဲ ပျက်ကွက်တဲ့အတွက် ရုရှားမှာ ပထမဆုံးအနေနဲ့ ဒဏ်ငွေတပ်တာလို့လည်း ဆိုပါတယ်။
ရုရှားအစိုးရဟာ ဒီနှစ်ထဲမှာ ကြီးမားတဲ့ နည်းပညာကုမ္ပဏီတွေအပေါ် ဖိအား ပိုတိုးပေးခဲ့တာပါ။ ဝေဖန်သူတွေကတော့ ဒါဟာ အင်တာနက်အပေါ် ပိုတင်းတင်းကျပ်ကျပ် ထိန်းချုပ်ဖို့ ရုရှား အာဏာပိုင်တွေရဲ့ ကြိုးစားမှုလို့ သတ်မှတ်ကြပါတယ်။
ဒါဟာ လူတယောက်ချင်းနဲ့ ကော်ပိုရိတ်လုပ်ငန်းကြီးတွေရဲ့ လွတ်လပ်ခွင့်ကို ချုပ်ခြယ်ဖို့ ခြိမ်းခြောက်မှုလို့လည်း သူတို့က ပြောကြပါတယ်။
