အဲဗာတန်အသင်းဟာ ဘရိုက်တန်တိုက်စစ်မှူးမော်ပေးကို ပေါင် ၁၅ သန်းနဲ့ အပြီးသတ်ခေါ်ယူစာချုပ်ခဲ့ပါတယ်။

နည်းပြလမ်းပတ်ရဲ့ အဲဗာတန်အသင်းဟာ ပရီးမီးယားလိဂ်အဖွင့် ၃ ပွဲဆက် နိုင်ပွဲပျောက်နေပြီး ရစ်ချာလီဆန်ကို လက်လွှတ်လိုက်ရသလို ကယ်ဗက်လီဝင် ဒဏ်ရာရနေတဲ့အတွက် တိုက်စစ်ပိုင်းက လိုအပ်ချက်တွေ ရှိခဲ့တာပါ။

ဒီအခြေအနေကို နည်းပြလမ်းပတ်က ဘရိုက်တန်က ပြင်သစ်တိုက်စစ်မှူးမော်ပေးကို ခေါ်ယူပြီး ဖြေရှင်းဖို့ ကြိုးပမ်းခဲ့တာပါ။

အသက်၂၆ နှစ်ရှိ ပြင်သစ်တိုက်စစ်မှူးကို အဲဗာတန်က ၃ နှစ်စာချုပ် ချုပ်ဆိုခဲ့ပါတယ်။ အဲဗာတန်အသင်းဟာ မယုံကြည်နိုင်စရာကောင်းတဲ့ပရိသတ်တွေရှိပြီး အသင်းပြောင်းရွှေ့ ဖို့လွယ်ကူစေခဲ့ကြောင်း၊ အောင်မြင်မှုတွေရရှိဖို့အတွက် ကူညီပေးသွားချင်ကြောင်း စာချုပ် ချုပ်ဆိုအပြီးမှာ မော်ပေးက ပြောပါတယ်။

မော်ပေးဟာ  ပြင်သစ်ကလပ်တွေမှာ ကျင်လည်ခဲ့ပြီးနောက် ၂၀၁၇ ခုနှစ်မှာ ဘရန့်ဖို့ဒ်ဆီ ပြောင်းရွှေ့လာခဲ့ပြီး ၂၀၁၉ ခုနှစ်မှာ ဘရိုက်တန်အသင်းဆီထပ်မံပြောင်းရွှေ့ခဲ့တာပါ။ သူဟာ ဘရိုက်တန်နဲ့ ၁၀၉ ပွဲ မှာ ၂၇ ဂိုးသွင်းခဲ့ပါတယ်။