အာဏာသိမ်း စစ်ကောင်စီဟာ မော်လမြိုင်နည်းပညာတက္ကသိုလ်က ဆရာ၊ ဆရာမ ၄၇ ဦးအား မေလ ၂၀ ရက်နေ့က ရာထူးမှ ထုတ်ပယ်လိုက်ပါတယ်။
ရာထူးမှ ထုတ်ပယ်လိုက်ခံရတဲ့ ဆရာ၊ ဆရာမ ၄၇ ဦးဟာ ပြီးခဲ့တဲ့လက တာဝန်မှ ယာယီရပ်ဆိုင်းခြင်းခံထားရသူတွေ ဖြစ်ပါတယ်။
အကြမ်းဖက်စစ်ကောင်စီဟာ CDM လုပ်ထားတဲ့ ဆရာ၊ ဆရာမတွေကို အကြောင်းပြချက်မရှိဘဲ တာဝန်ပျက်ကွက်တာ၊ ခွင့်စည်းကမ်းဖောက်ဖျက်တယ်ဆိုတဲ့ စွပ်စွဲချက်တွေနဲ့ ရာထူးမှ ထုတ်ပယ်လိုက်တာ ဖြစ်ပါတယ်။
ရာထူးမှ ထုတ်ပယ်ခံရတဲ့ ဆရာ၊ ဆရာမတွေထဲမှာ တွဲဘက်ပါမောက္ခတွေ၊ ကထိကတွေနဲ့ လက်ထောက်ကထိက အရာထမ်း ဝန်ထမ်းတွေအပြင် သရုပ်ပြ အမှုထမ်း ဝန်ထမ်းတွေလည်း ပါဝင်ပါတယ်။
အကြမ်းဖက် စစ်ကောင်စီဟာ မော်လမြိုင်နည်းပညာ တက္ကသိုလ်က CDM ဆရာ၊ ဆရာမတွေအပါအဝင် ရုံးဝန်ထမ်းအချို့ကိုလည်း ပြီးခဲ့တဲ့ ဧပြီ ၂ ရက်နေ့က အလုပ်ရပ်နားခဲ့ပါသေးတယ်။
အကြမ်းဖက်စစ်အုပ်စုနှင့် ပူးပေါင်းတဲ့ နည်းပညာတက္ကသိုလ် ဆရာ၊ ဆရာမတွေကို ပြည်သူ့ သစ္စာဖောက်အဖြစ် မော်လမြိုင်နည်းပညာတက္ကသိုလ် ကျောင်းသားထုက ကြေညာလိုက်ပါတယ်။
မော်လမြိုင်နည်းပညာတက္ကသိုလ် ကျောင်းသားတွေဟာ CDM မပါသေးတဲ့ ဆရာ၊ ဆရာမတွေအနေနဲ့ ကျောင်းသားပြည်သူတွေနဲ့ ပူးပေါင်းပေးဖို့ အကြိမ်ကြိမ် တောင်းဆို တာလုပ်ဆောင်ပြီးနောက် အခုလို ထုတ်ပြန်လိုက်တာပါ။
ဧပြီ ၂ ရက်နေ့အထိ ထုတ်ပြန်မှုအရ Civil ၊ EC ၊ အင်္ဂလိပ်စာနဲ့ IT ဌာနက ပါမောက္ခ၊ ဌာနမှူးတွေ အပါအဝင် ဆရာ၊ ဆရာမ ၃၈ ဦးကို ပြည်သူ့ သစ္စာဖောက်အဖြစ် ကြေညာလိုက်တာပါ။
မော်လမြိုင်နည်းပညာတက္ကသိုလ် ကျောင်းသားတွေဟာ အကြမ်းဖက် စစ်ကောင်စီကို လမ်းပေါ်ထွက် ဆန္ဒထုတ်ဖော်တာတွေ လုပ်ဆောင်နေသလို ရတဲ့နည်းနဲ့ တော်လှန်နေကြတာပါ။
