မွန်ပြည်နယ်၊ မော်လမြိုင်မြို့က လူမှုကူညီရေးအဖွဲ့တွေဟာ မုန်တိုင်းအန္တရာယ်အတွက် ကြိုတင်ပြင်ဆင်ရေး လုပ်ငန်းတွေ လုပ်ဆောင်ထားတယ်လို့ ဒေသခံတွေဆီက သိရပါတယ်။
မော်လမြိုင်မြို့မှာရှိတဲ့ ဘိုဘိုဝင်း Rescue အရေးပေါ်ကယ်ဆယ်ရေးအသင်း၊ ရာမည အရေးပေါ်လူမှုကူညီရေးအသင်း၊ အေးမြကြည်လင် လူမှုကူညီရေးအသင်း၊ မော်လမြိုင် လူမှုကယ်ဆယ်ရေးအသင်း စတဲ့ အသင်းကြီး ၄ သင်းက ပူးပေါင်းစီစဉ်ထားတယ်လို့ သိရပါတယ်။
အဓိက ကယ်ဆယ်ရေးသမားတွေ၊ မုန်တိုင်းအတွက် လိုအပ်တဲ့ ကယ်ဆယ်ရေးပစ္စည်းတွေ၊ အရေးပေါ်အခြေအနေတွေ အတွက်ပါ ကြိုတင်ပြင်ဆင်ထားတယ်လို့ ဆိုပါတယ်။
ဘိုဘိုဝင်း လူမှုကူညီရေးအဖွဲ့ တာဝန်ရှိသူက “ကျနော်တို့ မော်လမြိုင်က မိုးများတော့လေ နှစ်စဉ် ၅ လပိုင်း မိုးကြိုလေကြိုကာလမှာ ၂၀၁၈ ကနေစပြီး ၂၀၂၂ အထိ လေပြင်းကျတာတွေကြောင့် သစ်ပင်ကျိုးတဲ့ ဖြစ်စဉ်တွေက ဖြစ်နေကြဆိုတော့ ပြည်သူလူထုအနေနဲ့ နေအိမ်ထိခိုက်နိုင်တဲ့ သစ်ပင်တွေ ခုတ်ထားဖို့နဲ့ မုန်တိုင်းအတွက် ကြိုတင်ပြင်ဆင်ထားဖို့ လိုပါတယ်” လို့ ပြောပါတယ်။
မွန်ပြည်နယ် မော်လမြိုင်မြို့မှာ ပြီးခဲ့တဲ့ ၂၀၂၂ ဇူလိုင်လက မိုးကြီးပြီး မြေပြိုမှုကြောင့် လူ ၅ ဦး သေဆုံးခဲ့ပါတယ်။
ရန်ကုန်၊ မွန်၊ ကရင်၊ တနင်္သာရီဒေသတွေကို တနာရီ လေတိုက်နှုန်း မိုင် ၉၀ မှ ၁၂၀ အထိ ရှိတဲ့ မုန်တိုင်း တိုက်ခတ်နိုင်လို့ ကြိုတင်ပြင်ဆင်မှုတွေ ပြုလုပ်ထားဖို့ လူဝင်မှုကြီးကြပ်ရေးဦးစီးဌာန မွန်ပြည်နယ်ရုံးက စစ်ကောင်စီလက်အောက်ခံ ဌာနဆိုင်ရာရုံးတွေကို ကြေးနန်းစာတွေ ပို့ထားတယ်လို့ သိရပါတယ်။
မွန်ပြည်နယ်၊ မော်လမြိုင်မြို့ရှိ စက်သုံးဆီအရောင်းတချို့မှာ စက်သုံးဆီပြတ်လပ်နေတယ်လို့ မြို့ခံတွေနဲ့ စက်သုံးဆီအရောင်းဆိုင် တာဝန်ရှိသူတွေက ဒီဗွီဘီကို ပြောပါတယ်။
စက်သုံးဆီအရောင်းဆိုင်တွေဟာ စစ်ကောင်စီ ညောင်ခါးရှည် စစ်ဆေးရေးဂိတ် ယာဉ်ကြောပိတ်ဆို့မှုနဲ့အတူ စက်သုံးဆီတွေ အချိန်မီရောက်မလာလို့ စက်သုံးဆီ ပြတ်လပ်နေတာပါ။
မြို့ပေါ် စက်သုံးဆီအရောင်းတချို့မှာ 92၊ 95 ဓာတ်ဆီတွေအပြင် ဒီဇယ်ဆီပါပြတ်လပ်နေပြီး မြို့အပြင်ဆိုင်တချို့မှာလည်း စက်သုံးဆီလက်ကျန် နည်းလာတာကြောင့် ခွဲတမ်းနဲ့သာ ရောင်းချပေးနေတာပါ။
“စက်သုံးဆီက မတ် ၂၀ ရက်နေ့ မနက်ပိုင်းက စပြတ်တာ၊ မြို့ထဲကဆိုင်တွေ ဆီပြတ်ကုန်ပြီ၊ အခုတော့ မြို့အပြင်ဆိုင်တွေမှာ အလုအယက်နဲ့ ဝယ်ယူတာတွေ ရှိတယ်” လို့ မြို့ခံတဦးက ပြောပါတယ်။
စက်သုံးဆီပြတ်လပ်မှုကြောင့် ကားတစီးကို ကျပ် ၃၀,၀၀၀ ကနေ ကျပ် ၅၀,၀၀၀ အထိသာ ခွဲတမ်းနဲ့ ရောင်းချပေးနေတယ်လို့ သိရပါတယ်။
စက်သုံးဆီအရောင်းဆိုင် တာဝန်ခံတဦးကတော့ စက်သုံးဆီပြတ်လပ်မှုဟာ စစ်ကောင်စီက စက်သုံးဆီတွေကို ခွဲတမ်းအလှည့်ကျစနစ်နဲ့ ရောင်းချပေးတာ၊ ညောင်းခါရှည် စစ်ဆေးရေးဂိတ်မှာ အချိန်ကြန့်ကြာတာတွေကြောင့်ဖြစ်တယ်လို့ ဒီဗွီဘီကို ပြောပါတယ်။
မော်လမြိုင်မြို့ပေါ်မှာ စက်သုံးဆီအရောင်းဆိုင် ၁၅ ဆိုင်ထက်မနည်း ရှိပြီး လက်ရှိမှာတော့ စက်သုံးဆီအရောင်းဆိုင် ၁၀ ဆိုင်လောက်မှာ ဆီပြတ်လပ်နေတာပါ။
စက်သုံးဆီဆိုင်တွေမှာ ဆီပြတ်လပ်မယ့် အခြေအနေတွေ ဖြစ်ပေါ်ပါက အချိန်နဲ့တပြေးညီ တင်ပြဖို့နဲ့ ဆီပြတ်လပ်တဲ့ စက်သုံးဆီဆိုင်တွေကို အရေးယူသွားမယ်လို့ စစ်ကောင်စီက မတ်လ တတိယပတ်အတွင်း ထပ်မံထုတ်ပြန်ထားပါတယ်။
