သိမ်းဆည်းရမိသည့် မော်တော်ယာဉ်များ လေလံတင် ရောင်းရန်မရှိသေးဟု စီမံဘဏ္ဍာ ထုတ်ပြန်

DVB

သိမ်းဆည်းရမိထားတဲ့ မော်တော်ယာဉ်တွေကို လက်ရှိအခြေအနေမှာ လေလံတင် ရောင်းချဖို့ အစီအစဉ်မရှိသေးဘူးလို့ စစ်ကောင်စီလက်အောက်ခံ စီမံကိန်းနှင့် ဘဏ္ဍာရေးဝန်ကြီးဌာနက  ဇူလိုင် ၈ ရက်နေ့စွဲနဲ့  ထုတ်ပြန်ကြေညာပါတယ်။

အာဏာသိမ်း စစ်ကောင်စီဒုခေါင်းဆောင် ဒုဗိုလ်ချုပ်မှူးကြီးစိုင်းဝင်းကတော့ ဖမ်းဆီးရမိတဲ့ လိုင်စင်ရှိ၊ လိုင်စင်မဲ့ မော်တော်ယာဉ်တွေအပါအဝင် ဖမ်းမိပစ္စည်းတွေကို  အမှုတွေအမြန်ဆုံး ပြီးပြတ်အောင်ဆောင်ရွက်ပြီး လေလံပစ်ရောင်းချမယ်လို့  ဇွန်လ ၂၉ ရက်မှာ ပြောဆိုခဲ့တာပါ။

အခုလို ပြောဆိုခဲ့တဲ့အတွက် ကားလေလံနဲ့စပ်လျဉ်းပြီး ကားဝယ်ရောင်းသမားတွေ နဲ့ အများပြည်သူတွေအကြား စိတ်ဝင်စားမှု မြင့်တက်လာပြီး လူမှုကွန်ရက်စာမျက်မှာတွေမှာလည်း  ပြောဆိုရေးသားမှုတွေ ရှိလာပါတယ်။

ဒါနဲ့ပတ်သက်ပြီး စစ်ကောင်စီလက်အောက်ခံ စီမံကိန်းနှင့်ဘဏ္ဍာရေးဝန်ကြီးဌာနက ကြေညာချက် ထုတ်ပြန်လိုက်တာပါ။

ထုတ်ပြန်ချက်မှာတော့ “လူမှုကွန်ရက်စာမျက်နှာများပေါ်တွင် နိုင်ငံတော်မှ နိုင်ငံပိုင်(ပြည်သူ့ဘဏ္ဍာ)အဖြစ် သိမ်းဆည်းထားတဲ့ မော်တော်ယာဉ်များကို လေလံစနစ်ဖြင့် ထုခွဲရောင်းချမည်ဆိုသော သတင်းများထွက်ပေါ်နေကြောင်း သိရှိရပါတယ်။ သို့ပေမယ့် လက်ရှိအခြေအနေတွင် ဘဏ္ဍာသိမ်းမော်တော်ယာဉ်များအား လေလံတင် ရောင်းချမည့် အစီအစဉ် မရှိပါကြောင်း” လို့ ရေးသားဖော်ပြထားပါတယ်။

တကယ်လို့ စစ်ကောင်စီက လေလံတင် ရောင်းချလာပါက ဝယ်ရောင်းဈေးကွက်အတွင်းမှာရှိတဲ့ ကားဈေးတွေအပေါ် သက်ရောက်မှုရှိလာနိုင်တယ်လို့ ဝယ်ရောင်းသမားတွေက ဆိုပါတယ်။

ကိုယ်တိုင်ဝင်ရောက်လေလံဆွဲဖူးတဲ့ ဝယ်ရောင်းသမားတဦးက “လေလံနဲ့ပတ်သက်ပြီး နှစ်ပိုင်း ရှိတာပေါ့။ အရည်ကြို သံပုံဖြတ်နဲ့ ပစ်တာလား။ ဒါမှမဟုတ် အကြီးစား ပြင်ဆင်ခွင့်နဲ့ ပစ်တာလား။ အကြောင်းအမျိုးမျိုးကြောင့် သူတို့ ဖမ်းထားတဲ့ ကားတွေ ရှိမယ်။ အဲဒီကားတွေက အကုန်လုံး မြေစိုက်နေပြီ။ ရစရာ မရှိတော့ဘူး။ အဲ့ဒါကို အကြီးစား ပြင်ဆင်ခွင့်နဲ့ ပေးရင် ဘာလုပ်လဲဆို အဲ့ဒီကားပုံစံအတိုင်း ကားသစ်တစီးကို ဂျပန်က ဖြစ်ဖြစ် ယိုးဒယားက ဖြစ်ဖြစ် ဝယ်လိုက်တယ်။ ဝယ်ပြီးရင် ဟိုကားစုတ်ဆီက ချက်ဆီနဲ့ နံပါတ်ပြား ခွာယူပြီး ဒီဘက်မှာ ပြန်ထည့်လိုက်တယ်။ ဒါဆိုရင် သူတို့ခေါ်တဲ့ အကြီးစားပြင်ဆင်ခွင့် ဖြစ်သွားတယ်။ အမှန်တကယ်ကတော့ change လိုက်တဲ့သဘောပါ။ အဲ့ဒါဆိုရင်တော့ ကားဈေးက အနည်းနဲ့အများ သက်ရောက်မှု ရှိလာပြီး ဈေး ကျလာလိမ့်မယ်” လို့ ဒီဗွီဘီကို ပြောပါတယ်။

လက်ရှိမှာတော့ စစ်ကောင်စီက ပြည်ပမှ ကားတင်သွင်းခွင့်ကို ကန့်သတ်ထားတဲ့အပြင် ပြည်တွင်းမှာ SKD (Semi Knocked Down) စနစ်နဲ့ လာရောက်ထုတ်လုပ်တဲ့ Suzuki နဲ့ Hyundai ကားစက်ရုံတွေကို ထုတ်လုပ်ခွင့် ပါမစ်ရပ်ဆိုင်းထားတဲ့ အကျိုးဆက်တွေကြောင့် ရန်ကုန်ကားဝယ်ရောင်းဈေးကွက်မှာ ကားဈေးတွေဟာ မြင့်တက်လို့လာပါတယ်။

ရန်ကုန်ကားဈးကွက်မှာတော့ အခုအချိန်က ငွေလိုသူတွေကလွဲပြီး ကားရှိသူအများစုက ကားတွေ ထုတ်မရောင်းကြဘဲ စောင့်ကြည့်နေတဲ့ ကာလဖြစ်တယ်လို့ ကား ဝယ်ရောင်းလုပ်ကိုင်နေသူတွေထံက သိရပါတယ်။

တနင်္သာရီတိုင်း မြိတ်မြို့မှာ စစ်ကောင်စီတပ်သားတွေက လမ်းသွားလမ်းလာ မော်တော်ယာဉ်တွေကို တားဆီးပြီး အကြောင်းပြချက်မျိုးစုံပြကာ ငွေကြေးတောင်းခံနေတယ်လို့ မြို့ခံတွေက ပြောပါတယ်။ 

မြိတ်မြို့ ဘုရားကိုင် ညောင်ပင်အောက်မှာ စစ်ကောင်စီ တပ်သားတွေက လမ်းသွားလမ်းလာ ဆိုင်ကယ်တွေကို Mask မတပ်လို့ဆိုပြီး ဒဏ်ငွေ ဆောင်ခိုင်းကာ နောက်ထပ်တစ်နေရာဖြစ်တဲ့ မြိတ်မြို့ ကရာနီ မီးပွိုင့်လမ်းဆုံက စစ်ကောင်စီတပ်ဖွဲ့တွေကတော့ Mask တပ်လို့ ဒဏ်ငွေဆောင်ခိုင်းနေတယ်လို့ ဆိုပါတယ်။ 

လမ်းသွားလမ်းလာတစ်ဦးကတော့ Mask အမည်းရောင်တပ်လို့ ဒဏ်ငွေ သုံးသောင်း ဆောင်လိုက်ရတယ်လို့ မြို့ခံတစ်ဦးက‌ပြောပါတယ်။ 

စစ်ဝတ်စုံ၊ ရဲဝတ်စုံ၊ မီးသတ်ဝတ်စုံနဲ့ အရပ်ဝတ် ဝတ်စုံတွေဝတ်ဆင်ထားတဲ့ ပူးပေါင်းအဖွဲ့တွေက မြိတ်မြို့ နေရာတော်တော်များများမှာ အခုလို ပြုလုပ်နေကြတာလို့ ဆိုပါတယ်။

အဆိုပါအဖွဲ့တွေအနေနဲ့ ဆိုင်ကယ် လိုင်စင်၊ ယာဉ်မောင်းလိုင်စင်၊ ဆိုင်ကယ်ဦးထုတ်၊ နောက်ကြည့်မှန်၊ နံပါတ်ပြား ပြည့်စုံမှုရှိမရှိ စစ်ဆေးနေပြီး ပြည့်စုံနေလည်း Mask တပ်ခြင်း မတပ်ခြင်း စတဲ့အကြောင်းပြချက်တွေနဲ့ အခုလိုငွေကြေးတောင်းခံနေတာလို့ ငွေကြေးပေးခဲ့ရသူက ပြောပါတယ်။  

အခုလို ငွေကြေးတောင်းခံနေတာကြောင့် ဆိုင်ကယ် တက္ကစီ မောင်းနေတဲ့သူတွေအနေနဲ့လည်း အခက်ခဲတွေ့နေကြတယ်လို့ တက္ကဆီမောင်းသူတစ်ဦးက ပြောပါတယ်။ 

ဒါ့အပြင် လိုင်စင်မဲ့ မော်တော်ယာဉ်တွေကိုလည်း ဖမ်းဆီးစစ်ဆေးနေပြီး လိုင်စင်မဲ့ မော်တော်ယာဉ်စစ်ဆေးတွေ့ရှိရင် စစ်ကောင်စီတပ်ဖွဲ့တွေက ဒဏ်ငွေ ၁၀ သိန်းတောင်းခံပြီး တစ်နှစ်စာ စီးနင်းခွင့် ကတ်ပြား ထုတ်ပေးနေတယ်လို့ သိရပါတယ်။ 

မြိတ်မြို့မှာ အခုလို တောင်းခံနေတာ တစ်ပတ်ဝန်းကျင်ရှိနေပြီ ဖြစ်တယ်လို့ မြို့ခံတွေက ပြောပါတယ်။